Na'k domba Muka'k Segeldi'k Kuju'k ¹ Ngan, ketika Na'k Domba muka'k segel di'k kuju'k, odiah sunyi'k no'k surga kira-kira sutongah japm koti'ng. ² Ngan, ku'k ngolo kuju'k malekat di'k tokit no'k joi Baipunopo'k, ngan ju'k trompet niminyu'k koni balo. ³ Lalu, malekat lai'kng moni'k ngan tokit no'k altar*, migi'tn nyi'k golo'k pedupaan omas; ngan niminyu'k nganu'nge obia dupa nya'k nyumah ngan doa-doa balo nyo kudus no'k somu altar omas di'k no'k joi takhta han. ⁴ Ngan, asap dupa han, busamah ngan doa-doa balo nyo kudus, sima'k no'k joi baipunopo'k so'k tongan malekat han. ⁵ Lalu, malekat han monu pedupaan ngan ngisi'kng nya'k opi di'k nimonu so'k altar ngan nimora'knge kanu bumi; maka kapi'k lah caho dinia di'k hoto cilat ngan gempa bumi. Trompet Tojih sapai Trompet kupat Ninyipuah ⁶ Setelah han, ju'k malekat di'k migi'tn ju'k trompet han bersiap-siap nya'k nyipuah trompet balo. ⁷ Malekat di'k tojih nyipuah trompet'n, maka terjadilah uja'tn es ngan opi bucampur doyo'k; ngan ninyibuah no'k somu bumi, maka puka'klah sepertohuah bumi ngan sepertohuah balo bota koyuh ngan puka'klah sumua iduh ijau. ⁸ Malekat kudu nyipuah trompet'n, maka sesuatu mah dohi'k di'k puka'k opi nimora'kng kanu wah lawuat; ngan sepertohuah so'k lawuat jodi doyo'k, ⁹ maka sepertohuah so'k makhluk di'k berada no'k lawuat ngan nginapm midap jodi kobe'k, ngan sepertohuah so'k kapal ningacuar. ¹⁰ Malekat kutohuah nyipuah trompet'n, maka hobu'klah so'k honyiat'n nyi'k ngolo'k binata'kng daeh, jilau mah obor, ngan binata'kng han nipa'k sepertohuah so'k sungi ngan motih pi'kng. ¹¹ Oda'tn binata'kng han adalah Apsintus . Maka, sepertohuah so'k sumua pi'kng jodi apsintus ngan obia nyo kobe'k karna pi'kng han jeh jodi poyiat. ¹² Malekat kupat nyipuah trompet'n, maka du'k pakualah sepertohuah motih sohonuh, sepertohuah buha'tn, ngan sepertohuah binata'kng sehinga sepertohuah so'k balo jodi piti'k, ngan sepertohuah hanu onu jodi piti'k ngan mahai'k gi'k no'k ngohupm onu. ¹³ Lalu, ku'k ngolo ngan ngopi'kng nyi'k golo'k monua'k bouh mibir no'k tudo'k-todo'k honyia'tn, nyia'tn ngan caho nyahi'kng, ''Celaka,celaka, celakalah balo di'k monai no'k bumi karna caho trompet kutohuah malekat lai'kng di'k bayu ho'k ninyipuah.''