Binata'kng di'k Kuluar so'k Lawuat ¹ Kemudian, ku'k ngolonyi'k golo'k binata'kng buas kuluar so'k wah lawuat, butanua'k simia ngan ju'k ba'kng. No'k sitiap tanua'k odiah nyi'k mahkota ngan no'k sitiap ba'k ninulis odatn hinaan. ² Binata'kng buas di'k niku'k honong han suhupa ngan macatn tutul, kojo'kng mah kojo'k bua, ngan tukua'kng mah tukua'k singa. Naga han minyu'k binata'kng buas odiah kukuatn, takhta, ngan kuasa di'k daeh. ³ Ku'k ngolo nyi'k so'k balo ba'kng mah odu'k toatn di'k nya'k ngado'k diapm kobe'k, tetapi toatn jodi bai'k. Sumua dunia analwua ngan ngajah binata'kng buas han. ⁴ Ngan, balo nyumah naga han karna jeh minyu'k kukuat'n nganu binata'kng buas han; ngan balo nyumah binata'kng buas han ngan nyono'k, '' Osiahkoh di'k mah binata'kng buas tia ngan osaihkoh di'k dopit bupora'kng lawatn diapm?'' ⁵ Ngan, nganu diapm niminyu'k jatoh so'k tukua'k kuatn somo'kng ngan ngolo'k, ngan kuasa inya'k kodi'ng sulama'k pat puhu'k du(42) buhatn. ⁶ Ngan bujatoh so'k tukua'k ngolo'k lawatn baipunopo'k, nya'k hina odatn-Diapm, ngan kemah-ng, ngan balo di'k motia'k no'k surga. ⁷ Diapm juga'k binan nya'k lawatn balo nyo kudus ngan ngalah balo; ngan nganu diapm niminyu'k kuasa no'k sumua suku, kaupm, bahasa, ngan bangsa. ⁸ Sumua di'k motia'k no'k poyo'k tono'k ho'k nyumah diapm, yaitu sitiap nyo di'k odatn kai ninulis so'k tojih dunia ninyodi no'k wah alkitab jodi pumoidiap Na'k Domba, di'k jeh nimoleh. ⁹ Sitiap nyo di'k bukopi'kng hendaklah diapm ngopi'kng tia: ¹⁰ ''Apabila nyi'k kunan nyo ninotu nya'k sebagai tawanan, diapm ho'k jodi tawanan; apabila nyi'k kunan nyo kabe'k nya'k poda'kng, nya'k poda'kng diapm harus kabe'k.'' hanlah kuapi'k ngan iman balo nyo kudus. Binata'kng di'k kuluar so'k Poyo'k tono'k ¹¹ Lalu, ku'k ngolo nyi'k golo'k buas lai'kng kuluar so'k wah poyo'k tono'k; ngan binata'kng han biatn du tanua'k mah na'k domba, tetapi diapm inyatn mah naga. ¹² Diapm nyalatn sumua kuasa binata'kng buas di'k tojih han no'k joi'ng, ngan moki poyo'k tono'k ngan balo di'k motia'k no'k wah'ng nyumah binata'kng buas punojih, di'k towatn parah han jeh nipuhi'k. ¹³ Diapm moki tana-tana ajaib // di'k daeh, bahkan tono'k opi so'k honyiatn nganu poyo'k tono'k, no'k joi balo nyo. ¹⁴ Dan, diapm nosat balo nyo di'k motia'k no'k bumi ngan tana-tana ajaib di'k ningijetn bagi diapm nya'k kodi no'k joi binata'kng buas di'k tojih. Diapm nyono'k nganu balo di'k motia'k no'k bumi nya'k moki patung binata'kng buas di'k tojih, di'k towatn nih poda'kng , tetapi totap midiap han. ¹⁵ Diapm ningijetn nya'k minyu'k napas nganu patung binata'kng buas han sihinga patung binata'kng buas han tau'k inyatn ngan menyebabkan balo nyo di'k kai nyumah patung han nikome'k. ¹⁶ Dan, diapm menyebabkan sumua nyo, ci'k atau daeh, kaya atau misketn, kuli atau nyo merdeka niminyu'k nyi'k tana no'k tongan tauh atau dakiah'ng, ¹⁷ supaya kadiah nyi'k kunan pun dopit mihih atau nyual kecuali diapm pu'kng tana han, koyuhai'k odatn binata'kng buas han atau bilangan odatn. ¹⁸ Koyuh tai membutuhkan hikmat. Adumaih nyo di'k lobiah panai hito'kng angka binata'kng buas han karna angka han adalah angka nyo na'k sio; ngan angka han nimm hatus nimm puhu'k nimm.