¹ Do ahi-ahi itu, waktu sejumlah besak jeme bekumpul dan ngado ape-ape unjuk dimakan, Yesus ngantau murid-murid-Nye Dan ngumung me die uhang. ² Aku mehase kesian me jeme rami itu karne makini ahi dieuhang side rembak nggok-Ku selame tige ahi, dan ngado ape-ape unjuk dimakan. ³ Dan men Aku ngajung dieuhang balek ke humah dieuhang dalam keadaan lapah, dieuhang akan lenyap dalam perjalanan karne bebehape ndai dieuhang datang ndai jaoh. ⁴ Dan murid-murid-Nye nimbali Die, "ndai mane suhang jeme pacak ngenyangkan dieuhang nggok ruti di badah sepi lok ini?". ⁵ Laju, Yesus betanye ke die uhang, "behape ruti yang ngan punye? dieuhang nimbal, Tujuh ruti." ⁶ Laju, Yesus ngajungkan jeme rami itu cagok ditanah, dan die ngambek tujuh ruti itu, dan ngucap syukur, dan die mecah-mecahkannye, dan ngenjukkannye ke murid-murid-Nye unjuk ngidangkannye ke jeme rami. Dieuhang pun ngidangkannye ke jeme rami. ⁷ Dan murid-murid pule mempunyei dekde banyak ikan kecek. Sesude ngucap syukur pucuknye, Yesus ngajung murid-murid-Nye unjuk mbagikan pule ikan-ikan itu ke jeme rami. ⁸ Jeme rami itu makan sampai kenyang, dan dieuhang ngumpulkan tetakan makanan yang tesise itu tujuh sangkek penuh. ⁹ Ade kire-kire empat ribu jeme yang makan, ndai itu, Yesus ngajung dieuhang pegi. ¹⁰ Laju Yesus gancang masuk perahu rembak murid-murid-Nye dan sampai di daerah Dalmanuta. Yesus Diajung Nunjukkan Tande Ndai Surge ¹¹ Dan, jeme-jeme Farisi datang dan mulai bedebat nggok Yesus, sambil memintak Yesus nunjukkan tande ndai surge, unjuk nguji-Nye. ¹² Sesude Yesus ngambek napas panjang dalam Roh-Nye, Die ngumong, "Ngape generasi ini nyakah tande? Aku ngumongkan yang sebenahnye ke ngan, ngado sikokpun tande yang nak dienjukkan ke generasi ini. ¹³ laju, Yesus ninggalkan dieuhang, masok agi ke dalam perahu, dan pegi ke seberang. Ragi Jeme Farisi dan Ragi Herodes ¹⁴ Murid-murid dekde tehingat ngundang ruti, dan hanye punye sepiyak ruti di dalem perahu. ¹⁵ Dan, Yesus bepesan ke dieuhang, "Siap sedielah! Behati-hatilah terhadap ragi jeme-jeme Farisi dan ragi Herodes." ¹⁶ laju dieuhang mulai berdiskusi sikok nggok yang lain soal dieuhang yang dekde mempunyei ruti. ¹⁷ Dan, sesude pacak hal ini, Yesus ngumung ke dieuhang, "Ngape ngan ngumungkan tentang ngan yang dekde mempuyei ruti? Ape ngan lom juge pacak atau ngerti? Ape hati ngan dikehaskan? ¹⁸ Ape ngan punye mate, tapi dekde nginak? Dan, punye cuping, tapi dekde nganing? Dekde ingat ape ngan, ¹⁹ Waktu Aku mecah-mecahke lime ruti unjuk lime ribu jeme, behape banyak sangkek yang beisi penuh nggok tetak-tetakan makanan yang ngan kumpukan? Dieuhang nimbal, "Due belas sangkek." ²⁰ Dan, waktu tujoh ruti unjuk empat ribu jeme itu, behape sangkek yang penuh nggok tetak-tetakan makanan yang ngan kumpulkan dieuhang nimbali, "Tujoh sangkek." ²¹ Laju, Die ngumung ke dieuhang, "Ape ngan maseh lum karoh?" Yesus Nyembohkan Jeme Bute Di Betsaida ²² Laju, Yesus dan murid-murid-Nye sampai di Betsaida. Dan, bebehape jeme ngundang jeme bute dan memohon ke Yesus mangke ngecakinye. ²³ Yesuspun ngecaki tangan jeme bute itu dan ngundangnye ke luah dusun. Laju Yesus meludahi mate jeme bute itu dan mbatakkan tangan-Nye pucuk die. Die betanye ke die, "Ape ngan nginak sesuatu?" ²⁴ Laju, jeme itu ngasat ke pucok dan ngumung, "Aku nginak jeme-jeme, tapi dieuhang tekinak lok pohon-pohon yang bejalan. ²⁵ Ndai itu, Yesus mbatakkan tangan-Nye di pucuk mate jeme itu agi, laju jeme itu mbukak matenye, penginakannye semboh, dan diepun pacak nginak segale nggok jelas. ²⁶ Laju, Yesus ngajungnye balek ke humahnye nggok ngumung, "halah masok ke dalam dusun." Yesus Jelahlah Kristus ²⁷ Ndai itu, Yesus pegi, rembak murid-murid-Nye, ke dusun-dusun di Kaisarea Filipi. Dan, di tengah perjalanan, Yesus betanye ke para muridnye nggok ngumung ke dieuhang, "Kate jeme-jeme, sape Aku ini?" ²⁸ Dieuhang nimbal, "Yohanes Pembaptis, yang lain ngumungkan Elia, dan yang lainnye salah suhang ndai nabi-nabi." ²⁹ Laju, Yesus betanye ke dieuhang, "Namun, menuhut ngan, sape Aku ni?" Petrus nimbali-Nye, "Engkau jelahlah Kristus." ³⁰ Dan, Yesus memperingatke dieuhang unjuk dekde ngenjuk tau ke siape kian tentang Die. Ngenjuk tau Tentang Penderitaan Yesus. ³¹ Laju, Yesus mulai ngajah murid-murid-Nye men Anak Manusie harus menderite banyak hal dan dekde diterime oleh tue-tue Yahudi, iman-iman palak, wan ahi-ahli Taurat, dan dibunuh, dan sude ndai tige ahi bangkit pule. ³² Dan, Yesus ngumungkan hal ini secare tebukak. Karne iyu, Petrus nahekkan Yesus ke samping dan mulai menegoh-Nye. ³³ Tapi, sambil menoleh dan nginak murid-murid-Nye, Yesus menegoh petrus dan ngumung, " pegilah ndai-Ku, woi Iblis! Sebab, ngan dekde mikirke pekare-pekare Allah, tapi pekare-pekare manusie. ³⁴ Sesude ndai itu, Yesus ngantau jeme rami, wan murid-murid-Nye, dan ngumung ke dieuhang, "Men suhang jeme nak milu Aku, die harus menyangkal badannye diwek, dan memikul salibnye, laju milui Aku. ³⁵ dikarnekan, sape kian yang nak nyelamatke nyawenye nak kelengitannye. Akan tapi, sape kian yang kelengitan nyawenye demi Aku dan Injil nak nyelematkannye. ³⁶ dikarnekan, ape untungnye suhang jeme ndapatke seluruh dunie, tapi kelengitan nyawenye? ³⁷ Ape yang pacak suhang jeme enjukkan unjuk menebus nyawenye. ³⁸ Dikarnekan, sape kian yang maluan karne Aku dan firman-Ku di generasi yang dekde setia dan beduse ini, maka Anak Manusia juge akan maluan ngakui jeme itu waktu die datang dalam kemuliaan Bapang-Nye rembak nggok malaikat-malaikat yang kudus."