¹ Dan Yesus mulai ngayah agi di tepi danau. Bekumpul ngerumuni Yesus jeme rami yang jumlahnye besak sehingge die naek ke dalam sikok perahu dan cagok dipucok danau. Sementara, jeme rami itu berade di dahat, ddi tepi danau. ² dan die ngajah die uhang tentang banyak hal dengan perumpamaan-perumpamaan dalam pengajahan-Nye, Die ngumong ke die uhang. ³ Anenglah ade sutek jeme penabur yang pegi untuk menabur. ⁴ Mangke terjadilah, waktu die dang menabur bebehape benih titek di pingger bakal dan burung-burung datang laju dimakannye. ⁵ Sepiyak titek dipucuk tanah bebatu yang dekde banyak tanahnye. benih itu laju tumboh gancang karne tanahnye dekde banyak. ⁶ Waktu mateahi tambah angat tanaman itu mutong dan dikarenekan dikde punye akah tanaman itu laju kehing. ⁷ Sepiyak titek di tengah-tengah belukar, laju belukar tumbuh dan ngimpet tanaman itu sampai mati, dan tanaman itu dikde bebuah. ⁸ Tapi sepiyak titek ditanah yang ilok dan bebuah, tumbuh dan tambah besak wan ngasilke tige puluh kali lipat, enam puluh kali lipat dan seratus kali lipat. ⁹ Kemudian Yesus ngumong siape yang punye cuping untuk nganeng, lajulah die nganeng. ¹⁰ Waktu Yesus suhangan , jeme di sekeliling-Nye rembakkan nggok keduabelas rasul, nanyekan ke Die tentang perumpamaan-perumpamaan itu. ¹¹ Laju Die nimbali die uhang "rahasie kerajaan Allah dienjokkon ke ngan akan tapi ke jeme-jeme lain, tiap hal yang diomongkan dalam perumpamaan-perumpamaan. ¹² Mangke meskipun pacak nginak, die uhang nginak dan dekde keluro dan mestipun pacak nganeng, die uhang nganeng dan dekde keluro, mangke die uhang hala betobat dan diampuni. ¹³ kemudian Yesus ngumong ke die uhang "dikde pahamikah ngan perumpamaan ini? bakmane ngan pacak ngerti segale perumpamaan itu? ¹⁴ Penabur itu menaburkan firman. ¹⁵ Die uhang jelahlah jeme-jeme yang titek dipanggil bakal badah firman itu ditaburkan. waktu die uhang nganeng dengan gancang iblis marak dan mehebut firman yang ditaburkan ke die uhang. ¹⁶ Mak itu pule, die uhang yang ditabur di tanah bebatu jelahlah jeme-jeme yang nganingkan firman dan gancang nerimennye dengan agam. ¹⁷ akan tetapi die uhang dikde beakah di dalam badannye diwek dan cuma betahan negal laju, waktu datang kesulitan ape penganiayaan dikarnekan firman itu, die uhang guncang titek ¹⁸ dan yang lainnya setelah yang titek di tengah-tengah belukar, Die uhang jelahlah jeme-jeme yang nganeng firman. ¹⁹ tapi kuatir nggok dunie dan hawe nafsu nggok kekayean dan keinginan akan hal lain masuk diantare firman itu dan ngimpetnya manke die dekde bebuah. ²⁰ Namun die uhang yang ditabur di tanah yang ilok jelahlah die uhang yang nganeng firman nerimenye dan ngasilkan buah tigepuluh kali lipat, enam puluh kali lipat dan seratus kali lipat. ²¹ Laju Yesus ngumong ke die uhang kanye pelite dekde dikundang untuk dibatakkan di bawah sikok gantang ape di bawah sikok ranjang? bukannye pelita tu seharusnye dibatakkan di pucuk keting pelita? ²² dikarnekan ngado yang tersimpan yang dekde di nyatekan mak itu pule ngado rahasie ape kian karne hal itu nak dinyatakan. ²³ kalu ade jeme yang punye cuping unjuk nganeng bialah die nganeng! ²⁴ laju Yesus ngumong ke die uhang perhatikan ape yang ngan aneng. ukuran yang ngan pakai akan diukurkan ke ngan dan maseh ade agi yang nak ditambahkan ke ngan. ²⁵ karne siape yang punye die akan dienjok agi. tapi siape yang dekde mempunyei ape pon yang ade di dei nak diambek ndai die. ²⁶ laju Yesus ngumong Kerajaan Allah jelahlah lok sutek jeme yang menabur benih di tanah. ²⁷ Penabur itu tidoh dan bangun siang dan malam dan benih itu ngeluahken tunas dan tumbuh penabur itu dektau mbak mane terjadinye. ²⁸ Tanah itu ngasilkan buah dengan sendirinye awalnye tunas laju bulirnye sudeh tu biji-biji gandum di dalam bulir itu. ²⁹ waktu biji-biji gandum itu masak jeme itu gincang nyabitkannye karne musim panen lah sampai. ³⁰ Laju Yesus ngumong perumpamaan damenye kite pacak mbandingkannye kerajaan Allah? ³¹ Kerajaan Allah itu lok biji sesawi yang ditabur di tanah walaupun biji itu jelahlah biji yang paleng kecek di antare segale biji di bumi. ³² tapi waktu ditabur biji itu nak tumboh dan jadi lebih besak ndai segale tanaman di khume dan ngeluahkan batang-batang besak laju burung-burung di udara pacak buat sahang di bawah naungannye. ³³ Nggok memakai banyak perumpamaan lok itu Yesus ngatekan firman ke die uhang sesuai nggok yang pacak die uhang aneng. ³⁴ Die dekde kelenye ngumong ke die uhang tanpe suatu perumpamaan tapi Die jelahkan segalenye nggok tersendiri ke murid-murid-Nye. ³⁵ dan di ahi itu waktu lah petang Yesus ngumong ke murid-murid-Nye "payulah dihi pegi ke seberang danau" ³⁶ sude ninggalkan jeme rami itu die uhang ngundang Yesus rembak die uhang masok ke perahu dibadah Yesus berade dan perahu-perahu lainnye rembak nggok Die. ³⁷ Laju terjadilah angin topan yang dasyat dan ombak besak ngempaskan perahu laju perahu itu penuh nggok ayakh. ³⁸ Tapi Yesus ade di buritan kapal terkelap di pucok bantal. laju die uhang bangunkannye dan ngumong ke Die, Guru, ape Kamu dekde peduli amen kite lenget? ³⁹ Ndai itu Yesus betegak dan nyegak angin, laju ngumong ke laut "diam, tenanglah! laju angin itu bedak dan jadi tenang. ⁴⁰ Laju Die ngumong ke die uhang " ngape ngan dekde behani? ape ngan ngatek iman? ⁴¹ die uhang dekde behani nian dan ngumong sutek ke yang lain, siapekah Die ini? Angin kencang dan laut kian pacak nuhut nggok Die!