¹ Pagi-pagi nian, imam-imam palak ngadakan sikok perundingan nggok para tue-tue, dan ahli-ahli taurat, serta segale Sanhendrin. Dan, dieuhang ngikat Yesus ngundang-Nye pegi, dan ngenjukkan-Nye ke Pilatus. ² Laju, Pilatus betanye ke Die kamu raje jeme Yahudi?" Dan, Die nimbalinye, "kamu yang ngumongkannye". ³ Sesude itu, para imam palak nyalahkan Yesus betubi-tubi. ⁴ Dan, Pilatus betanye agi ke Die, "ape ngan dekde nimbalinye? kinak, behape banyak kesalahan dieuhang unjuk melawan kamu". ⁵ Tapi, Yesus dekde agi nimbal sehingge Pilatus heran. ⁶ Di ahi raye Paskah, Pilatus biase mbebaskan bgi dieuhang suhang tahanan yang dieuhang mintak. ⁷ Dan, ade suhang bename Barabas lah ditahan rembak nggok pemberontak yang nggawikan pembunuhan dalam sebuah pemberontakan. ⁸ Jeme rami datang dan mulai memintak ke Pilatus unjuk nggawikan lok kebiasean yang die gawikan bagi dieuhang. ⁹ Dan, Pilatus nimbal dieuhang nggok ngumong, "ape ngan galak mangke aku membebaskan bagi ngan Raja jeme Yahudi ini?" ¹⁰ Dikarnekan, die pacak amun para imam palak lah ngenjukkan Yesus karne iri ati. ¹¹ Tapi, imam-imam palak malah mempengaruhi jeme rami mangke mintak Pilatus membebaskan Barabas. ¹² Laju, Pilatus ngumong agi ke dieuhang, "jadi, ape yang harus aku gawikan nggok jeme yang ngan sebut Raja jeme Yahudi ini?" ¹³ Dan, dieuhang melaho-laho agi, "salibkan Die!" ¹⁴ Laju, Pilatus ngumong ke dieuhang, "ngape! kejahatan ape yang lah die gawikan? " namun, dieuhang melaho-laho lebeh kehas agi, "Salibkan Die!" ¹⁵ Karne nak memuaskan ati jeme rami, Pilatus melepaskan BArabas bagi dieuhang, dan lah mencambuk Yesus, die ngenjukkan-Nye unjuk disalibkan. ¹⁶ Dan, para prajurit ngundang Yesus masok ke istane, jelahlah gedung pengadilan, dan dieuhang ngantau segale pasukan bekumpul. ¹⁷ Laju, dieuhang makaikan-Nye jubah unggu, dan sesude menganyam sikok mahkota beduhi, dieuhang memakaikannye ke Yesus. ¹⁸ Laju, dieuhang mulai nyampaikan salam ke Die, "salam, Raja jeme Yahudi!". ¹⁹ Dan, dieuhang gutuk palak-Nye nggok sikok buloh dan ngendahi-Nye, laju sujud nyembah-Nye. ²⁰ Sesude dieuhang mengolok-olok Yesus, dieuhang ngelepaskan jubah ungu ndai Yesus, dan makaikan pakaian-Nye diwek. Laju, dieuhang ngundang Yesus ngeluah unjuk menyalibkan-Nye. (Penyaliban Yesus) ²¹ Da, dieuhang memakse jeme yang dang lalu, Simon jeme Kirene, yang dang datang ndai dusun, bapang ndai Alexander dan Rufus, unjuk memikul salib-Nye. ²² Laju, dieuhang ngundang Yesus ke badah bename Golgota, yang artinye "Badah Tengkorak". ²³ Dieuhang ngenjuk-Nye Anggur becampur mur, tapi Die dekde ngambeknye. ²⁴ Laju, dieuhang nyalibken Die dan mbagi-mbagikan pakaian-Nye di antare dieuhang, sambil gutuk undi unjuk nentukan bagian ape yang pacak diambek oleh masing-masing. ²⁵ Dan, waktu itu jam ketige waktu dieuhang nyalibkan-Nye. ²⁶ Dan, tulisan mengenai tuduhan ke Yesus tertulis, "Raja Jeme Yahudi". ²⁷ Laju, dieuhang nyalibkan due jeme perampok rembak nggok Die, suhang jeme di sebelah kanan-Nye dan suhang jeme di sebelah kiri-Nye. ²⁸ Jadi, tergenapilah kitab suci yang ngumongkan, "dan, Die tehitung di antare jeme-jeme durhaka". ²⁹ Laju, jeme-jeme yang dang lalu menghujat Yesus sambil nggelengkan palak dieuhang dan ngumong, "woi! kamu yang nak meruntuhkan Bait Allah dan mbangunnye balek dalam tige ahi, ³⁰ selametkelah badn Ngan diwek dan tuhunlah ndai salib!" ³¹ Begitu pule imam-imam palak, rembak nggok para ahli Taurat, mengejek Yesus nggok ngumong sikok nggok yang lain, "Die nyelamatkan jeme lain, tapi Die dekde pacak nyelamatkan badn-Nye diwek! ³² Bialah Mesias, sang Raja Israel, mak ini ahi tuhun ndai salib mangke kete pacak nginak dan pecaye. "Dieuhang yang disalibkan rembak nggok Yesus pule ncele Die. ³³ di jam dua belas, akaplah di segale tanah itu sampai jam tiga. ³⁴ Di jam 3, Yesus berseru nggok suare nyaring:, "Eloi, Eloi, Lama Sabakhtani, "yang retinye" Allah-Ku, Allah-Ku, nyampe kamu ninggalke Aku?" Dan, sesude nganingnye, bebehape jeme yang betegak di parak-Nye ngumong, " Kinak! Die ngantau Elia". ³⁶ Laju, suhang belahi, dan ngisi sikok busa nggok Anggur masam dan mbatakkannye di sikok bulo, dan ngenjukkannye ke Yesus unjok di minum, sambil ngumong, "nagkelah dihi nginak damenye Elia nak datang unjok nuhonkan Die". ³⁷ Laju, Yesus berseru nggok suare nyaring dan ngembuskan nafas terakhir-Nye. ³⁸ Waktu itu, tirai Bait Allah koyak njadi due, ndai pucuk sampai ke bawah. ³⁹ Dan, waktu palak pasukan, yang betegak nyadap Yesus, nginak makmane Yesus ngembuskan nafas terakhir-Nye, die ngumong, "sungguh, Jeme ini jelahlah Anak Allah!". ⁴⁰ Di sane pule ade bebehape betine yang nginak ndai jauh, diantare dieuhang jelahlah Maria Magdalena dan Maria ibu Yakobus mude dan Yoses, wan Salome. ⁴¹ Waktu Yesus ade di wilayah Galilea, dieuhang milui Die dan melayani Die. Dan di sane ade banyak betine lainnye yang datang rembak Yesus ke Yerusalem. ⁴² Waktu akhi lah dalu, karne akhi itu jelahlah akhi pengijean, yaitu akhi sebelum akhi sabat, ⁴³ Yusuf jeme Arimatea dateng, suhang anggota mejelis besak yang dihormati, yang dirinye pule nunggu-nunggu kedatangan kerajaan Allah, membehanikan diri dan pegi ke Pilatus dan mintak badan Yesus. ⁴⁴ Pilatus tekanjat nganing bahwe Yesus lah mati. Die ngantau palak pasukan dan betanye ke die jelah ape Yesus lah mati. ⁴⁵ Sesude Pilatus pacak ndai palak pasukan, die ngenjukkan mayat itu ke Yusuf. ⁴⁶ Dan, Yusuf mblanjekan kain linan dan nuhunkan mayat Yesus, sude ngibat-Nye dalam kain linen itu, die mulikan-Nye di dalam kubuhan yang digali di Bukit batu. Dan, die gelundungkan sikok batu ke lawang masok kuburan. ⁴⁷ Maria Magdalena dan Maria umak Yoses nginak badah Yesus dipulikkan.