¹ Dan, waktu ahi sabat berlalu, Maria Magdalena, Maria umak Yakobus, same Salome, lah mbeli rempah-rempah mangke dieuhang pacak pegi dan meminyaki Yesus. ² Pagi-pagi bute, diahi pertame minggu itu, waktu Mataahi terbit, dieuhang datang ke kuburan. ³ Dieuhang ngumong suhang ke yang lain , "siape yang nak gelundungkan batu ndai lawang masok kuburan itu?" ⁴ Tapi, sesude ngasat ke pucok, dieuhang nginak batu yang besak nian itu lah digelundungkan. ⁵ Dan, sesude masok ke dalam kuburan dieuhang nginak suhang bujang yang makai jubah puteh dang cagok di sebelah kanan, dan dieuhang tekanjat. ⁶ Laju, die ngumong ke dieuhang, " dalah tekanjat, ngan cakah Yesus jeme Nazaret yang lah disalibkan. Die lah bangkit. Die ngado di sini. Kinak badah dieuhang mulikan-Nye. ⁷ Tapi, pegilah, umongkan ke murid-murid-Nye dan ke Petrus amun die dang dului ngan ke Galilea. Di sane, ngan nak tegah Dia, lok yang lah Die umongkan ke ngan". ⁸ Laju, dieuhang keluah dan melahikan diri ndai kuburan itu karne dieuhang gemetahan dan takjub, dan dieuhang dekde ngumongkan ape kian ke siape kian karne dieuhang kengehian. (Dan, segale setue yang lah anjungkan mangke dieuhang umongkan ke Petrus dan kance-kancenya, dieuhang ngumongkan nggok singkat. sesude itu, Yesus diweklah yang ngutus dieuhang ndai timuh sampai ke bahat, unjuk ngumongkan berite yang kudus dan yang dekde pacak binase tentang keselamatan kekal. Amin.) ⁹ Waktu Yesus bangkit pagi-pagi diahi pertame dalam minggu itu, Die pertame-tame nunjukkan diri ke Maria Magdalena yang ndainye Yesus lah ngusir tujoh setan. ¹⁰ Laju, die pegi dan ngenjuk tau ke dieuhang yang lah rembak nggok Yesus, sementare dieuhang dang berduka dan menangis. ¹¹ Dan, waktu dieuhang nganing mun Yesus idup dan lah dikinak olehnye, dieuhang dekde pecaye. ¹² Sesude kejadian itu, Yesus pule nunjukkan diri dalam bentuk lain ke due jeme ndai dieuhang yang dang bejalan menuju ke dusun. ¹³ Laju, dieuhang balek dan ngenjuk tau ke yang lainnye, tapi yang lainnye itupun dekde mempercayei dieuhang. ¹⁴ Sesude itu, Die nunjukkan diri-Nya diwek ke kesebelas murid-Nye waktu dieuhang dang cagok makan dan Die negohkan dieuhang karne kedekde percayean dan kedegilan ati dieuhang. Karne dieuhang dekde pecaye ke jeme-jeme yang lah nginak-Nye sesude Die bangkit. ¹⁵ Dan, Die ngumong ke dieuhang, "pegilah ke seluruh dunie dan katekanlah Injil kesegale ciptaan. ¹⁷ Dan, tande-tande ini nak milui dieuhang yang percaye: Dalam name-Ku dieuhang nak ngusir setan, dieuhang nak ngumong dalam bahasa-bahasa anyar; ¹⁸ dieuhang nak ngecak ulakh nggok tangan dieuhang; dan mun dieuhang minum racun yang mematikan, hal itu dekde kan nak ncelakekan dieuhang; dieuhang nak mbatakkan tangan dieuhang pucuk jeme-jeme bidapan, dan jeme-jeme itu nak semboh". ¹⁹ Laju, sesude Tuhan Yesus ngumongkannye ke dieuhang, Die terangkat ke Surga dan cagok di sebelah kanan Allah. ²⁰ Laju, dieuhang pegi dan berkhotbah di mane kian, sementare Tuhan begawi rembak dieuhang dan mengokohkan Firman-Nye ngeliwati tande-tande yang menyertainye.