¹ Laju, Yesus mulai ngumung ke dieuhang dalam perumpamean-perumpamean."Ade jeme yang mengumpayekan sikok ume anggur. Die mbangun pagar di sekelilingnye, dan nggali sikok lubang unjuk memeras anggur, dan mbangun sikok menarta pengawas. Laju, die nyiwekannye ke penggarap-penggarap ume dan pegi ke luah negeri. ² Waktu musim panen, die ngihim suhang babu ke para penggarap ume itu unjuk nerime ndai dieuhang hasil ume anggurnye. ³ Tapi, dieuhang menangkap babu ituy, dan bagalinye, laju mengusirnye nggok tangan kosong. ⁴ Karne itu, die ngihimkan agi babu lainnye ke dieuhang, dan dieuhang mbagali palaknye, dan memperlakukannye nggok care yang malukan. ⁵ Laju, die ngihim babu lainnye dan dieuhang mbunuhnye. Hal ini tejadi ke banyask lainnye, sepiyak dibagali, dan sepiyak dibunuh. ⁶ Tuan ume itu maseh mpunyei sikok agi, jelahlah anak yang dikasihinye. Akhirnye, die ngihimkan anaknye itu ke diuhang dan ngumung, "Dieuhang nak menghormati anakku." ⁷ Tapi, para penggarap ume itu ngumung sikok nggok yang lain, "ini jelahlah ahli warisnye. Pehlah, kite bunuh die dan warisannye nak jadi uman dihi." ⁸ Laju, dieuhang nangkapnye dan mbunuhnye, laju nguntalkannye ke luah ume anggur. ⁹ Ape yang nak digawikan tuan ume anggur itu? Die nak datang dan membinasakan para penggarap itu dan ngenjukkan ume anggurnye ke yang lain. ¹⁰ Lum pernahkan ngan membace ayat kitab suci ini." Batu yang dibuang oleh tukang bangunan, lah jadi batu penjuru. ¹¹ Ndielah penggawian Tuhan, dan penggawian ini ajaib dimate dihi?" ¹² Laju, dieuhang beupaye unjuk nangkap-Nye, tapi dieuhang ngehi ke jeme rami karne dieuhang pacak men Yesus nyampaikan perumpamean itu unjuk dieuhang. Laju, dieuhang ninggalkan Yesus dan pegi. Tentang Membayah Pajak ¹³ Laju, dieuhang ngajung datang ke Yesus bebehape jeme Farisi dan jeme-jeme Herodian unjuk menjebak Die nggok umungan-Nye diwek. ¹⁴ Dieuhang datang dan ngumung ke Yesus, "Guru, kami pacak amun kamu benah dan dekde peduli nggok pendapat jeme lain. Dikarnekan, Kamu dekde nginak penampilan jeme tapi ngajahkan bakal Allah yang sesuai nggok kebenahan. Apekah benah membayah pajak ke Kaisar ape dekde? ¹⁵ Nak bayah nian ape kamini ape dekde nak bayah nian? Tapi Yesus, sesude pacak kemunafikan dieuhang, Die ngumung ke dieuhang, "Ngape ngan nguji Aku? Kundang ke Aku 1 dinar dan bialah Aku nginaknye." ¹⁶ Laju, dieuhang ngundangnye, dan Yesus ngumung ke dieuhang, "Gambar dan tulisan sapekah ini?" Dieuhang nimbali-Nye," Gambar dan tulisan kaisar. ¹⁷ Laju, Yesus ngumung ke dieuhang, "enjukkan ke kaisar hal-hal yang jadi umankaisar dan ke Allah hal-hal yang jadi uman Allah." Dan, dieuhang heran ke Yesus. Pertanyean Jeme Saduki Unjuk Menjebak Yesus ¹⁸ Laju, jeme-jeme Saduki, yang ngumungkan bahwe ngado kebangkitan, datang ke Yesus dan betanye ke Die, Uji dieuhang, ¹⁹ "Guru, Musa menulis ke kite bahwe mun suhang jeme, yang mempunyei sanak jantan, mati dan ninggalkan suhang bini, tapi dekde ninggalkan anak, sanak yang jantan itu harus ngawini jande itu dan membangkitkan keturunan bagi sanaknye. ²⁰ Ade tujoh jeme besanakan. Sanak yang pertame ngambek suhang bini, dan waktu die mati, die dekde ninggalkan keturunan. ²¹ Laju, sanak yang kedue ngawini betine itu, dan mati tanpa meninggalkan keturunan. Makitu pule nggok sanak yang ketige. ²² Dan, ngado ndai ketujoh besanak itu yang ninggalkan anak. Akhir ndai segalenye, betine itu mati pule. ²³ Di ahi kebangkitan, waktu dieuhang bangkit, jadi bini, siapekah betine itu? Dikarnekan, ketujoh besanak itu lah jadikannye bini. ²⁴ Yesus nimbali dieuhang, "Bukannye inilah alesan ngan jadi sesat, karne ngan dekde ngerti kitab suci ataupun Kuase Allah? ²⁵ Dikarnekan, waktu dieuhang bangkit ndai antare jeme mati, dieuhang ngado yang kawin ataupun dikawini, tapi dieuhang jadi lok pare malaikat di surge. ²⁶ Tentang jeme-jeme mati yang dibangkitkan, dekdekah ngan mbace dalam kitab Musa, di bagian tentang semak belukar, makmane Allah ngumung ke die, Aku jelahlah Allah Abraham, dan Allah Ishak, dan Allah Yakub? ²⁷ Die kannye Allah jeme mati, tapi Allah jeme yang idup. Ngan lah sesat nian!" Perintah Yang Paling Penting ²⁸ Laju, salah sikok ndai para ahli Taurat datang dan nganing dieuhang bedebat. Waktu die nginakmen Yesus lah nimbal dieuhang nggok ilok, men die betanye ke Yesus, "Perintah mane yang paling penting ndai segalenye?" ²⁹ Yesus nimbal, "hukum yang paling utame jelahlah: 'Aning, woi jeme-jeme Israel! Tuhan Allah kite jelahlah sikok-sikoknye Tuhan. ³⁰ Dan, kesianilah Tuhan Allah ngan nggok segenap hati ngan, dan nggok segenap jiwe ngan, dan nggok segenap pikiran ngan, dan nggok segenap kekuatan ngan. ³¹ Dan, yang kedue jelahlah: 'Kesianilah sesame ngan lok badan ngan diwek.' Ngado hukum yang lebeh besak ndai pade ini." ³² Laju, Ahli Taurat itu ngumung ke Yesus, "Kamu benah, Guru. Kamu benah nggok ngumungkan men Die itu sikok, dan ngado yang lain selain Die. ³³ Dan, ngasihi-Nye nggok segenap ati, dan nggok segenap pengertian, dan nggok segenap kekuatan, serta mengasihi sesame lok badan diwek, memang lebih penting ndai segale kurban bakaran dan persembahan. ³⁴ Laju, waktu Yesus nginak men jeme itu nimbal nggok bijaksane, Die ngumung ke die, "Kamu dekde jauh ndai kerajaan Allah." Sesude itu, ngado agi jeme yang behani betanye ke Yesus. Kristus Jelahlah Tuhan ³⁵ Dan, sambil ngajah di Bait Allah, Yesus ngumung, "Makmane pacak ahli-ahli Taurat ngumung men Kristus jelahlah anak Daud? ³⁶ Daud diwek ngumung di dalam Roh Kudus, Tuhan ngumung ke Tuanku: Cugoklah di sebelah kanan-Ku, sampai Aku nempatkan musuh-musuh-Mu di bawah keting-Mu. ³⁷ Daud diwek nyebut Kristus sebai 'Tuhan'. Jadi, makmane mungkin Kristus jelahlah anaknye? "Dan, jeme rami nganingkan-Nye nggok senang. Sikap Terhadap Ahli-Ahli Taurat ³⁸ Dalam pengajahan-Nye, Yesus ngumung, "Ati-atilah terhadap ahli-ahli Taurat, yang galak bejalan-jalan makai jubah panjang dan galak nerime salam penghormatan di badah-badah umum. ³⁹ Dan, mpunyei badah cugok terhormat di Sinagoge-sinagoge dan di badah-badah kehormatan dalam perjamuan-perjamuan. ⁴⁰ Dieuhang yang merampas humah-humah para jande dan sebagai dalih bedo'a yang panjang-panjang. Dieuhang nak dapatkan hukuman yang lebih behat." Persembahan Sejati ⁴¹ Laju, Yesus cagok behadapan nggok kotak persembahan dan ngamati jeme-jeme yang memasukkan duit ke dalam kotak persembahan itu. Banyak jeme kaye yang memasukkan dalam jumlah besak. ⁴² Laju, suhang jande miskin datang dan memasukkan due keping duit logam, yang senilai nggok 1 sen. ⁴³ Laju, Yesus ngantau murid-murid-Nye dan ngumung ke dieuhang, "Aku ngumungkan yang sebenahnye ke ngan, jande miskin ini lah masokkan lebih banyak ke dalam kotak persembahan itu ndai segale jeme lainnye. ⁴⁴ Dikarnekan, segale dieuhang ngenjuk ndai kelimpahan dieuhang, tapi jande miskin itu, ngenjuk ndai kemiskinannye, ngenjuk segale yang die punye, yaitu segale nafkahnye."