¹ Dan, waktu dieuhang hampai sampai di Yerusalem, parak Betfage dan Betania, di bukit Zaitun , Yesus ngajung due murid-Nye. ² dan ngumong ke dieuhang, "Pegilah ke dusun di adapan ngan, dangancang sesude ngan masokinye, ngan nak tegah sikok keledai mude yang tekebat, yang belum pernah dinaiki jeme. lepaskelah keledai itu dan kundanglah. ³ Amun ade jeme yang betanye ke ngan, "ngape ngan nggawikannye?",umongkan," Tuhan mbutohkan keledai itu dan nak ngihimnye agi kesini," ⁴ laju, dieuhang pegi dan negah sikok keledai mude yang tekebat di lawang, di luah, di bakal, laju dieuhang melepasnye. ⁵ Bebehape jeme yang tegak di sane betanye ke dieuhang, "pedie yang ngan gawikan nggok melepaskan keledai itu?" ⁶ dieuhang nimbal lok yang sude Yesus umongkan kedieuhang, dan jeme-jeme itu mbiarkan dieuhang pegi, ⁷ laju dieuhang ngundang keledai itu ke Yesus, mbatakkan jubah dieuhang di pucuk keledai itu, dan Yesus cugok di pucuknye. ⁸ Dan, rami jeme mbetangkan jubah dieuhang di bakal, dan yang lainnya naburkan ranting-ranting yang dieuhang tetak ndai ume. ⁹ Rami jeme yang berjalan di adapan dan yang milai berseru, "hosana"! diberkatilah Die yang datang dalam nama Tuhan. ¹⁰ Diberkatilah kedatangan kerajaan Daud, puyang dihi! hosana, di badah yang mahatinggi!". ¹¹ Laju, Yesus masok ke Yerusalem dan pegi ke Bait Allah! dan sude nginak segale setue di sekitarnye, die pegi ke Betania rembak kedue belas murid-Nye karne ahi sude dalu. (Yesus Nyumpahi Pohon Ara) ¹² Dan, gisoknye, waktu Yesus ninggalkan Betania, Yesus mehase lapah. ¹³ Sude nginak sikok pohon Ara yang berdaun ndai kejauhan, Die pegi unjok nginak kalu kian ade setue yang pacak Die tegah, ndai pohon itu waktu Die sampai di pohon itu, Die dekde tegah ape kian kecuali daun-daunnye dikarnekan waktu itu kanye musem biji Ara. ¹⁴ Karne itu, Yesus ngumong ke pohon itu, "ndalah ada agi jeme yang pernah makan biji ndai ngan unjok selame-lamenye. "dan, murid-murid-Nye nganing. ¹⁵ Laju, dieuhang sampai ke Yerusalem, dan, Yesus masuk ke Bait Allah dan mulai ngusir jeme-jeme yang dang bejualan di Bait Allah, Die nengkalupkan mija-mija penukar duit dan bangku-bangku jeme yang njualkan burung-burung merpati. ¹⁶ dan Die dekde agi ngizinkan jeme ngundang barang-barang melalui Bait Allah. ¹⁷ Laju, Yesus mengajah dieuhang dan ngumong, "kannye tertulis, "humah-Ku nak dikatekan humah doa unjok segale bangse? tapi, ngan sude ngubahnye njadi sarang maling". ¹⁸ dan imam-imam palak dan ahli-ahli Taurat nganingnye dan dieuhang nyakah care makmane mbunoh-Nye, dikarnekan, dieuhang ngehi ke Die karne jeme rami itu kagum akan ajahan-Nye. ¹⁹ Dan, waktu ahi mulai dalu, Yesus dan murid-murid-Nye ninggalkan kota itu. ²⁰ Laju, pagi-pagi waktu dieuhang lalu, dieuhang nginak pohon Ara yang sude kehing seakah-akahnya. ²¹ Petrus tehingat dan ngumong ke Yesus, "Rabi, kinak! pohon Ara yang Kamu sumpahi sude jadi kehing!" ²² Dan, Yesus nimbali dieuhang, "punyeilah iman di dalam Allah". ²³ Aku ngumongkan yang sebenarnye ke ngan, sape kian yang ngumong ke gunung ini, terangkatlah dan teuntallah ke dalam laut! dan ngado keraguan dalam atinye, tapi pecaye bahwe ape yang die umongkan nak terjadi maka hal itu nak tejadi ke die. ²⁴ Karne itu, Aku ngumong ke ngan, ape kian yang ngan doakan dan mintak, percayelah bahwe ngan sude nerimenye. Maka hal itu nak dienjukkan ke ngan. ²⁵ Dan, amun ngan tegak dan bedoa, maafkelah amun ngan nyimpankan setue ke jeme lain, mangke bapang ngan yang ade di Surge juge nak maafkan keselahan-kesalahan ngan. ²⁶ tapi, amun ngan dekde maafkan, bapa ngan yang ade di Surge pule dekde nak maafkan kesalahan-kesalahan ngan. ²⁷ Laju, dieuhang datang agi ke Yerusalem, sementara Yesus bejalan di Bait Allah, imam-imam palak, ahli-ahli Taurat, dan tue-tue Yahudi datang ke Die. ²⁸ Dan, dieuhang ngumong ke Die, "nggok kuase pedie kamu pacak nggawikan hal-hal itu, ape siape yang ngenjuk ke kamu kuase unjok nggawikannye?" ²⁹ Yesus ngumong ke dieuhang, " Aku nak betanye sikok pertanyean ke ngan. timbalilah Aku, mpai Aku enjuk tau ke ngan nggok kuase pedie aku pacak nggawikan hal-hal itu. ³⁰ Apekah baptisan Yohanes berasal ndai Surge ape ndai manusie? timbalilah Aku!". ³¹ Dieuhang berembuk suhang same lain nggok ngumong, "mun dihi nimbal, "ndai Surge", Die nak ngumong, laju, ngape ngan dekde percaye ke-Die?". ³² tapi, mun dihi nimbal, 'ndai jeme'? para pemimpin itu ngehi ke jeme rami karne dieuhang gale nganggap Yohanes benah-benah suhang nabi. ³³ Karne itu, dieuhang nimbal Yesus, "dihi dekde tau, "laju, Yesus ngumong ke dieuhang, "makitu pule Aku, Aku pule dekde nak ngenjuk tau ke ngan nggok kuase pedie Aku nggawikah hal-hal itu".