¹ Mba, metuh ilro manyo hocoh nuk Yerusalem, doni Betfage mba Betania, nuk kolrong Zaitun. Yesus nyuhu duo murid-E. ² pander umba ilro, "tulrak nokuh desa jo nuk taharepmu, mba tulrus sajadi iko maname. Iko akan nyombang ico keledai bio jo tapotong, jo joham puji kana jakat ulrun. Ngalapase nai keledai jo mba ingomi. ³ Amun toko ulrun jo ngisok mba iko, “ombai iko nguaie?” Mander, “Tuhan mamerlu keledai jo mba akan tulrus mangirim halrulri unuk ahi.” ⁴ Limbas jo, ilro tulrak mba nyombang ico keledai bio jo tapotong nuk atop, nuk hilra luar, nuk jalran. Limbas jo ilro ngalapase. ⁵ Tongai ulrun jo tomok nuk anai ngisok ilro, "narai jo kanguan dengan ngalapas keledai jo?" ⁶ Ilro mutah dengan narai jo jadi Yesus mander umba ilro, mba ulrun-ulrun jo ngambiar ilro tulrak. ⁷ Limbas jo, ilro ngomin keledai ijo mba Yesus, nikas jubah ilro nuk diang keledai mba Yesus tuot diange. ⁸ Mba, aro ulrun ngacang jubah ilro nuk jalran, mba jo bokon'e nyakah pating-pating jo ilro notok bara umo. ⁹ Ulrun aro jo nyalaran nuk taharep mba jo manganyak berseru, "Hosana! Kana berkat Iyo jo lromut suang aran Tuhan. ¹⁰ Kana berkat palromut Karajaan Daud, tahto umbuh ito! Hosana, unuk jo mahakatung!" ¹¹ Umot jo, Yesus tame suang Yerusalem mba tulrak nokuh bait Hatalla. Mba sajadi noto rang aang nuk sakaliling'e, Iyo tulrak nokuh Betania homboh kaduo balras murid-E hawi ondo jadi sohit. ¹² Mba, ondo hawun'e, metuh ilro notah Betania, Yesus ngomo balruo. ¹³ Sajadi noto ico batang ara jo hadaun bara macu, Iyo tulrak ahkan noto amun mungkin toko aang jo tuo Iyo nyombang bara batang jo. Metuh Iyo hocoh nuk batang jo, Iyo eyam nyombang narai-narai suali daun-daun'e hawi metuh ijo bokon musim buah ara. ¹⁴ Hawi jo, Yesus pander umba batang jo, "ara toko hino ulrun jo puji kuman bua bara iko ahkan katahi-tahi." Mba murid-murid-E mangonih. ¹⁵ Umot jo, ilro hocoh nuk Yerusalem. Mba, Yesus tame unuk Bait Hatalla mba napara ngambuho ulrun-ulrun jo honong bajual bapolri nuk Bait Hatalla. Iyo nakalrik meja-meja panakori duit mba kursi-kursi ulrun jo manjual bulrung-bulrung merpati, ¹⁶ mba Iyo kia ngambaja ulrun ngomin balrang-balrang nakalrou Bait Hatalla. ¹⁷ Umot jo, Yesus mangajar ilro mba pander, "eyamkah tatulis, 'lropoKu, ahkan sanyewut lropo doa bagi uras bangsa'? Ahkan tapi, iko jadi ngubahe manjadi totai tanyamun. ¹⁸ Mba, imam-imam ketua mba ahli-ahli Taurat mangonih'e mba ilro ngurah cara bakolro munu-E. Hawi, ilro mikoh umba-E hawi ulrun aro jo kagum ahkan pangajaran-E. ¹⁹ Mba, metuh ondo napara sohit Yesus mba murid-murid-E notah kota jo. ²⁰ Limbas jo, susung-susung metuh ilro nuk nakalrou, ilro noto batang ara jo jadi tojah sapai nuk uhat-uhat'e. ²¹ Petrus taingat mba pander umba Yesus, "Rabi, nohto! Batang ara jo ihko ngutuk jadi tojah!" ²² Mba, Yesus mutah ilro! Tepuilah iman nuk suang Hatalla." ²³ Aku mander jo sabujur'e ahkammu, iyai bewei jo bapander umba gunung ihi, 'taangkat mba tasakah unuk laut,' mba eyam toko karaguan nuk suang atoi'e, tapi parcaya amun narai jo Iyo mander ahkan manjadi, maka hal ijo ahkan manjadi mba Iyo. ²⁴ Hawi jijo, Aku bapander umba iko, narai bewei jo indoakan mba sanyawot, parcaya amun ihkai jadi narima'e, maka hal jo ahkan tanonga ahkammu. ²⁵ Mba, amun iko tomok mba badoa, mangampuni amun iko mangina aang taharep ico beti, supaya amaimu toko nuk surga kia ahkan mangampuni kasalram-kasalrammu. ²⁶ Tapi, amun iko eyam mangampuni, amai mu jo toko nuk surga kia eyam akan mangampuni kasalram-kasalrammu." ²⁷ Limbas, ilro lromut hino unuk Yerusalem. Sapandehan Yesus nyalran nuk Bait Hatalla, imam-imam Katua, ahli-ahli Taurat, mba tua-tua Yahudi lromut umba-E. ²⁸ Mba, ilro bapander umba-E, "dengan kuasa narai Iko nguan hal-hal jijo, atawa iyai jo nonga Iko kuasa ahkan nguai'e?" ²⁹ Yesus bapander umba ilro, "Aku ahkan bakisok ico pakisok umba ko. Mutahlah Aku, halrun aku mara'e dengan kuasa narai Aku nguan hal-hal jijo. ³⁰ Inon baptisan Yohanes baasal bara surga atawa bara kalrunon? Mutahlah Aku!" ³¹ Ilro ngambahas ico umba je bohkon dengan bapander, "amun ito mutah, ‘bara surga’ Iyo ahkan bapander, ‘limbas jo, ombai iko eyam parcaya umba-E?’ ³² Ahkan tapi, amun ito mutah, ‘bara kalrunon’?" Kawan pamimpin jijo mikoh umba ulrun aro hawi ilro uras maanggap Yohanes bujur-bujur ico ulrun nabi. ³³ Hawi jijo, ilro mutah Yesus, "ihkai eyam taai.” Limbas, Yesus bapander umba ilro, "konoi kia Aku, Aku kia eyam ahkan mara mba dengan Kuasa inon Aku nguan hal-hal jijo."