¹ Uleh sabab dakoh, karna te' nga gatnngataman kat iman, maka ite' laka badamai nige' Jabata nabo' Tuhan ite', Kristus Yesus; ² nabo' Ini', ite' katn pagala' maruh nuju iman wa' anugerah Jabata da mati' jadi dampar ite' agutn, ge' ite' barepo ate sadatn pangharapan kamuliaan Jabata. ³ Ti' hanya dakoh, ite' uga barepoate ka sadatn penderitaan da ite' misa' karna ite' pane bahwa penderitaan diah ao' ngasel katekunan, ⁴ katekunan ao' ngasel karakter da tahan uji, ge' karakter da tahan uji ao' ngasel pangharapan, ⁵ ge' pangharapan kati' ao' umas kecewa, sabab kasih Jabata nga gatnnuntokng ka sadatn ate ite' nabo' Roh Kudus da nga gatnngarunia wa' ite'. ⁶ Jangkah ite' maseh lamah, Kristus kabis ya' ayo sok durhaka wa' waktu da tapat. ⁷ Sabab, jarang ani sok da ituh kabis ya' sok da taman, biarpun mungkin ani uga' sok da ituh kabis ya' sok da bait. ⁸ Namun, Jabata ngadu kasih-A nyata wa' te', bahwa jangkah ite' maseh jadi penduse, Kristus kabis bagi ite'. ⁹ Rabeh umpat dakoh, ngalaka gatnngataman kat daya'-A, ite' ao' gatnnganyelamat umpatn murka Jabata nabo' iman. ¹⁰ Sabab, jangkah ite' maseh jadi munsuh Jabata, ite' nga gatnngedamai nige' Jabata nabo' pangkabis Anak-A, rabeh-rabeh agi' mati' karna ite' nga gatnngadamai nige'- Ini'. Ge' kenyataan bahwa mati' ite' nga gatnngadamai nige' Jabata, maka ite' uga' pasti gatnnganyelamat nabo' idup-A. ¹¹ Nya dakoh sadi', ite' uga babangga ka sadatn Jabata nabo' Tuhan ite' Yesus Kristus, da nabo'-A ite' mati' kaatn pendamaian Jabata. Kabis Nabo' Adam, Idup Nabo' Kristus ¹² Karna dakoh, ulah duse nga maruh ka sadatn dunia diah nabo' Nyungan sok ge' maut maruh nabo' duse, lakoh uga' maut nyabar wa' smaan sok karna smaan a' nga baduse. ¹³ Sabab, duse nga ani ka dunia katinga Hukum Taurat Musa ani, tatapi duse kati' gatn Jabata ngitong selama kati' ani Hukum Taurat. ¹⁴ Mun ladakoh, maut bakuasa mule zaman Adam sampe Musa, bahkan tumukng ayo sok da kati' umas duse ulah da gatn Adam umas, da anilah gaya umpatn Ini' da ao' utukng. ¹⁵ Tapi, pamangkatn Jabata dakoh ti' nyabanding nige' duse. Sabab, sak uleh duse nyungan sok, karah sok nga kabis, maka marabeh agi' karunia umpatn Jabata ge' pamangkatn nabo' karunia nyungan Sok dakoh, kohta Kristus Yesus. ¹⁶ Ge', anugerah kati' ulah akibat umpatn duse danyungan dakoh. Sabab panghakiman atas nyabuah palanggaran ao' minsakng hukuman, tatapi anugerah atas karah palanggaran minsakng pembenaran. ¹⁷ Sak karna duse nyungan sok, maut bakuasa atas nyungan sok dakoh, apalagi ayo sok da narima kalimpahan anugerah ge' karunia kabenaran ao' memerintah ka sadatn kaidupan nabo' nyungan Sok dakoh, dakohtalah Kristus Yesus! ¹⁸ Jadi, samu' ulah nabo' nyiteng pelanggaran smaan sok narima hukuman, ladakoh uga' uleh parbuatan kabenaran nyungan sok pula smaan talino narima idup ge' pambenaran. ¹⁹ Karna kakati'taatan nyungan sok, karah sok jadi penduse. Tapi, karna kataatan nyungan Sok, karah sok ao, gatnngataman. ²⁰ Hukum Taurat gatnnambah supaya duse batambah karah. Tapi, ka tampat duse mangkin karah, anugerah ao' semangkin marabeh-abeh, ²¹ supaya samu' ulah duse bakuasa ka sadatn maut, kasih karunia uga' bakuasa nabo' kebenaran da mimpin wa' idup kekal ka sadatn Kristus Yesus Tuhan ite'.