¹ Sak ladakoh, jailah kalabihan sok Yahudi? Ato, jailah kauntongan'a baturih? ² Karah ata, sadatn jai hal pun; tarutama, ka ayoa' da gatn firman Jabata macaya. ³ Lalu, sak mani ungan sok kati' pacaya, jailah kakati' pacayaan ayoa' mambatal kasetiaan Jabata? ⁴ Sama sakali kati'! Jabata anilah taman sakalipun satiap sok anilah pangakal. Samu ge' da tatulis: "Imu' tabukti taman sadatn nyansanamu', ge' imu' ao' manang sak talino manghakim-Mu'." ⁵ Tapi ao'a, sak kakati'tamanan ite' justru nampil kabanaran Jabata, jai da harus ite' muji'? Kaatan'a ite' nyansana bahwa Jabata nige' kati' adil laka ngukum ite'? ( Iko' muji ladiah sabage nyungan talino) ⁶ Sama sakali kati'! Sak daladakoh, langkina jabata abak ngakim dunia? ⁷ Tapi ao'a, sak nabo lacehko', kabanaran Jabata samangkin ngamulia-A, jailah iko' masih gatn ngakim ulah nyungan panduse? ⁸ Ge', (samu ge' da gatn mani ugan mitnah ka kai) Jai kati' muji', "Kai, ite' umas da jahat supaya da bait muncol umpatn kajahatan dakoh. "Ayoa' da muji' samu dakoh pantas gatn ngukum! Samaan Sok Gatn Duse Nguasa ⁹ Lalu jai? Ania ite' labih bait umpatn sok laitn? Sama sekali kati'! Sabab, kai ngalaka muji' idu bahwa bait ayo sok Yahudi atopun sok da inya Yahudi, madi' kasaroh duse. ¹⁰ Samu ge' da tatulis, "Kati' ani nyunganpun da umas da taman, nyungan pun kati'. ¹¹ Kati' ani nyungan pun da ba akal budi. Kati' ani nyungan pun da najo Jabata. ¹² Samaan sok laka malik umpatn Ini', ayoa' samahu-mahu jadi kati bagune. Kati' ani nyungan pun da umas da bait, kati' nyungan pun." ¹³ " Parukong ayoa' samu ge' sibur da ngangak, rata' ayoa' ngarayu-rayu, racun nipa da babisa ani ka saroh bibih ayoa'." ¹⁴ " Baba' ayoa panhu kutukan ge' kapahitan." ¹⁵ "Kaja' ayoa' capat nuntokng daya. ¹⁶ Kasusahan ge' kahancurn ani ka gala' ayoa'. ¹⁷ Ge', ayoa' kati' pane langkina idup sadatn damai." ¹⁸ "Buut ao' Jabata kati' ani ka tura matu ayoa'." ¹⁹ Mati' ite' pane bahwa jai pun da gatn muji' wak Hukum Taurat, gatn nyadia bagi ayoa' da madi' ka saroh Hukum Taurat sahingga takatup ta satiap baba', ge' dunia madi' ka saroh panghakiman Jabata. ²⁰ Kati' ani talino da kaatn gatn ngataman ka hadapan Jabata nige' malaku Hukum Taurat karna justru nabo Hukum Taurat dakoh utukng panganalan duse. Jabata ngangkataman Talino Nabo Iman ka Yesus Kristus ²¹ Tapi ao'a mati', tampa Hukum Taurat, kabanaran Jabata laka gatn nganyata, ge' gatn nganyaksi nabo Kitab Taurat ge' ayo nabi. ²² Malah katamanan Jabata nabo iman ka Kristus Yesus gatn nyadia bagi samaan sok da pacaya, karna kati' ani parbedaan; ²³ Sabab samaan sok laka baduse ge' laka kahilangan kamuliaan Jabata, ²⁴ ge' gatn ngataman wak kasih karunia-A nige' cara sia-sia nabo panabusan ka sadatn Yesus Kristus; ²⁵ da ngalaka Jabata nganyata'a nige' cara tabuka sabage gala' pandamaian sadatn daya'-A nabo iman. Hal diah ya' nampil kaadilan-A, karna sadatn kasabaran-A, Jabata laka mambiar duse-duse da idu' tajadi. ²⁶ Hal dakoh uga gatn maksud ya' nampil kaadilan-A ka masa diah supaya Ini' tabukti taman ge' ngangkataman sok da baiman ka Yesus. ²⁷ Jadi, kadumelah kamagahan adup ite'? Laka gatn nganyingkir! Kat hukum jai? Kat hukum parbuatan ite'? Inya, tapi kat hukum iman. ²⁸ Karna dakoh, diah ta da ite' pacayai, bahwa talino gatn ngataman ka hadapan Jabata nabo iman, inya umpatn parbuatan-parbuatan da badasar ka Hukum Taurat. ²⁹ Ato, anita Jabata hanya Jabata ya' bangsa Yahudi sadi'? Inyata Ini' uga anilah Jabata ya' bangsa da inya Yahudi? Ai'! Ya' bangsa da inya Yahudi uga, ³⁰ karna Jabata hanya nyiteng ge' Ini' ao' ngangkataman ayo sok da baturih kat iman, ge' da kati' baturih nabo iman. ³¹ Jadi, anita kai ngalulup Hukum Taurat nabo iman? sakali-kali kati'! Sabalik'a, kai justru nganaguh Hukum Taurat .