¹ Narimalah sok da lamah iman a', tatapi inya ya' ngole' pandapat a'. ² Ani sok da yakin bahwa ini' buleh uman smaan jenis pangkuman, tatapi sok da lamah iman a' hanya uman apu-apu. ³ Sok da uman iya'lah manghina sok da kati' uman, ge' sok da kati' uman iya' manghakim sok da uman, sabab Jabata nga narima ini'. ⁴ Asilah imu' singge imu' manghakim hamba sok laitn? Bait agutn atopun jantu', dakoh urusan tuan adup a'. Ge', ini' ao' agutn karna Tuhan aba' umas a' agutn. ⁵ Ani sok da nganggap nyiteng ano labih penting daripada ano da laitn, samantara da laitn nganggap smaan ano samu'. Satiap sok arus batol-batol yakin sadatn ate adup a'. ⁶ Ayoa' da menting ano da nga gatnnantu, ngadu a' penting ya' Tuhan. Ge', ayoa da uman, uman ya' Tuhan sabab ini' ngucap syukur wa' Jabata. Ladakoh uga' ayoa' da kati' uman, ayoa' kati' uman ya' Tuhan ge' ngucap syukur wa' Jabata. ⁷ Sabab, kati' nyungan pun umpatn ite' da iup ya' adup a' sadi'. ⁸ Sabab, sak ite' idup, ite' idup ya' Tuhan, ato sak ite' kabis, ite' kabis ya' Tuhan. Jadi, bait te' idup ato te' kabis, ite' anilah Tuhan umpu'. ⁹ Karna ya' dakohlah Kristus kabis ge' umpat idup, biar Ini' jadi Tuhan, bait wa' ayo sok kabis atopun ayo sok idup. ¹⁰ Tapi, jailah imu' manghakimi agemu'? Ato, kajai imu' mile' randah age;mu' nige' manghina a'? Sabab, ite' smaan ao' agutn manghadap tahta pangadilan Jabata. ¹¹ Sabab ani tatulis, "Uleh karna Iko' idup, firman Tuhan, satiap tukukng ao' nyambah wa'-Iko', ge' satiap rata' ao' ngako' wa' Jabata. ¹² Jadi, satiap ite' ao' mangkatn partanggungjawaban tentang umpu' adup a' wa' Jabata. Iya' umas Sok Laitn Baduse ¹³ Karna dakoh, iya'lah ite' saling manghakimi, tatapi labih bait batekad ya' kati' mana' panghalang ato nyabuah batu singkak bagi age' ite'. ¹⁴ Iko' panane ge' nga gatnngayakin sadatn Tuhan Yesus bahwa kati' ani tarutn jai pun da najis umpatn hal dakoh sadi', tatapi bagi sok da nganggap bahwa sagala tarutn anilah najis, maka hal dakoh najis bagi adup a'. ¹⁵ Sabab, sak ate agemu' talih karna tarutn da imu' uman, imu' kati' agi idup sasue kasih. Iya'lah imu' mambinasakan ini' nige' pangkumanmu' dakoh, karna Kristus uga nga kabis ya'dini'. ¹⁶ Karna dakoh, iya' mambiat jai da imu' anggap bait gatnfitnah sebage tarutn da jahe'. ¹⁷ Sabab Karajaan Jabta inyalah tentang uman ge' nyucur, tatapi tentang kebenaran, damai sejahtera, ge' sukacita sadatn Roh Kudus. ¹⁸ Sabab asi pun da malayan Kristus nige' cara diah berkenan wa' Jabata, ge' gatnhormat uleh talino. ¹⁹ Jadi, kaihlah ite' nalama' hal-hal da mangkutukng damai sejahtera ge' mantagutn nyiteng nige' da laitn. ²⁰ Iya' ngarusak pakaraje Jabata hanya karna pangkuman! Sagala tarutn halal, tatapi jahe'lah bagi sook da uman ge' da umas sok laitn baduse. ²¹ Labih bait kati' uman dagin ato nyucur anggur, ato umas hal laitn da umas agemu' tasingkak. ²² Nyintelah kayakinan da imu' umpu' ya' adupmu sadi' ka tura' Jabata. Babahagialah sok da kati' manghakimi umpu' adup a' tarhadap jai da ni' anggap bait. ²³ Tapi ao' a, sok da bimbang ao' gatnngukum sak ini' uman, karna ini' uman kati' badasarkan iman; ge' sagala tarutn da kati' baasal umpatn iman anilah duse.