¹ Kate'a lah samaan sok tunduk ka pamerintah da bakuasa ka samo'a barang kati ani pamerintah da kati brasal umpat'n Jabata, ge' ayo'a gat'n netap uleh Jabata. ² Uleh karna dakoh, asi pun da manantang pamerintah, ini' manantang katatapan Jabata, ge' ayo'a da manantang aok utukng hukuman ka samo adup'a. ³ Barang, pamerintah kati manyabab da buut ka sok da umas bait, tapi ka sok umas da jahe. Ituh ah imu' idup tanpa rasa buut tradap pamerintah? Umaslah jai da bait, ge' imu' aok kaat'n pujian umpat'n'a ⁴ barang ayo'a diu'ta palayan Jabata demi kabaitanmu'. Tapi aok'a, sa' imu' bulah jai da jahe, buutlah barang inya tanpa alasan pamerintah manyandang lading. Ayo'a diu'ta palayan Jabata, panuntut balas da bajalat'n murka Jabata ka sok da bulah da jahe. ⁵ Barang dakoh, imu' arus tunduk, inya hanya karna murka Jabata, tapi uga karna ate nurani. ⁶ Dakohlah sabab'a imu' uga mambayar pajak, barang ayo'a diu'ta para palayan Jabata da mangabdi adup'a ya' hal dakoh. ⁷ Mangkat'nlah ka samaan jai da arus imu' mangkat'n; pajak ka da berhak narima pajak, cukai ka da berhak narima cukai, rasa buut ka sok da berhak narima rasa buut, ge' hormat ka da berhak narima hormat. Nganyayang Sok Lait'n diu'ta Hukum da Utama ⁸ Iya'lah barutakng jai pun ka asi pun, tapi kasihilah nyungan nige da lait'n barang sok da mengasihi samu ka adup laka memenuhi Hukum Taurat. ⁹ Barang, "Iya' bazina, iya' ngamis, iya' nangko, iya ngate, "ge' sa ani parintah lait'n, samaan'a laka tarangkup'm ka sadat'n parkataan diah, "Kasihilah samu ka adupmu' sadi." ¹⁰ kasih kati bulah da jahe ka samu talino. Barang dakoh, kasih diu'ta panggenapan Hukum Taurat. ¹¹ Demikian uga, imu' pane waktu'a bagimu' saat diah ya' umpat umpat'n pabuus; barang mati' kasalamatan laka labih riket bagi ite daripada waktu partama kali ite pacaya. ¹² Ngarum laka ite matat'n parbuatan-parbuatan da patakng ge' mana' parlangkapan sanjata tarakng. ¹³ Kaehlah ite idup nige sopan ulah pas waktu ano tano, inya ka sadat'n pesta pora ge' da mabuk, inya ka sadat'n pacabulan ge' hawa nafsu, ge' inya ka sadat'n badaru gae iri ate. ¹⁴ Tapi aok'a mana'lah Tuhan Yesus Kristus, ge' iya' marawat unganmu' ya muas kainginanmu'.