¹ Karna dakoh, karna kamurahan Jabata, Iko' nyurong imu', supaya imu' mamparsambah unganmu' sebage parsambahan da idup, da kudus ge' da berkenan wa' Jabata; dakohlah ibadahmu' da sejati. ² Iya'lah jadi samu' nige' dunia diah, tatapi barubahta kat pambaharuan akal budimu, singge imu' pane mambeda jai da jadi kahendak Jabata; jai da bait, da berkenan wa' Jabata, ge' da sampurna. ³ Sabab, nabo' anugerah da nga gatnmangkatn wa'iko', iko' nyansana wa' satiap sok ka antara imu' supaya iya' mikir hal-hal da labih nyamo daripada da arus ini' mikir, tatapi supaya bapikir jaranih sasue ukuran iman da nga Jabata mangkatn wa' masing-masing. ⁴ Sabab, ulah nyabuah ungan, ite' umpu' karah anggota, tatapi masing-masing kati' umpu' tugas da samu'. ⁵ Ladakoh ugalah te', walopun karah, tatapi anilah nyiteng ungan sadatn Kristus. Ge', masing-masing ite' anilah anggota bagi da latn. Karunia-Karunia Rohani ⁶ Ite' umpu' anugerah da babeda-beda sasue kasih karunia da gatnmangkatn wa' ite'. Sak ya' banubuat, baitta ite' bulah a' sasue nige' bagian iman ite'. ⁷ Sak ya' malan, baitta ini' malayan, ato sak ya' mangajar, baitta ini' mangajar. ⁸ Ato sak ya' manghibur, baitta ini' mangkatn panghiburan, sak ya' mangkatn, baitta ini' nige' murah ate mangkatn, sak ya' mimpin, baitta ini' mimpin nige' batol-batol, sak nyuak pamase', baitta ni' bulah a' nige' repo ate. Nasihat tentang Idup sadatn Kasih ⁹ Baitta kasih kati' pura-pura. Rusi'lah wa' da jahe', ge' bajintelah wa' jai da bait. ¹⁰ Baitta imu' saling mangasihi nige' kasih barage ge' saling nyantulu' sadatn mangkatn hormat, ¹¹ iya'lah karajinanmu' kandur, baitta imu' bamara-mara sadatn roh ge' layanlah Tuhan. ¹² Basukacitalah sadatn pangharapan, tabahlah sadatn kasasakan, ge' batekunlah sadatn doa! ¹³ Ngananglah naap bagian sadatn nyukup kapalaluan ayo sok kudus, barusahalah ya' nyua' base. ¹⁴ Mambrakatlah ayoa' da nganyayamu', mambarakatlah ge' iya' ngutuk! ¹⁵ Basukacitalah nige' ayoa' da basukacita, ge' munse'lah nige' ayoa' da munse'. ¹⁶ Mikirtalah hal da samu' nyungan ge' da laitn. Iya' damikir hal-hal da nyamo, malahan ngadaplah wa' ayo sok da randah. Iya' nganggap adupmu' bijaksana! ¹⁷ Iya' mambalas wa' nyungan pun kajahatan nige' kajahatan. Umaslah da bait ka tura' smaan sok. ¹⁸ Sak mungkin, sekira a' hal dakoh bagantong wa'imu', iduplah sadatn damai nige' smaan sok. ¹⁹ Age-ageko' da ko'nyayang, iya'lah adupmu' nuntut pambalasan, tatapi mangkatnlah tampat wa' pabaji' Jabata. Sabab ani tatulis, "Pambalasan anilah hak-Ko', Iko'lah da ao' mambalas a'," firman Tuhan. ²⁰ "Tapi ao'a, sak munsuhmu' siburuk, mangkatnlah ni' uman, ge' sak munsuhmu' aus, mangkatnlah ni' nyucur. Nige' umas diah, imu' ao' numpuk mara api ka tumukng aba' a'." ²¹ Iya'lah imu' kalah tarhadap kajahatan, tatapi ngalahmih kajahatan dakoh nige' dabait.