Lalu, bakumpurta ayo sok Farisi ngatte badaput nige' Yesus samahu ge' ani bamani ahli Taurat da utukng umpatn Yerusalem. ² Ge', ayoa' mile' ani bamani murid Yesus uman roti nige' barekng da kutor, ratia barekng da ti' na' meetn. ³ Sabab, ayo sok Farisi ge' smaan sok Yahudi kati' ao' uman sa' barekng ayoa' kati' gatnmeetn same ka galakng barekng karna tradisi nenek moyang da ayoa' minte. ⁴ Ge', sa' ayo sok Yahudi dakoh utukng umpatn tampat umum, ayoa' kati' ao' uman sa' tinga meetn barekng. Ge', karah agi' tradisi da laitna' da ayoa' narima ya' gatnmanjalan, ulah meetn cawan, kandi-kandi, ge' tapayatn-tapayatn tambaga. ⁵ Lakadakoh, ayo sok Farisi ge' ahli-ahli Taurat mansikatn wa' Yesus, "Jailah ayo murid-Mu kati' idup nurut tradisi nenek moyang, tapi malah uman roti nige' barekng da kutor?" ⁶ Yesus nyansana ka ayoa', "Yesaya banubuatvnige' taman manganai imu' da munafik, ulah da gatnnulis: 'Bangsa diah manghormat Iko' nige' bibih ayoa', tatapi ate ayoa' jauh umpatn Iko'. ⁷ Ayoa' nyambah-Ko nige' sia-sia karna ngajar ajaran parintah-parintah da gatn talino umas.' ⁸ Gae ngabai parintah Jabata, imu' minte kuat tradisi talino." Lalu, Yesus uga' nyansana wa' ayoa', "Nige' caradik imu' nulak parintah Jabata singge kaatn mampartahan tradisi adupmu sadi. ¹⁰ Sabab, Musa muji', "Hormatimih apa'mu' ge' ama'mu' ge', 'Asi saja da ngutuk apa' a' ato ama'a' arus gatnngukum kabis.' ¹¹ Namun, imu' muji' sa' ani nyungan da muji' wa' apa'a' ato ama'a', 'Jai saja kauntongan da ao' imu' kaatn umpatnko' anilah kurban, kohtalah parsambahan,' ¹² lalu imu' kati' agi' ngijin ini' umas jai pun ya' apa' a' ato ama'a', ¹³ nige' daladok imu' ngalaka mambatal firman Jabata nige' tradisimu' da nga turun-tamurun. Ge' imu' umas karah hal da samu' ulah dakoh." ¹⁴ Lakadakoh, Yesus maba' agi; smaan sok ge' nyansana wa' ayoa', "Dangahmih Iko', imu' smaan, ge' pahami uga. ¹⁵ Kati' ani tarutn jai pun umpatn sato talino daa maruh ka sadatn adup a' kaatn ngutor a', tatapi hal-hal da mungkas umpatn talinota da ngutor a'." ¹⁶ Sa' ani sok da umpu' rajak ya' dangah, tea'lah ni' dangaha'!" ¹⁷ Lalu, jangkah Yesus maruh ka ramin ge' ngagatn ayo sok dakoh, ayo murid-A mansikatn wa'-Ini' tentang parumpamaan dakoh, ¹⁸ Ge', Ini' nyansana wa' ayoa', "Ania imu' uga' kati' ngarati? Ti' a' imu' pane bahwa jai saja da umpatn sato maruh ka sadatn talino kati' ao' ngutor a'. ¹⁹ Sabab, da maruh dakoh ti' ao' maruh ka sadatn atea' tatapi putukng a', ge' lakadakoh mungkas ka sadatn jamban. (Nige' ladakoh, Yesus manyatakan bahwa smaan pangkuman halal.) ²⁰ Lalu Ini' nyansana, "Jai da mungkas umpatn talinota da ngadua' kutor. ²¹ Sabab, umpatn sadatn, umpatn ate talino, muncol pikiran-pikiran jahat, duse-duse seksual, parangko, pangamis, ²² perzinaan, kasarakahan, kajahatan, tipu daya, hawa nafsu, iri ate, fitnah, kasumbongan, ge' kabagaan. ²³ Smaan hal da jahat dakoh utukng umpatn talino, ge' dakoh ta da ngutora'." Iman Nyungan Mahu Siro Fenisia ²⁴ Umpatn tampat dakoh, Yesus umpat ge' anu ka rappo Tirus ge' Sidon. Ge' Ini' maruh ka nyabuah ramin ge' ti' ituh ani nyungan pun da pane, tatapi Ini' kati' bisa rapas umpatn parhatian. ²⁵ Segra ngalaka dangah manganai Yesus, nyungan mahu da anak mahua' karasukan roh najis utukng ge' sujud la kaja' Yesus. ²⁶ Mahu dakoh anilah sok Yunani, lahir ka Siro Fenisia. Ini' bamuhon ka Yesus ya' nguser sitan dakoh mungkas umpatn anak a'. ²⁷ Lakadakoh, Yesus nyansana w' mahu dakoh, "Tea'lah ayo kangot gatn ngadubasoh uru. Sabab, ti' bait naap roti da ya' kangot ge' nyangkahatna' ka ayo kasu'." ²⁸ Tapi, mahu dakoh naham ge' muji wa' Yesus, "Taman, Tuhan. Namun, ayo kasu' da ani ka saroh meja pun uman ga' bara'-bara' ayo kangot dakoh. ²⁹ Lalu, Yesus nyansana wa' mahu dakoh, "Karna imu' muji ladiah, imu' bisa boho. Sitan dakoh nga ngagatn anakmu'." ³⁰ Lakadakoh, mahu dakoh malik ka ramina' ge' badaput ge' anak a' agi' gurikng ka tampat pabuus, sadakng sitan dakoh nga boho. Sok da Bangal Gatnngangkauhatn ³¹ Lakadakoh, Yesus mungkas agi' umpatn wilayah Tirus ge' anu nabo' Sidon nuju ka timu' Galilea, ka wilayah Dekapolis. ³² Lalu, ayoa minsakng wa' Yesus sok da bangal da susah nyansana. Ayoa' bamuhon wa' Yesus ya' mana' barekng-A ka tumukng sok dakoh. ³³ Lakadakoh, Yesus minsakng sok dakoh nyingah adup umpatn kubu sok da karah. Ini' nyunsukng jari-A ka sadatn rajak sok dakoh, ge' ngalaka ngaruja', Ini' nyangkam rata' sok dakoh. ³⁴ Lalu, Yesus nyantunung ka samo rangit, Ini' narik singat angho ge' nyasana, Efata" ratia "Tatukasmih!" ³⁵ Saat dakoh uga', raja' sok dakoh tatukas, paningo' rata'a' tarapas, ge' ini' nyansana nige jalas. ³⁶ Ge', Yesus mingat ayoa' nyarita kajadian dakoh wa' asi pun. Tapi, samangkin Ini' mingat ayoa', ayoa' samangkin ngabar a'. ³⁷ Ayoa' batl-batol heran ge' nyansana, "Ini' nga umas jai sagala tarutn da bait. Ini' malahan umas sok da bangal dangah ge' sok da awa' nyansana."