¹ Pas nya'ano-ano dakoh, jangkah sajumlah aihyo sok bakumpul ge' kati umpu jai-jai yak gat'n uman, Yesus maba murid-murid-A ge' nyansana ka ayo'a, ² "Iko' bapamase ka sok karah dakoh barang mati' ayo'a laka samahu nige-Ko' salama taru ano, ge' kati umpu jai-jai yak gat'n uman. ³ Ge', sa' Iko' ngadu ayo'a ure ka ramin ayo'a ka sadat'n kaadaan saburuk, ayo'a aok pinsan ka sadat'n pagala barang mani ungan umpat'n ayo'a utukng umpat'n jauh." ⁴ Ge', murid-murid-A naham Ini', "Umpat'n ume sook bisa ngangkabasoh ayo'a nige roti wak tampat sepi ulah diah?" ⁵ Lalu, Yesus mansikat'n ka ayo'a, "Mani roti da imu' umpu?" Ayo'a naham "Ijo roti." ⁶ Laka dakoh, Yesus marintah sok karah dakoh unyung wak tana, ge' Ini' naap ijo roti dakoh, ge' ngucap syukur, ge' Ini' mucuh-mucuh'a, ge' mangkat'n'a ka murid-murid-A yak nyato'a ka sok karah. Ayo'a pun nyato'a ka sok karah. ⁷ Ge', murid-murid uga umpu iget ikat'n inek. Ngalaka ngucap syukur ka samo'a, Yesus ngadu murid-murid-A yak ngabagi'a uga ikat'n-ikat'n dakoh ka sok karah. ⁸ Sok karah dakoh uman sampe basoh, ge' ayo'a ngumpul santak pangkuman da tasisa dakoh ijo karanjang pahnu. ⁹ Ani kira-kira ampat ribu sok da uman. Ngalaka dakoh, Yesus ngadu ayo'a anu. ¹⁰ Lalu Yesus japat maruh parahu samahu murid-murid-A ge' sampe wak rapo Dalmanuta. Yesus Gat'n mahi Nujo Tande umpat'n Saruga ¹¹ Ge', ayo-sok Farisi utukng ge' mule badebat nige Yesus, gae mahi Yesus nujo tande umpat'n saruga, yak nyoba-A. ¹² Ngalaka Yesus ngila napas ahngo ka sadat'n Roh-A, Ini' nyansana, "Nyai generasi diah najo tande? Iko' muji' da sabanar'a ka imu', kati ani nyiteng pun tande da aok gat'n mangkat'n ka generasi diah." ¹³ Laka dakoh, Yesus ngagat'n ayo'a, maruh malik ka sadat'n parahu, ge' anu ka pajah. Ragi Sok Farisi Ragi Herodes ¹⁴ Murid-murid karimut minsakng roti, ge' hanya umpu nyasantak roti wak sadat'n parahu. ¹⁵ Ge', Yesus bapusut'n ka ayo'a, "Siap sedialah! Ba'ati-atilah tradap ragi ayo-sok Farisi ge' ragi Herodes." ¹⁶ Lalu ayo'a mule badiskusi nyungan nige da lait'n soal ayo'a da kati umpu roti. ¹⁷ Ge', ngalaka pane hal diah, Yesus nyansana ka ayo'a, "Nyai imu' nyansana tentang imu' da kati umpu roti? Jai imu' ti'nga uga pane ato ngarati? Jai atemu' da karas? ¹⁸ Jai ta imu' da bamatu, tapi kati mile? Ge', ba rajak, tapi kati dangah? Kati ingat ta imu', ¹⁹ Jangkah Iko' mucuh-mucuh rima roti yak rima ribu ungan, mani karah karanjang da baisi pahnu nige santak-santak pangkuman da imu' ngumpul?" Ayo'a naham, "Dua balas karanjang." ²⁰ "Ge', jangkah ijo roti yak ampat ribu ungan dakoh, mani karanjang da pahnu nige santak-santak pangkuman da imu' ngumpul?" Ayo'a naham, "Ijo karanjang." ²¹ Lalu, Ini' nyansana ka ayo'a, "Diu'ta imu' masih ti'nga ngarati?" Yesus Ngangkawhat'n Sok Buta wak Betsaida ²² Laka dakoh, Yesus ge' murid-murid-A utukng wak Betsaida. Ge', mani ungan sok minsakng sook buta ge' mahi ka Yesus supaya nyinte'a. ²³ Yesus pun nyinte barekng sok buta dakoh ge' minsakng'a mungkas desa. Lalu, Yesus ngaruja matu sok buta dakoh ge' mana barekng-A ka samo ini'. Ini' mansikat'n ka ini', "Diu'ta imu' mile tarut'n?" ²⁴ Lalu, sok dakoh namparu ka samo ge' nyansana, "Iko' mile ayo-sok, tapi ayo'a gat'n mile ulah puut'n-puut'n da sadakng bajalat'n." ²⁵ Ngalaka dakoh, Yesus mana' barekng-A wak samo matu sok dakoh agi, lalu sok dakoh muka matu'a, pamile'a awhat'n, ge' ini' pun kaat'n mile samaan nige jelas. ²⁶ Lalu, Yesus ngadu'a ure ka ramin'a nige nyansana, "Iya' maruh ka sadat'n desa." Yesus diu'ta Kristus ²⁷ Ngalaka dakoh, Yesus anu, samahu murid-murid-A, ka desa-desa wak Kaisarea Filipi. Ge', wak tuda pagala, Yesus mansikat'n ka ayo murid nige nyansana ka ayo'a, "Wat'n ayo-sok, asi Iko' diah?" ²⁸ Ayo'a naham, "Yohanes Pembaptis, da lait'n muji' Elia, ge' da lait'n'a salah satu umpat'n nabi-nabi." ²⁹ Laka dakoh, Yesus mansikat'n ka ayo'a, "Tapi, manurutmu', asi Iko' diah?" Petrus naham-A, "Akup'm diu'ta Kristus." ³⁰ Ge', Yesus mamparingat ka ayo'a yak kati mangkat'n pane ka asi pun tentang adup-A. Mangkat'n pane tentang panderitaan Yesus ³¹ Laka dakoh, Yesus mule ngajar murid-murid-A kalo Kangot Talino arus manderita karah hal ge' gat'n nolak uleh ama-ama Yahudi, imam-imam kapala, gae ahli-ahli Taurat, ge' gat'n ngamis, ge' ngalaka taru ano bangkit kambali. ³² Ge', Yesus nyansana hal diah sacara tabuka. Barang dakoh, Petrus narik Yesus ka suut'n ge' mule nagor-A. ³³ Tapi, gae nuleh ge' mile murid-murid-A, Yesus nagor Petrus ge' nyansana, "Anulah umpat'n-Ko', hei Iblis! Sa, imu' kati mikir parkara-parkara talino." ³⁴ Ngalaka dakoh, Yesus maba sok karah, gae murid-murid-A, ge' nyansana ka ayo'a, "Sa' sook ngate nganang IKo', ini' arus nyangkal adup'a sadi, ge' maha salib'a, lalu nganang Iko'. ³⁵ Sa', asi saja da ngate nyalamat singat'a aok kahilangan'a. Tapi aok'a, asi saja da ilang singat'a demi Iko' ge' Injil aok nyalamat'a. ³⁶ Sa', jai untong'a sook kaat'n samaan dunia, tapi ilang singat'a? ³⁷ Jai da kaat'n sook mangkat'n yak nabos singat'a? ³⁸ Sa', asi saja da mangun barang Iko' ge' firman-Ko' wak ganerasi da kati satia ge' baduse diah, maka Kangot Talino uga aok mangun ngako sok dakoh jangkah Ini' utukng ka sadat'n kamuliaan Sama'-A samahu nige malaikat-malaikat da kudus."