¹ Lakadakoh, Yesus anu umpatn teetn ge' utukng ka kota asal-A, ge' ayo murid-A nganang Ini'. ² Jangkah ano Sabat utukng, Yesus mule ngajar ka sinagoge. Ge', karah sok da dangah-A misa' heran, ge' nyansana, "Umpatn ume Ini' kaatn smaan hal dakoh? Hikmat jai da gatnmangkatn wa'-Ini' ge' mujisat-mujisat ulah dakoh gatnumas nige' barekng-A? ³ Inyata Ini' tukang kayu', anak Maria, ge' age Yakobus ge' Yoses ge' Yudas ge' Simon? Inyata age-age mahu-A ani kadiah samahu ite'? Lalu, ayoa' pun tawar ate ge' nolak Ini'. ⁴ Lakadakoh, Yesus nyansana wa' ayoa', "Ka ume-ume sok manghormat nyungan nabi, kacuali ka tampat asal adup a', ge' ka antara age adi' adup a', ge' ka ramin adup a'. ⁵ Maka, Yesus kati' kaatn umas mujisat ka teetn, kacuali mana' barekng-A ka tumukng nyamani sok anapm ge' ngangkauhatn ayoa'. ⁶ Ge', Ini' heran karna ayoa' kati tuh pacaya. Lakadakoh, Ini' anu bakalilikng ka kampong-kampong ge' ngajar. Yesus Ngutus Murid-Murid-A ⁷ Lakadakoh, Yesus maba' kadua balas murid ge; mule ngutus ayoa' badua-dua, ge' mangkatn ayoa' kuasa atas roh-roh da najis. ⁸ Lalu, Ini' mangkatn parintah wa' ayoa' supaya ayoa' kati' minsakng jai-jai sadatn paranu, kacuali hanya tungkat, tampa roti, tampa tas, tampa uang sadatn paningo' apakng ayoa', ⁹ tapi ngiak sandal ge' iya' ngiak dua pangiak. ¹⁰ Ge', Yesus muji' ka ayoa', "Ka dume saja imu' maruh nyabuah ramin, madi' lah ka teetn sampe imu' mungkas umpatn dakoh. ¹¹ Ge', sa' ani tampat da kati' nyamut imu' ge' kati' danggah mu', jangkah imu' anu ngimhar lah dabu umpantn kaja'mu' sebage nyabuah kasaksian bagi ayoa'." Lalu , ayoa' pun anu ge' ngabar bawa ayo sok arus bertobat . Maka, ayoa' nguser karah sitan ge' males karah sok da anapm nige' binyak , gae mangkauhatn ayoa' .Herodes dangah Barita manganai Yesus ¹⁴ Ge', Raja Herodes laka dangah a' , karna gaatn Yesus nga terkenal ,ge' sok nyansana, "Yohanes Pambaptis laka umpat umpatn antara sok kabis , maka mujisat-mujisat dakoh karaje ka sadatn Ini'. ¹⁵ Nyabagi muji' Ini' anilah Elia namun, nyabagi muji' Ini' anilah sok nabi , samu nige' nyungan ayo umpatn nabi. ¹⁶ Ao' ta, jangkah Herodes dangah hal dakoh, ini' nyansana, "Yohanes da laka iko' nyantak abak a', nga gatnngangkidup!" Yohanes Pambaptis Gatnngamis ¹⁷ Memang Herodes sadi' da laka ngadu sok, ngadu a' ya' nangkap Yohanes, ge' mangkasokng a' ka sadatn panjara demi Herodias sautn age a' da are, Filipus, karna Herodes laka bainyha' nige' Herodias. ¹⁸ Sabab, Yohanes ngamani kali muji' ka Herodes, "Kati' patut mu' naap sautn agemu'." ¹⁹ Oleh karna dakoh, Herodias mana' dendam tarhadap Yohanes ge' ngate ngamis a', tapi ini' ti' bisa. ²⁰ Sabab, Herodes buut wa' Yohanes ngalaka ini' pane bahwa Yohanes anilah sok taman ge' sok suci, ge' Herodes ngalinukng a'. Jangkah Herodes dangah Yohanes, ini jadi aru bingung, tapi Herodes auhatn ate dangah Yohanes. ²¹ Namun, utukngta ano da tapat, jangkah Herodes wa' ano ulang taun a' umas nyabuah paruman ya' pajabat-pajabat angho a', perwira-perwira a', ge' pamimpin-pamimpin Galilea. ²² Lalu jangkah anak mahu Herodias maruh ge' batari, ini' ngangkauhatn Herodes ge' ayoa' da uyung samahu a'. Ge', raja nyansana wa' mahu dakoh, "Mahimih jai saja da imu' ngate ge' iko' ao'mangkatn a' wa'imu'." ²³ Ge' Herodes basumpah wa'ini', "Jai saja da imu' mahi kaiko', ao' iko' mangkatn wa'imu', bahkan sampe nyasantak umpatn karajaanko'." ²⁴ Ge', dara dakoh anu ge' muji' wa' sino' a', "Iko arus mahi jai?" Sino'a naham, "Aba' Yohanes Pambaptis." ²⁵ Ge', ano dakoh uga nige' galabak-labak, dara dakoh utukng ka raja ge' nyansana, "Iko ngate mati' uga' imu' mangkatn wa'iko' abak Yohanes Pambaptis ka tumukng talam." ²⁶ Karna dakoh, raja jadi aru sedih, tapi karna nga basumpah ge' ayo sok da uman samahu a', ini' kati' bida nolak dara dakoh. ²⁷ Lalu, raja capat-capat ngirim nyungan algojo nige parintah ya' minsakng abak Yohanes, lalu algojo dakoh anu ge' nyantak abak Yohanes ka Panjara. ²⁸ Lakadakoh, ini' minsakng abak Yohanes ka tumukng talam ge' mangkatn a' wa' dara dakoh, ge' dara dakoh mangkatn a' wa' sino' a'. ²⁹ Ge', jangkah ayo murid Yohanes dangah a', ayoa' utukng ge' naap ungan Yohanes ge' mana'a' ka sadatn sibur. YesusMangkatn Pangkuman wa Labih umpatn Rima Ribu Sok ³⁰ Lakadakoh, ayo rasul bakumpur samahu nige' Yesus ge' muji' wa'-Ini' jai saja da laka ayoa' ngajar. ³¹ Ge', Yesus muji' wa' ayoa', "Kaehlah ngasing adup te' ka tampat da sepi ge' madi' sabantar." Sabab, ani karah sok da utukng ge' anu, ge' ya' uman pun kati' sampat. ³² Lalu, Yesus ge' ayo murid-A anu ngasing adup a' nige' parahu ka tampat da sepi. ³³ Ao' ta, sok da mile' ayoa' anu ge' kanal wa' ayoa. Ge', sok karah dakoh talama' samahu-mahu nabo' pagala' umpatn smaan kota, ge' utukng ka teetn nyantulu' Yesus ge' ayo murid-A. ³⁴ Jangkah Yesus anu ka tabikng dano, Ini' mile' ladakoh karah sok, ge' Ini' misa mase' wa' ayoa' ulah domba da kati' umpu' gembala. Maka, Yesus mule ngajar karah hal wa' ayoa'. ³⁵ Jangkah ano mule ngarum, ayo murid Yesus utukng wa' Yesus ge' muji', "Tampat diah tampat da sunyi' ge' nga tuhi' ngarum. ³⁶ Ngadulah ayoa' anu wa' kalilikng daerah ge' desa-desa supaya ayoa' mari tarutn ya' gatnuman. ³⁷ Tapi Yesus naham, "Imu'talah da mangkatn ayoa' uman." Ge', ayoa' nyansana wa'-Ini', "Arus a' kai anu ge' mari roti da bararga 200 dinar ge' mangkatn a' ya' ayoa' uman?" ³⁸ Yesus muji' wa' ayoa', "Nyamani roti da imu' umpu'? Anu ge' mile'ta!" Ngalaka ayoa' panane a', ayoa' muji', "Rima roti ge' dua ikatn." ³⁹ Lalu, Yesus marintah ayoa' smaan ya' unyung bakalompok-kalompok ka tumukng udu' ijo. ⁴⁰ Sok karah dakoh unyung bakalompok, ani da saratus ungan ge' ani da rima puluh ungan. ⁴¹ Ngalaka dakoh, Yesus naap rima roti ge' dua ikatn dakoh, nyantunung ka rangit, Ini' ngucap sukur ge' mucuh-mucuh roti dakoh, lalu Ini' mangkatn a' wa' murid-murid-A supaya nyato a' wa' sok da karah. Ini' uga' magi-magi dua ikatn dakoh wa' smaan sok. ⁴² Ge', ayoa' smaan uman sampe basoh. ⁴³ Lakadakoh, ayoa' naap dua balas bakul da panhu nige' kaba-kaba roti ge' ikatn. ⁴⁴ Ge', ani rima ribu are da uman roti. Yesus Bajalatn ka Tumukng Paitn ⁴⁵ Lakadakoh, Yesus lansong marintah ayo murid-A makka ka parahu ge' anu nyantulu'-A ka sabarang, ka Betsaida, samantara Ini' ngadu sok karah dakoh anu. ⁴⁶ Ngalaka bapamit nige' ayoa', Ini' anu ka bukit ya' badoa. ⁴⁷ Jangkah ano ngana ngarum, parahu madi' ka tuda' danau, ge' Yesus adup-adup-A ka dayu'. ⁴⁸ Ge', ngalaka mile' ayo murid-A mandayung nige' susah payah barang nyaru ngampoh balawan arah nige' ayoa', kira-kira wa' jam jaga ngarum kaampat, Yesus utukng wa' ayoa' nige' bajalatn ka tumukng danau ge' Ini' ngate bajalatn nabo' ayoa'. ⁴⁹ Tapi jangkah ayoa' mile' Yesus bajalatn ka tumukng danau, ayoa' nyangka bahwa Ini' koh amot, lalu ayoa' ngampak, ⁵⁰ karna ayoa' smaan mile' Yesus ge' buut. Namun, Yesus lansong nyansana wa ayoa', "Tananglah. Diah Iko'! Iya' buut," ⁵¹ Lalu, Ini' makka samahu ayoa' ka parahu, ge' nyaru dakoh pun madi', ge' ayoa' batol heran. ⁵² Sabab, ayoa' maseh tinga paham manganai mujisat rima roti dakoh barang ate ayoa' maseh karas. Yesus Ngangkauhatn Sok Karah ⁵³ Ge', ngalaka Yesus ge' ayo murid-A nyambarang, ayoa' mandarat ka dayu' Genesaret ge' barlabuh. ⁵⁴ Jangkah ayoa' disah umpatn parahu, ayo sok lansong kanal wa' Yesus, ⁵⁵ ge' talama' ka saluruh daerah dakoh ge' mule minsakng ayo sok anapm ka tumukng tilam, ka dume pun ayoa' dangah ka dume Yesus madi'. ⁵⁶ Maka, ka dume pun Yesus maruh ka desa-desa, ato kota-kota, ato daerah-daerah ka sakitar a', ayoa' magurikng ayo sok da anapm ka tampat da rame ge' mahi ka- Ini' supaya ayoa' buleh marab ujukng jubah-A sadi'. Ge' asi pun da nyinte ujukng jubah-A jadi auhatn.