¹ Utukngta ayoa' ka sabarang timu', ka rappo ayo sok Gadara. ² Jangkah Yesus disah umpatn parahu, segra ta ani nyungan umpatn sibur da karasukan roh najis amput Yesus. ³ Ini' madi' ka sadatn sibur-sibur. Kati' ani sok da aba' ningo' a' agi', malah ge' rante. ⁴ Sabab, ini' nga sering gatnningo' nige' masong' kaja' ge' rante, tatapi ini' aba' mutus rante a' ge' mata' masong a'. Kati' ani nyungan pun da kuat tanaga ya' ngatunuk a'. ⁵ Bilakng asat ge' ngarum ini' ngampak ka sibur nige' ka talidi-talidi ge' nalih adup a' nige' batu'. ⁶ Jangkah sok dakoh mile' Yesus umpatn jauh, ini' talama' ge' basujud ka tura' Yesus ⁷ Lalu, gae ngampak nige' saratn da nyarekng ini' nyansana, "Jai urusan antara iko' nige' Akupm, Yesus, Anak Jabata Da Mahanyamo? Iko' muhon wa'-Imu' demi Jabata, iya' nyiksako'!" ⁸ Sabab, Yesus nga muji' wa'ini', eh roh najis!" ⁹ Lalu, Yesus mansikatn wa' sok dakoh, "Asi gaatnmu'?" Ge', ini' naham, "Gaatnko' Legion karna kai karah." ¹⁰ Ini bakali-kali bamuhon wa' Yesus ya' kati' nguser ayoa' umpatn rappo dakoh. ¹¹ Ka teetn ani kubu' ahyo uwe' agi' uman ka jiket talidi. ¹² Lalu, roh-roh jahat dakoh bamuhon wa' Yesus, nige' nyansana, "Ngadumih kai wa' uwe'-uwe' dakoh singge kai maruh ka sadatn a'." ¹³ Yesus ngabula'. Karna dakoh, ro-roh najis dakoh boho' ge' maruh wa' uwe'-uwe' dakoh. Kubu' da bilakng a' kira-kira dua ribu dakoh talama' ka tapi karibet sampe ka timu', lalu tangulupm ka sadatn timu'. ¹⁴ Lakadakoh, panjaga-panjaga uwe' dakoh talama' boho adup a' ge' mangkatnpane a' ka kota ge' ka kampong. Ge' ayo sok da mungkas ya' mile' jai da nga tajadi. ¹⁵ Lalu, Ayo sok dakoh utukng wa' Yesus ge' mile' ini' da ijah karasukan roh jahat, da umpu' legion, agi' unyung, ge' nga bapangiak, ge' ini' nga ure' waras. Ge', ayoa' pun ngajadi buut. ¹⁶ Lalu, ayoa' da nyaksi kajadian dakoh, nyarita wa' ayo sok langkina hal dakoh tajadi wa' sok da karasukan roh jahat ge' tentang uwe'-uwe' dakoh. ¹⁷ Karna dakoh, ayo sok mule mahi Yesus ya' ngagatn rappo ayoa'. ¹⁸ Lakadakoh, waktu Yesus agi' makka ka parahu, sok da ijaha' karasukan roh jahat dakoh bamuhon supaya ini' buleh samahu nige' Yesus. ¹⁹ Tapi, Yesus kati' ngijina', malah muji' wa'ini', "Ure'mih wa' ayo agemu'. Nyarita ka ayoa' smaan hal da nga Tuhan umas wa'imu' ge' bahwa Tuhan mase' wa'imu'." ²⁰ Lalu, sok daakoh anu ge' mule ngabar wa' ayo sok ka Dekapolis manganai smaan hal da nga Yesus umas wa'ini'. Ge', smaan sok ngajadi heran. Anak Yairus Gatnngangkauhatn ²¹ Jangkah Yesus nyambarang agi'nige' parahu ka sabrang, sok karah bakumpur ka jiket-A, ge' Ini' madi' ka tapi timu'. ²² Lalu, nyungan pamimpin sinagoge da ba gaatn Yairus utukng ge' ngalaka mile' Yesus, ini' sujud ka kaja'-A. ²³ Ge', ini' bamuhon nige' batol-batol wa' Yesus, waatna', "Anak mahuko' da maseh inek hampir kabis. Utukng ge' mana'mih barekng-Mu ka tumukng a' supaya ini' kaatn ngangkauhatn ge' idup." ²⁴ Lalu Yesus anu samahu Yairus. Ani ladakoh karah sok da nganang Yesus ge' ngarungun-A. ²⁵ Ge', ani nyungan mahu' da pandarahan dua balas taun tuhi a'. ²⁶ Ini' ngabakali-kali manderita gatn karah dukun, ge' nga ngaruah smaan da gatna' umpu', tatapi kati' ani gune a' malah kaadaana batambah parah. ²⁷ Ngalaka dangah tentang Yesus, mahu dakoh utukng wa' Yesus umpatn buntot ka tuda'-tuda' kubu' sok ge' nyangkam jubah-A. ²⁸ Mahu dakoh nyansana, "Sa' iko' kaatn nyangkam jubah-A sadi', iko' ao' auhatn." ²⁹ Jangkah dakoh uga' pandarahana' abaranti ge' ini' misa' ungana' nga auhatn umpatn pangkanap a'. ³⁰ Yesus lansong panane umpatn adup-A sadi' bahwa ani tanaga da mungkas umpatn Ini'. Ini malik adup-A wa' kubu' dakoh ge' nyansana: "Asi da nyangkam jubah-Ko?" ³¹ Lalu ayo murid Yesus muji' wa' Ini',"Akupm mile' kubu' sok nyasak-nyasakMu' ge' Akupm muji', "Asi da nyangkam jubah-Ko'?" ³² Lalu, Yesus nyantunung nyakaliling ya' mile' asi palakua'. ³³ Namun, ngalaka panane jai da nga tajadi ka adup a', mahu dakoh ngajadi buut ge' bakutur. Ini' utukng ge' basujud ka tura' Yesus gae muji' ka Yesus smaan kabenarana. ³⁴ Lakadakoh, Yesus nyansana wa' mahu dakoh, "Anak-Ko, imanmu' nga nyalamatmu. Anulah sadatn damai sajahtra ge' auhatnmih umpatn panyakitmu." ³⁵ Samantara Yesus maseh nyansana, utukngta nyamani sok umpatn ramin pamimpin sinagoge da muji', "Anakmu nga kabis. Jai agi' maseh mangganggu Guru?" ³⁶ Tapi, Yesus kati' ituh dangah jai da nga gatnnamuji', Ini' muji' wa' pamimpin sinagoge dakoh, "Iya' buut, pacaya ja'." ³⁷ Lalu, Yesus kati' ngijin nyungn pun nganang-A, kacuali Petrus, ge' Yakobus, ge' Yohanes, age Yakobus. ³⁸ Lalu, ayoa' nyampe ka ramin kapala sinagoge dakoh, ge' Ini' mile' kaributan, ge' ayo sok da munse' uga rahu nige' saratn da kuat. ³⁹ Lakadakoh, jangkah Yesus maruh, Ini' nyansana wa' ayoa', "jai imu' ribut ge' munse'? Kangot dakoh kati' kabis, tapi agi' buus." ⁴⁰ Tapi ayoa' ngalukatn Yesus, Namun, Ini' ngadu ayoa' smaan mungkas ge' minsakng apa' ge' ama' kangot dakoh, ge' uga' ayoa' da samahu-A, lalu maruh ka uhakng tampat kangot dakoh madi'. ⁴¹ Lakadakoh, barekng kangot dakoh gatnNa' minte ge' Ini' nyansana kini', (Ratia, "Dara inek, Iko' muji' kimu, umpatmih!") ⁴² Kangot mahu dakoh pun segra agutn ge' mule bajalatn-jalatn, karna umura' nga dua balas taun, ge' segra smaan sok misa' batol-batol takjub. ⁴³ Lalu, Yesus mangkatn parintah da karas wa' pangama kangot dakoh sapaya iya' ani nyungan pun da panane hal diah, ge' muji wa' ayoa' sapaya kangot dakoh gatnmangkatn uman.