¹ Lalu, Yesus mule nyansana wa' ayoa' sadatn parumpamaan-parumpamaan." Ani sok da ngusaha nyabuah kabon anggur. Ini' mantagut paga nyangkalilikng a', ge' ngari' rubakng ya' ngaccet anggur, ge' mantagut nyabuah manara ya' jaga. Lakadakoh, ini' ngadu ayo pakaraje kabon anggur nyewa a' ge' anu ka luar nagari. ² Nga utukng musim panen, ini' ngirim nyungan palayan wa' ayo pakaraje kabon dakoh ya' naap umpatn ayoa' asil kabon anggur a'. ³ Tapi, ayoa' nangkap palayan dakoh, ge' mangkukng a', lalu nguser a' nige' barekng kusong. ⁴ Karna dakoh, ini' ngirim agi' palayan da laitn wa' ayoa', ge' ayoa' mangkukng abak a', ge' mamparlakua' nige' cara da manyangun. ⁵ Lalu ini' ngirim palayan laitn a' ge' ayoa' ngamis a'. Hal diah tajadi wa karah laitn a', nyabagi gatnmangkukng, ge' nyabagi gatnngamis. ⁶ Da umpu' kabon dakoh maseh ani umpu' nyungan agi', kohta anak da gatn a' nyayang. Akhir a', ini' ngirim anak a' dakoh wa' ayoa' ge' nyansana, 'Ayoa' ao' manghormat anakko'. ⁷ Tapi, ayo pakaraje kabon dakoh nyansana nige' da laitn, 'Ini' diu' ta ahli waris a'. Kaeh, ite' ngamis ini' ge' warisan a' ao' ite' umpu'. ⁸ Lalu, ayoa' nangkap a', ge' ngamis a', lalu nyangkahatn a' ka sato kabon anggur. ⁹ Jai da ao' gatn umpu' kabon anggur dakoh umas? Ini' ao' utukng ge' mambinasa ayo pakaraje dakoh ge' mangkatn a' kabon anggur a' wa' da laitn. ¹⁰ Ti' suah a' imu' maca ayat Kitab Suci, 'Batu' da gatnmatatn uleh tukang bangunan, laka jadi batu' penjuru'. ¹¹ Diahta parbuatan Tuhan, ge' parbuatan diah ajaib ka matu' ite'. ¹² Lakadakoh, ayoa' ya' nangkap-A tapi ayoa' buut ka sok da karah karna ayoa' pane bahwa Yesus nyampe parumpamaan ya' ayoa', lalu ayoa' ngagatn Yesus lalu anu. Manganai Mayar Pajak ¹³ Lakadakoh, ayoa' ngadu utukng wa' Yesus ani mani sok Farisi ge' ayo sok Herodian ya' menjebak Ini' nige' saratn adup-A. ¹⁴ Ayoa' utukng ge' muji' ka Yesus, "Guru, kai pane bahwa Akupm taman ge' kati' paduli nige' pandapat sok laitn. Sabab, Akupm kati' mile' panampilan sok tapi ngajar gala' Jabata da sasue nige' da taman. Ania taman mayar pajak wa' kaisar. ¹⁵ Arus a' kai mayar ato arus a' kai ti' mayar? Ao'ta Yesus, ngalaka pane kamunafikan ayoa'. Ini' muji; wa' ayoa', "Jai imu'nguji Iko'? Minsakng wa'-Iko' 1 dinar biar Iko' mile' a'. ¹⁶ Lalu, ayoa' minsakng a', ge' Yesus nyansana wa' ayoa', "Gambar ge' tulisan asilah diah?" Ayoa' naham-A, "Gambar ge' tulisan kaisar." ¹⁷ Lakadakoh Yesus nyansana wa' ayoa', "Mangkatn wa' kaisar hal-hal da kaisar umpu' ge' wa' Jabata hal-hal da Jabata umpu'." Ge', ayoa' heran wa' Yesus. Partanyaan Sok Saduki ya' Ngajebak Yesus ¹⁸ Lalu, ayo sok Saduki , da muji' ti' ani kabangkitan,utukng wa' Yesus ge' mansikatn wa'-Ini', waat ayoa', ¹⁹ "Guru, Musa nulis wa' ite' bahwa sa' sook, da umpu' age are, kabis ge' ngagatn nyungan sautn, tapi kati' ngagatn anak, age a' da are arus bainyha' nige' janda dakoh ge' mangkatn katurunan bagi age a'. ²⁰ Ani ijo ungan da badadi'. Age da ama naap nyungan sautn, ge' jangkah ini' kabis, ini' kati' ngagatn katurunan. ²¹ Lalu, age da kadua bainyha' nige' mahung dakoh, ge' kabis tampa ngagatn katurunan. Ladakoh uga' nige' age da kataru. ²² Ge', kati' ani umpatn kaijo' badadi' dakoh da ngagatn anak. Pangkabas dari smaan a', mahung dakoh uga' kabis. ²³ Wa' ano kabangkitan, jangkah ayoa' bangkit jadi sautn asilah mahung dakoh? Sabab, kaijo' badadi' dakoh nga umpitn a'." ²⁴ Yesus naham ayoa', "Inyata diah ta alasan imu' jadi sasat, karna imu' kati' ngarati Kitab Suci atopun kuasa Jabata? ²⁵ Sabab, jangkah ayoa' bangkit umpatn antara sok kabis, ayoa' kati' ani da bainyha' atopun da gatninyha', tapi ayoa' jadi ulah ayo malaikat ka surga. ²⁶ Manganai sok kabis da gatnngangkidup, kati' a' imu' maca sadatn kitab Musa, wa' bagian manganai rumpo' udu , langkina Jabata nyansana wa'ini', 'Iko' anilah Jabata Abraham. ²⁷ Ini' inya Jabata sok da kabis, tapi Jabata sok da idup. Imu' batol-batol sasat! Parintah da Paling Penting ²⁸ Lakadakoh, nyungan umpatn ayo ahli Taurat dangah ayoa' bataham baba'. Jangkah ini' mile' bahwa Yesus nga naham ayoa' nige' bait, maka ini' mansikatn wa' Yesus, "Parintah dumelah da paling penting umpatn smaan a'? ²⁹ Yesus naham, "Hukum da paling utama anilah: 'Dangah, he ayo sok Israel Tuhan Jabata ite' anilah nyungan-nyungan a' Tuhan. ³⁰ Ge', kasihi mih Tuhan Jabatamu' nige' saganap atemu' ge' nige' saganap jiwamu', ge' nige' saganap kakuatanmu'. ³¹ Ge', da kadua anilah: "kasihimih samu adup kupm ulah adupmu' . Ti' ani hukum da labih ahyo daripada diah." ³² Lalu, Ahli Taurat dakoh muji' wa' Yesus, "Akupm taman, Guru. Akupm taman nige' muji' bahwa Ini' dakoh nyungan, ge' kati' ani da laitn salaitn Ini'. ³³ Ge', mangasihi-A nige' saganap ate, ge' nige' saganap pangaratian, ge' nige' saganap kakuatan, serta mangasihi samu adup ulah adup uga', memang labih penting daripada smaan kurban da gatn ninu' ge' parsambahan." ³⁴ Lakadakoh, jangkah Yesus mile' bahwa sok dakoh naham nige' bijaksana, Ini' muji' wa'ini', "Akupm kati' jauh umpatn Karaan Jabata." Ngalaka dakoh, kati' ani agi' sok da pagatn mansikatn wa' Yesus. Kristus anilah Tuhan ³⁵ Ge', gae ngajar ka Bait Jabata, "Langkina bisa ayo ahli Taurat nyansana bahwa Kristus anilah anak Daud? ³⁶ Daud sadi' muji' ka sadatn Roh Kudus, 'Tuhan nyansana wa' Tuanko': Uyung ta ka sabalah sentao'-Ko', sampe Iko' mana' ayo munsu'-Mu' ka saroh kaja'-Mu'.' ³⁷ Daud sadi' magaatn Kristus sebage 'Tuhan'. Jadi, langkina mungkin Kristus anilah anak a'?" Ge', sok da karah dangah-A nige' auhatn ate. Sikap tarhadap Ayo Ahli Taurat ³⁸ Sadatn pangajaran-A, Yesus nyansana, "Ati-atita tarhadap ayo ahli Taurat, da suka bajalatn-jalatn ngiak jubah angho ge' suka nyamut salam panghormatan ka tampat-tampat umum, ³⁹ ge' ani umpu' tampat unyung terhormat ka sinagoge-sinagoge ge' tampat-tampat kahormatan sadatn paruman-paruman. ⁴⁰ Ayoa' da ngarampas ramin-ramin ayo janda ge' sebage alasan badoa da tuhi'-tuhi'. Ayoa' ao' kaatn hukuman da labih bahat." Parsambahan Sejati ⁴¹ Lakadakoh, Yesus unyung baradapan nige' kotak parsambahan ge' naliti ayo sok da nyese' uang ka sadatn kotak parsambahan dakoh. Karah sok kaya da nyese' sadatn jumlah da ahyo. ⁴² Lakadakoh, nyungan sok janda papa utukng ge' nyese' dua kapikng uang logam, na nilai a' samu' nige' 1 sen. ⁴³ Lalu, Yesus maba' ayo murid-A ge' muji' wa' ayoa', "Iko' muji' da sabatol a' wa'imu', janda papa diah nga nyese' labih karah ka sadatn kotak parsambahan dakoh daripada smaan sok laitn a'. ⁴⁴ Sabab, ayoa' smaan mangkatn umpatn kalimpahan ayoa', tapi janda papa dakoh, mangkatn umpatn kakurangan a', mangkatn smaan da ni' umpu', kohta smaan idup a'."