¹ Ge', jangkah ayoa' manpir sampe ka Yerusalem, jiket Betfage ge' Betania, ka Bukit Zaitu, Yesus ngadu dua murid-A, ² ge' nyansana wa' ayoa', "Anumih wa' desa ka dapanmu, ge' segra ngalaka imu' maruh a', imu' ao' amput nyungan keledai angot da gatnningo', da tinga suah gatn sok makka. Ngarapas ta keledai dakoh ge' minsakngta. ³ Sa' ani sok mansikatn kimu', 'Nyai mu' umas ladakoh?', muji'ta, 'Tuhan palalu keledai dakoh ge' ao' segra mangkure' ka diah agi'." ⁴ Lalu, ayoa' anu ge' amput nyungan keledai angot da gatnningo' ka pintu, ka bagian sato, ka gala', lalu ayoa' ngrapas a'. ⁵ Nyamani sok da agutn ka teetn mansikatn wa' ayoa', "Jai da mu umas nige' ngarapas keledai dakoh?" ⁶ Ayoa' naham ulah da Yesus muji' wa' ayoa', ge' ayo sok dakoh mambiar ayoa' anu. ⁷ Lalu, ayoa' minsakng keledai dakoh wa' Yesus, mana' jubah ayoa' ka tumukng keledai dakoh, ge' Yesus unyung ka tumukng a'. ⁸ Ge', karah sok da mabat jubah ayoa' ka gala', ge' da laitna' ngampar daatn-daatn da ayoa' nyantak umpatn uma'. ⁹ Sok karah da bajalatn ka tura ge' da ngananga' ngampak, "Hosana! Gatnmamberkatta Ini' da utukng sadatn gaatn Tuhan. ¹⁰ Gatnmamberkatta pajutukng karajaan Daud, nenek moyang ite'! Hosana, ka tampat da mahanyamo! ¹¹ Lakadakoh, Yesus maruh ka Yerusalem ge' anu ka Bait Jabata. Ge', ngalaka' mile' sagala tarutn ka sakalilikng a', Ini' anu ka Betania samahu kadua balas murid-A karna ano nga jauh ngarum. Yesus Ngutuk Puutn Ara ¹² Ge', jakkap anoa', jangkah ayoa' ngagatn Betania, Yesus misa' saburuk. ¹³ Ngalaka mile' nyabuah puutn ara da badautn umpatn dajauh, Ini' anu ya' mile' sa' mungkin ani tarutn da bisa Ini' amput umpatn puutn dakoh. Jangkah Ini' sampe ka puutn dakoh, Ini' kati' amput jai-jai kacuali dautn-dautna' sabab no dakoh nya musim buah ara. ¹⁴ Karna dakoh, Yesus nyansana wa' puutn dakoh, "Iya' ani agi' sok da uman buah umpatn imu' ya' salama-lama a'." Ge', ayo murid-A dangaha'. Yesus Anu ka Bait Jabata ¹⁵ Lakadakoh, ayoa' sampe ka Yerusalem. Ge', Yesus maruh ka Bait Jabata ge' mule nguser ayo sok da agi' bajual ka Bait Jabata. Ini' mambalik meja-meja panukar uang ge' pangkeng-pangkeng sok da nyual manuk-manuk acang, ¹⁶ ge' Ini' kati' agi' ngijin sok minsakng pakarakng-pakarakng nabo' Bait Jabata. ¹⁷ Lakadakoh, Yesus ngajar ayoa' ge' nyansana, "Inyata tartulis, 'Ramin-Ko ao' gatnmuji' ramin doa ya' smaan bangsa'? Tapi, imu' nga ngubah a' jadi sarang parampok." ¹⁸ Ge', imam-imam kapala ge' ahli-ahli Taurat ngadangaha' ge' ayoa' najo cara langkina ngamis-A. Sabab, ayoa' buutwa'-Ini' karna sok karah dakoh kagum wa' pangajaran-A. ¹⁹ Ge', jangkah ano nga mule ngarum, Yesus ge' ayo murid-A ngagatn kota dakoh. Umpu'talah Iman ka Sadatn Jabata ²⁰ Lalu, ngakkap ano jangkah ayoa' lewat, ayoa' mile' puutn ara da nga karikng sampe ka uhat-uhat a'. ²¹ Petrus sanuut ge' muji' wa' Yesus, "Rabi, mile'! Puutn ara da Akupm ngutuk nga jadi karikng!" ²² Ge', Yesus naham ayoa', "Umpu'talah iman ka sadatn Jabata. ²³ Iko' muji' da sabatola' wa'imu', asi saja da nyansana ka gunung diah, 'Tarantatnmih ge' tapalanting ka sadatn laut,' ge' kati' ani karaguan ka sadatn atea', tatapi pacaya bahwa jai da ini' muji' ao' tajadi, maka hal dakoh ao' tajadi wa'ini'. ²⁴ Sabab dakoh, Iko' muji' wa'imu', jai pun da gatnmu' ngadoa ge' mahi, pacayalah bahwa imu' ao' kaatn a', maka hal dakoh ao' gatnmangkatn kimu'. ²⁵ Ge', apabila imu' agutn ge' badoa, ngampunlah sak ani imu' nyimpan tarutn tarhadap sook, spaya Sama'mu' da ka surga uga' ao' ngampun kasalahan-kasalahanmu'. ²⁶ Namun, sa' imu' kati' mangampuni, Sama'mu' da ka surga uga' kati' ao' mangampuni kasalahan-kasalahanmu'." Pamimpin Yahudi Mansikatn tentang Kuasa Yesus ²⁷ Lakadakoh, ayoa' utukng agi' ka Yerusalem. Samantara Yesus bajalatn ka Bait Jabata, ayo imam kapala, ayo ahli Taurat, ge' ama-ama Yahudi utukng wa'-Ini'. ²⁸ Ge', ayoa' nyansana wa'-Ini', "Nige' kuasa jai Akupm umas hal-hal dakoh, ato asi da mangkatn-Mu kuasa ya' umasa'?" ²⁹ Yesus muji' wa' ayoa', "Iko' ao' mansikatn nyiteng partanyaan kimu'. Nahammih Iko', baru Iko' ao' muji'kimu' nige' kuasa jai Iko' umas hal-hal dakoh. ³⁰ Anita baptisan Yohanes barasal umpatn surga ato umpatn talino? Nahammih Iko!" ³¹ Ayoa' barukkupm ge' samu adup a' nige' nyansana, "Sa' ite' nahama', 'Umpatn surga, 'Ini' ao' muji', 'Lalu, nyai imu' ti' pacaya kini'?' ³² Tapi, sa' ite' nahama', 'Umpatn talino?' Ayo pamimpin dakoh buut wa' sok karah karna ayoa' smaan manganggap bahwa Yohanes diu'ta nyungan nabi. ³³ Karna dakoh, ayoa' naham Yesus, "Kai ti' pane." Lakadakoh, Yesusu nyansana wa' ayoa', "Ladakoh uga Iko', Iko' uga' ti' ao' muji' kimu' nige' kuasa jai Iko umas hal-hal dakoh."