¹ Lakadakoh, Yesus ngagatn tampat dakoh ge' anu ka rappo Yudea ge' ka sambarang sungi Yordan. Ge', sok karah bakumpur nguram Ini' agi'. Ge', ulah kabiasaan-A, Ini' agi' ngajar ayoa'. ² Lakadakoh, ayo sok Farisi utukng Kini', ge' ya' nyuba Ini' ayoa' mansikatn, "Anita gatnngadu nyungan banun nyarai sautna'?" ³ Yesus naham ayoa', "Jai da Musa merintah kimu'?" ⁴ Ayoa' muji, "Musa ngijin nyungan banun umas surat care ge' nyaraia'." ⁵ Tapi, Yesus nyansana wa' ayoa', "Karna kakarasan atemu'ta, Musa nulis parintah dakoh ka imu'. ⁶ Tapi ba, umpatn mule panciptaan, 'Jabata nyipta ayoa' are ge' mahu. ⁷ Karna dakohta, nyungan are ao' ngagatn apa' ge' ama' a'. ⁸ Ge', kadua a' ao' ngajadi nyiteng dagin.' Nige' ladakoh, ayoa' inya agi' dua, malahan ngajadi nyiteng dagin. ⁹ Jadi, jai da nga Jabata nyatu, iya' ani talino da misaha'." ¹⁰ Lakadakoh, ka saadatn ramin, ayo murid-A mansikatn agi' wa'-Ini' tentang hal dakoh. ¹¹ Maka, Ini' nyansana wa' ayoa', "Asi saja da mancare sautna' ge' bainyha' agi ge' da laitn, barbuat zina tarhadap sautna'. ¹² Ge', sa' sautn mancare banuna', ge' bainyha' agi' ge' da laitn, ini' barbuat zina." Yesus Mamberkat Ayo Kangot ¹³ Ge', ayoa' minsakng ayo kangot inek wa' Yesus sapaya Ini' nyangkam ayo kangot dakoh, tatapi ayo murid mingat ayoa'. ¹⁴ Namun, jangkah Yesus mile'a', Ini' jadi baji' ge' nyasana wa' ayo murid-A, "Tea'ta ayo kangot inek dakoh utukng wa'-Iko' ge' iya' halang-halangi ayoa' karna Karajaan Jabata anita bagian sok da ulah ayoa'. ¹⁵ Iko' muji' da tamana' kimu', asi saja da kati nyamut Karajaan Jabata ulah nyungan kangot, kati' ao maruh kasadatna'." ¹⁶ Lakadakoh, Yesus nakulok ayo kangot dakoh, Ini' mambarkat ayoa' ge' mana' barekng-A ka tumukng ayoa'. Sok Kaya da Manulak Nganang Yesus ¹⁷ Lalu, jangkah Yesus sgi' nyiap pajalatn-Na, ani nyungan sok talama' wa'-Ini' ge' balutut ka hadapan-Na ge' mansikatn, "Guru da bait, jai da arus iko' bulah ya' kaatn warisan idup kekal?" ¹⁸ Ge', Yesus muji' kini', "Jai imu' muji' Iko' bait? Kati' ani nyungan pun da bait, kacuali Jabata sadi'. ¹⁹ Imu' panane parintah-parintah: 'Iya' ngamis, iya' berzina, iya' nangko, iya' mangkatn kasaksian palsu, iya' manipu, manghormatmih apa' ge' ama'mu'." ²⁰ Lalu, sok dakoh muji' wa'-Ini', "Gurur, iko' nga nurut smaan dakoh dari ko' maseh angot." ²¹ Namun, Yesus nyantunung wa' bujakng dakoh ge' rasa mase' kini', ge' nyansana wa'ini', "Nyiteng hal da kurang umptnmu'. Anu ge' nyualmih smaan da imu' umpu', ge' mangkatn wa' sok papa, maka imu' ao' umpu harta ka surga. Lalu, utukngkiah ge' nganang Iko'." ²² Namun, saratn dakoh umasa' susah ate ge' ini' anu nige' sedih karna harta ini' karah. ²³ Lakadakoh, Yesus nyantunung ka sakalilikng ge' nyansana wa' ayo murid-A, "Batapa aritnta bagi ayoa' da kaya ya' maruh Karajaan Jabata!" ²⁴ Ayo murid takajut ka saratn-A. Namun, Yesus muji' agi' wa' ayoa', "He anak-anak, batapa aritnta ya' maruh Karajaan Jabata! ²⁵ Labih mudah nyungan unta maruh nabo' rubakng jarum daripada sok kaya maruh Karajaan Jabata." ²⁶ Ayo murid smangkin takajut ge' nyansana samu adupa', "Lalu, asi da kaatn gatnnyalamat?" ²⁷ Yesus nyantunung wa' ayoa' ge' nyansana, "Bagi talino hal dakoh kati' mungkin, tatapi kati' bagi Jabata. Sabab, sagala tarutn mungkin bagi Jabata." Upah Nganang Yesus ²⁸ Petrus mule nyansana wa' Yesus, "Mile', kai nga ngagatn sagala tarutn ge' nganang Akupm!" ²⁹ Yesus muji', "Iko' muji' da sabanara kimu', ti' ani nyungan pun da ngagatn ramin, ato ayo agea' da are, ato ayo agea' da mahu, ato ama', ato apa', ato anak-anak, ato uma-umaa' karna Iko' ato karna Injil, ³⁰ da ka masa diah kati' ao' narima saratus kali lipat- ramin-ramin, ge' ayo agea' da are, ge' ayo agea' da mahu, ge' ama'-ama', ge' anak-anak, ge' uma'-uma', nige' panganyayaan; ge' ka masa da ao' utukng, idup da kekal. ³¹ Tapi, karah sok da uru' ao jadi da unyhi', ge' da unyhi' ao' jadi da uru'." Yesus Nyansana Agi' tentang Pangkabis-A ³² Ayoa' agi' sadatn pajalatn makka ka Yerusalem ge' Yesus bajalatn ka tura' ayoa'. Ge' misa' heran, samantara ayo sok da nganang-A misa' buut. Ge', Yesus malik minsakng kadua balas murid-A, Ini' mule mangkatnpane ayoa' jai da ao' tajadi wa'-Ini'. ³³ Waatn-Na', "Ile', ite' agi' makka ka Yerusalem ge' Anak Talino ao' gatnnyarah wa' imam-imam kapala ge' ahli-ahli Taurat. Ayoa' ao' manghukum-A sampe kabis ge' ao' nyaraha' wa' sok da inya Yahudi. ³⁴ Ayoa' ao' manghina-A, ge' ngaruja'-A, ge' manghajar-A, ge' ngamis-A. Tapi, ngalaka taru ano, Ini' ao' bangkit." Parmuhonan Yakobus ge' Yohanes ³⁵ Lakadakoh, Yakobus ge' Yohanes, anak-anak Zebedeus, utukng ka Yesus ge' nyansana, "Guru, kai ngatte Akupm umas angkatn kai jai saja da kai mahi." ³⁶ Ge', Yesus nyansana wa' ayoa', "Jai da imu' ngatte ya' Iko' umas angkatnmu'?" ³⁷ Ayoa' muji' wa'-Ini', "Ngijinmih nyungan umpatn kai unyung ka suutn sentao'-Mu, ge' da nyungan ka suutn sengkiri'-Mu, sadatn kamuliaan-Mu." ³⁸ Tapi, Yesus muji' ka ayoa', "Imu' ti' pane jai da imu' mahi. Sanggup a' imu' nyucur umpatn cawan da arus Ko'nyucur ato gatnbaptis nige' baptisan da gatnngabaptis wa'-Iko'? ³⁹ Ayoa' muji' wa'-Ini', "Kai sanggup!" Lalu, Yesus nyansana ka ayoa', "Cawan da Ko' nyucur memang imu' nyucur, ge' imu' ao' gatnbaptis nige' baptisan da gatnngabaptis wa'-Iko'. ⁴⁰ Tapi, ya' unyung ka suutn sentao'-Ko' ato ka suutn sengkiri'-Ko, inya hak-Ko' ya' mangkatn a', tatapi tampat dakoh anilah ya' ayoa' da nga gatnnyadia." ⁴¹ Ngadangah dakoh, sapuluh murid da laitn ngajadi baji' wa' Yakobus ge' Yohanes. ⁴² Lalu, Yesus maba' ayoa' ge' nyansana wa' ayoa', "Imu' pane da gatnanggap sebage pamarintah ayo sok da inya Yahudi barbuat ulah-ulaha' bakuasa atas ayoa'. Ge', patinggi-patinggi ayoa' ngiak kakuasaana' wa'ayoa'. ⁴³ Namun, kati' saharusa' ka antara imu'. Sabalik a', asi saja da ngatte jadi ahyo ka antara imu', arus jadi palayanmu, ⁴⁴ ge' asi saja da ngatte jadi da uru' ka antaramu', arus jadi palayan umpatn smaana'. ⁴⁵ Sabab, Anak Talino pun utukng inya ya' gatnlayani, tatapi ya' malayani, ge' ya' sebage tabusan ya' sok da karah." Yesus Ngangkauhatn Bartimeus da Buta ⁴⁶ Lakadakoh, ayoa' utukng ka Yeriko. Jangkah Yesus ngagatn Yeriko samahu nige' ayo murid-A ge' sok karah, nyungan pamahi buta dabagaatn Bartimeus, anak Timeus, agi' unyung ka pihikng gala'. ⁴⁷ Jangkah ini' dangah bahwa ani Yesus umpatn Nazaret, ini' ngampak ge' nyasana, "Yesus, Anak Daud, mase'mih wa' iko'!" ⁴⁸ Ge', karah sok mingat a' ge' ngadua' madi'. Namun, ini' samangkin ngampak, Anak Daud, mase'mih wa' iko'!" ⁴⁹ Lalu, Yesus madi' ge' nyansana, "Maba' kini'." Ge', ayoa' pun maba' sok buta dakoh ge' muji', "Nguatta atemu! Agutnmih, Ini' maba'mu." ⁵⁰ Gae muka' jubaha', sok buta dakoh agutn ge' utukng wa' Yesus. ⁵¹ Ge', Yesus nyansana wa'ini', "Jai da imu' ngatte ya' Iko' umas ya' dimu'?" "Rabi, tea'lah iko' mile'." ⁵² Lalu, Yesus nyansana kini', "Anumih. Imanmu' ngangkauhatnmu'." Jangkaha koh uga', ini' kaatn agi' pamile'a', ge' ini' nganang Yesus sapanjang pajalatn.