¹ Lalu, Jangkah Yesus ngagatn Bait Jabata, nyungan umpatn murid-A muji' wa'-Ini', "Guru, mile' betapa indaha' batu'-batu' ge' betapa indaha' bangunan-bangunan diah!" ² Ge', Yesus nahama', "Ania imu' mile' bangunan-bangunan da megah diah? Ti' ani nyiteng batu' pun da ao' tangalat ka tumukng batu' da laitna' da kati' ao' gatnngaruruh." Pamule-mule Panderitaan ³ Ge', samantara Yesus agi' unyung ka Bukit Zaitun da nura' Bait Jabata, Petrus, ge' Yakobus, ge' Yohanes, ge' Andreas mansikatn wa' Yesus sendirian, ⁴ "Mujilah ka kai, ngina' hal-hal dakoh ao' tajadi, ge' jai da ao' jadi tande sa' smaan dakoh ao' segra barakhir?" ⁵ Lalu, Yesus mule nyansana wa' ayoa', "Barati-atimih sapaya ti' ani sok da ngalayomu'. ⁶ Karah sok ao' utukng sadatn gaatn-Ko, nyansana, 'Iko'ta Ini'.' Ge', ayoa' ao' ngalayo karah sok. ⁷ Jangkah imu' dangah tentang paparangan ge' agah-agah tentang parang, iya' buut. Hal-hal dakoh arus tajadi, tatapi akhir umpatn smaana' tinga tajadi. ⁸ Sabab, bangsa ao' bangkit malawan bangsa, ge' karajaan malawan karajaan. Ao' tajadi gampa bumi ka dume-dume tampat; ao' ani kalaparan. Diahta pamule-mule umpatn rasa anapm baranak. ⁹ Namun, ngajagalah adupmu'. Sabab, ayoa' ao' nyarah imu' wa' pangadilan, ge' imu' ao' gatnmantokng ka sinagoge-sinagoge ge' imu' ao' agutn ka hadapan Sanhedrin ge' raja-raja karna Iko', sebage kasaksian ka ayoa'. ¹⁰ Ge', Injil arus labih uru gatnngabar wa' smaan bangsa. ¹¹ Ge', jangkah ayoa' minsakngmu' ge' nyarahmu', iya'ta kuater uru' nige' jai da arus mu' muji', tatapi muji'talah jai pun da gatnngarunia wa'imu' saat dakoh karna inya imu' da nyansana, malainkan Roh Kudus. ¹² Ge', nyungan age ao' nyarah agea' ka pangkabis, ge' apa' wa' anak a'. Anak-anak ao' umpat malawan pangama ge' ngamis ayoa'. ¹³ Ge', imu' ao' gatnrusi' kat smaan sok karna gaatn-Ko. Tapi, sok da tatap batahan sampe akhir ao'gatnnyalamat." Hal jahat da Nyabab Kahancuran ¹⁴ "Namun, jangkah imu' mile' pambinasa keji agutn ka tampat da kati' saharusa' (ayo da maca aruslah ngarati), ayoa' da ani ka Yudea arus boho wa' pagunungan. ¹⁵ Sok da madi' ka aro ramin iya' sosor ato maruh ka sadatn ramin ya' ngaluar jai pun umpatn sadatn ramina'. ¹⁶ Ge', sok da madi' ka uma', iya' malik ya' naap jubaha'. ¹⁷ Calakata ayoa' da agi' batahi' ge' ayoa' da agi' nyusu kangot bayi a' wa' ano dakoh. ¹⁸ Badoata sapaya hal-hal diah kati' tajadi wa' musim panut. ¹⁹ Sabab, wa' ano-ano dakoh ao' tajadi masa panderitaan da tinga suah tajadi umpat pamule panciptaan, da Tuhan nyipta sampe mati', ge' ti' ao' suah tajadi agi'. ²⁰ Ge', sa' Tuhan kati' nyingkat ano-ano dakoh, ti' ao' ani nyungan pun da gatnnyalamat. Tapi, ya' da gatnmilih, da nga Ni' milih, Ini' nyingkat ano-ano dakoh. ²¹ Lakadakoh, sa' ani sok da nyansana wa'imu', 'Mile', Kristus ani kadiah!" Ato, 'Mile', Ini' ani ka teetn!" Iya' ta pacaya. ²² Sabab, mesias-mesias palsu ge' nabi-nabi palsu ao' bangkit ge' nyua' tande-tande ge' kaajaiban-kaajaiban ya' nganyasat, sa' mungkin, bahkan ayo' sok pilihan. ²³ Waspadamih! Iko' nga muji' smaan diah wa'imu' sabalum a'. ²⁴ Namun, wa' ano-ano dakoh, ngalaka tajadi masa panderitaan ahyo, 'Matuano ao' jadi patakng, ge' buratn ti' ao' babalo. ²⁵ Bintakng-bintakng ao' bajantu-jantu umpatn rangit, ge' kuasa-kuasa ka rangit ao' gatnna' nguncang." Pajutukng Anak Talino ²⁶ "Lakadakoh, ayoa' ao' mile' Anak Talino utukng sadatn rahu' nige' kuasa ge' kamuliaan da ahyo. ²⁷ Lalu, Ini' ao' ngutus malaikat-malaikat ge' ngumpur da gatnmilih umpatn apat arah matu nyaru, umpatn ujung-ujung bumi ge' ujung-ujung rangit. ²⁸ "Balajarmih umpatn parumpamaan puutn ara; jangkah daatn-daatn a' nga rangut ge' dautn-dautna' mungkas, maka imu' pane bahwa musim jarah nga jiket. ²⁹ Ladakoh uga' nige' imu', apabila imu' mile' hal-hal diah tajadi, pananemih bahwa Ini' nga jiket, ka muka pintu. ³⁰ Iko' muji' da sabanara' wa'imu', katurunan diah ti' aobalalu sampe smaan diah tajadi. ³¹ Rangit ge' bumi ao' balalu, tatapi firman-Ko ti' ao' suah balalu." Waspada ge' Bajaga-jagamih ³² "Tapi, tentang ano ato jam dakoh, ti' ani nyungan pun da pane, ti' uga' malaikat-malaikat ka surga, Anak uga kati', duhutn Bapa. ³³ Waspadamih, bajaga-jagata. Sabab, imu' ti' pane ngina anoa' ao' utukng. ³⁴ Hal diah ulah sok da agi' anu bajalatn. Jangkah ini' ngagatn ramin ge' mangkatn kuasa ka palayan-palayana', masing-masing nige' karajea', ge' uga' ngadu panjaga pintu ya' tatap bajaga-jaga. ³⁵ Karna dakoh, bajaga-jagamih karna imu' ti' pane ngina tuan ramin dakoh ao' utukng, ngarami ano, ato tuda' ngarum, ato ano siap mihu', ato pagi-pagi buta, ³⁶ Iya' sampe ini' tiba-tiba utukng ge' amputmu' agi' buus. ³⁷ Jai da Iko' muji' kimu' diah, Iko' muji' wa' smaan sok: 'Bajaga-jagamih!'"