¹ Yesus momba murit yo duo blas kongo ene, laju mie kuasa epo dero nte ngombo se setan-setan ai nte mkale roton san. ² Io nymuyu dero nte nyampe soal krajaan Allah ai nte mkale roton ulun. ³ Ulek Io epo dero : "Nang moit ise-ise lang ju lang kam ene, nang moit goloi ai nguyu roti, nguyu sen ai pakaian sampe duo stel. ⁴ Ena ikam tinorima lang lou ulun, nongos ka ikam mne sampe ikam brangkat ngket ne. ⁵ Ena iyo keo ulun yo belo kakan trima se ikam, baling ka ikam ngket kota dero ai tompus kam bondul ngket botis kam nte mknop dero. ⁶ Ket ne dero bju lekum epo kampong-kampong ulak ngabar Injil ai mkale roton ulun mbo mone-mone. ⁷ Herodes, raja mbo dnia mne kringo se nau umbang ene ai iyo low keo kanam belo buen, koe keo ulun yo ngulek se Yohanes sundok uat nyuli ket ekang ulun mate. ⁸ Keo low yo ngulek se Elia sundok nyoret nua, ai keo low yo ngulek se keo erai ngket nabi-nabi jman bai ene yo sundok nyuli. ⁹ Tapi Herodes ngulek : "Yohanes ene sundok empung ku utok iyo. Ise jnis Ulun kam endo, yo kabar iyo kate sanggup gawi ktine?" Ket ne io bkomer apa kate ruku se Yesus. ¹⁰ Des rasul-rasul ene uli, dero ngesah epo Yesus ise-ise yo sundok gawi dero. ngket ene Yesus moit dero, bdeing epo kota karan se Betsaida, apa dero ene tingen diang-Io. ¹¹ Tapi deo apo ulun iyo tau, ulak nyarak-Io. Io nrima ka se dero ai ngesah epo dero nau umbang Krajaan Allah, ai Io low mmkale ulun-ulun yo lako awat nte pkale. ¹² Des jman olo kakan tonop duo blas murit-Io ene ulet epo-Io laju ngulek : " Suyu-Ko tah ulun deo ene malan, apa dero malan epo desa-desa ai kampong-kampong meto awa nte turui ai meto nte okan, koe ena mndo belo keo ise-ise. ¹³ Tapi Io ngulek epo dero : "Ikam arus makan dero ene!" dero nuing : "Yo keo mbo kain pulun yo ka limo roti diang duo kikuy esa, tapi tau ka ena kain moli okan nte eka-eka ulun deo endo . ¹⁴ Koe ela mne ene keo ungka limo ribu kongo yo bang song. Io ngulek epo murit-murit-Io : "Suyu kam dero tunge ngrpudu bangsa kdeo limopulu kongo erai jut yo. ¹⁵ Murit-murit ene nglaku ai nyuyu eka ulun deo ene tunge. ¹⁶ Sundok Io ngalek limo roti diang duo kikuy esa ene, Io nyonda epo langit, ngndoa brkat laju ngrinsi-ngrinsi roti ene, ai mie roti ene epo murit-murit-Io apa bnagi epo ulun deo ene. ¹⁷ Dero eka kuman ndok boting . bayu knumpul nua kasan roti ene keo ungka duo blas kepit kroa yo. ¹⁸ Keo sindai Yesus Smbayang Io ba, ulet murit-murit-Iyo ngompoh-Iyo. laju Io ngunti epo dero' : "Ise ontus ulun deo se Aku endo?" ¹⁹ Tuing dero : "Yohanes tukang baptis, keo low yo ngulek : Elia, keo yo ngulek se erai ngket nabi-nabi ket bai ene yo sundok nyuli. ²⁰ Yesus ngunti epo dero : "san kam, ise Aku endo?" Tuing Petrus : "Mesias ngket Allah" ²¹ Ngket ne Yesus ngusan apa dero nang beta ngesah epo ise-ise soal ene epo ulun mak. ²² Yesus ngulek : "Pea Ulun arus nanggung deo pengkono ai tnolak koe tuo-tuo, pngutok-pngutok imam diang ahli-ahli torat, ngket ne Io pnate laju pinosuli des olo ktolu." ²³ Ulek Io epo dero eka-eka : "Tongku ulun yo kakan lumpat Aku, io arus nang ngaya pngnanam io se, moson salib io tiap olo diang lumpat Aku. ²⁴ Koe ise-ise yo kakan nylamat kesong io, yo anta mapos kesong ube; tapi ise-ise yo mapos kesong yo koe Aku, io ene anta ubente nylamat iyo. ²⁵ Ise jodo ulun kuli se erai dnia, tapi io ngmbnasa ai ka ngrugi io se? ²⁶ Koe ise-ise yo mai koe Aku ai koe pngesah-Ku, Pea Ulun mai low koe ulun ene, Montuk Io ulet anta lang kmuliaan-Io ai lang kmuliaan Bapa diang mlekat-mlekat kudus. ²⁷ Aku mere epo ikam : sbeta yo ngket ikam yo keo mbo mndo keo yo belo anta mate ena belo pian kito Krajaan Allah. ²⁸ Bangsa walu olo ngket sundok eka tutui batuk Io ene, Yesus moit Petrus, Yohanes diang Yakobus dombo epo tunden epo smbayang. ²⁹ Des Io desung smbayang, saya wae-Iyo waliu ai diris laung Io jadi bura ngrnsilak. ³⁰ Dero kito ulun duo kongo bunyal diang Iyo, yo ene Musa diang Elia. ³¹ Dero duo mmkelak kompu lang kmuliaan ai ngesah nau umbang epo ju-Iyo, yo kakan psundok-Io mbo Yerusalem. ³² Desung ene petrus diang tman-tman iyo turuy, des dero ruko dero kito Yesus lang kmuliaan-Iyo: diang duo kongo ulun yo akat ela isan Io ene ³³ Des ulun duo kongo ene kakan ngendikah Yesus, Petrus ngulek epo-Iyo: "Guru, ego beta kain nongos mbo mndo. buen yo ena kain nampa tolu kemah, erai nte Ngko, erai nte Musa diang erai nua nte Elia." Tapi Petrus se belo di unong nau pngesah yo ene ³⁴ desung io ngulek ktine, diwa nylikup dero. Des dero sumba lang jaun ene, dero jadi takut. ³⁵ Dero kringo oyon ngket lang jaun ene, otang yo ktindo : "Endo Pea-Ku yo sundok pili-Ku, tempaning kam Iyo." ³⁶ Des oyon ene dingo kito dero se Yesus ene toro yo ba-ba mne. Murit-murit ngelim pengitan dero ene, des jman ene dero belo keo ngesah epo ise-ise nau pngitan dero ene. ³⁷ Mbo molo manin yo des dero diwa ngket tunden ene, deo ulun ulet nglnduyun nyruku Yesus. ³⁸ Keo erai kongo ngket ekang dero ene momba, ulek iyo : "Guru, aku tindu apa Iko meti pea ku, koe pea ku pulun yo ene. ³⁹ Kolan-kolan yo kono sumban roh, kolan-kolan nyoyar ai roh ene ngukuy ngunsang kompu tonga yo sampe bowa iyo kbubus. Roh ene belo tau aut ngsa iyo ulak belo kakan oro ngket iyo. ⁴⁰ Aku sundok tindu epo murit-murit-Ko apa dero ngusa roh ene, tapi dero belo kuli." ⁴¹ Ulek Yesus : "Ikam endo pokan yo belo prsaya ai tang, kola ptua kam aku aso ekang ikam ai sabar epo ikam? Oit pea ko ene dido!" ⁴² Des pea ene ngompoh Yesus, setan ene nguis iyo epo tana ai ngukuy-ngukuy kompu iyo. Tapi Yesus Ngur roh triaw ene diang ries mkale pea ene, laju nempuli pea ene epo uma iyo. ⁴³ Eka ulun mbo mne ene ngrngao koe kito khebat kuasa Allah. Des dero ene aso kanam eran kito nau joun-Iyo ene, Yesus ngulek epo murit-murit-Iyo: ⁴⁴ "Tempaning ai ona kam buen-buen pngesah-Ku endo : Pea Ulun anta snrah epo lang kayang ulun." ⁴⁵ Dero belo di unong nau pngesah ene, koe rti yo ene melim mbo dero, koe ene dero belo kuli ngmbayang rti yo. Ai dero belo ronu ngunti rti pngesah ene epo-Iyo. ⁴⁶ Ngket ene ulet belo tau sngkono mbo murit-murit Yesus, dero bako awet ise yo nuon tingen mbo sama dero. ⁴⁷ Tapi Yesus tau atok lang utok dero. Koe ene Io ngalek erai kongo pea alus laju mayak mbo isan-Iyo, ⁴⁸ laju ngulek epo dero : "Ise-ise ulun yo nrima pea endo lang karan-Ku, io nrima se Aku ; ai ise-ise ulun nrima Aku, io nrima Iyo yo nyuyu Aku. Koe yo paling idik ngket ekang ikam, iyo ene yo paling olai." ⁴⁹ Yohanes nuing: "Guru, kain kito ulun yo ngusa setan makai karan-Ko, kain ngusan ulun ene, koe io makse se ulun taka." ⁵⁰ Yesus ngulek epo iyo: "Nang kam usan, Koe ise-ise ulun yo belo nglawan ikam, yo ene ngket ikam." ⁵¹ Des duni jman yo nte Yesus nengkat epo sorga, Io nadah pngeti Iyo nte malan epo Yerusalem, ⁵² Io ngirim tenu-tenu kongo utusan brangkat ono se Iyo. Dero brangkat sumba epo desa ulun Samaria nte nyiap ktindo ktitu nte-Iyo. ⁵³ Tapi ulun-ulun Samaria belo kakan nrima se-Iyo, koe dalan-Iyo epo tadah Yerusalem. ⁵⁴ Des duo kongo murit-Iyo, yo ene yakobus diang Yohanes, kito nau umbang ene, dero ngulek: "Tuhan, kakan be-Iko, apa kain nymuyu api diwa ngket langit nte mmtomo dero?" ⁵⁵ Tapi Io skuleng ngae dero. ⁵⁶ Ngket ne dero bju epo tadah desa yo mak. ⁵⁷ Des Yesus diang murit-murit-Iyo desung malan nua, keo ulun mbo tenga boyan ngulek epo Yesus: "Aku kakan lumpat diang-Iko, epo mbe ka tadah-Ko malan." ⁵⁸ Yesus ngulek epo iyo: "snkalau keo liang ai mpulu keo salai, tapi Pea Ulun belo keo awa nte awa mayak utok-Iyo." ⁵⁹ Trus Io ngulek epo erai kongo ulun yo mak mbo mne: "Iko lumpat aku!" tapi ulun ene nuing: "aku tindu malan ile nte nglowong uma ku." ⁶⁰ Tapi Yesus ngulek epo iyo: "Koe ka ulun mate nglowong ulun mate; tapi iko, malan ka ai sampe ko umbang krajaan Allah mbo mone-mone. ⁶¹ Erai kongo yo mak nua ngulek: "Aku kakan lumpat-Iko, Tuhan, tapi aku tindu nte sabi ile diang kluarga ku. ⁶² Tapi Yesus ngulek: "Tongku ulun yo siap nte ngmbajak tapi skuleng epo sori, belo snaron mbo krajaan Allah.