² La mne keo erai kongo perwira yo keo erai kongo batak, yo knosang ke iyo. Batak ene desung kroton payah ai alang mate. ³ Des perwira ene kringo soal Yesus, io nyemuyu tenu-tenu ulun tuo-tuo Yahudi epo-Iyo nte tindu, apa Io ulet ai mkale batak yo ene. ⁴ Dero ulet epo Yesus ai diang beta-beta tindu awat-Iyo, ulek dero: "Io pantas Ngko awat, ⁵ koe io kosang diang bangsa taka ai io yo ngongkos nengkuat blai ibadat kain." ⁶ Laju Yesus malan sama-sama diang dero. Des belo di oroh aso ngket blai perwira ene, perwira ene nyemuyu tman-tman iyo nte ngulek epo-Iyo: "Tuan, nang ka repot-repot, koe aku belo di snaron nrima Tuan lang blai ku; ⁷ koe san ku aku belo di snaron ulet epo Iko. Tapi ulek ka erai buku pmensara, jadi batakku pasti ale. ⁸ Koe aku se ulun iwa, ai la imbatku keo lou Prajurit. Ena aku ngulek epo erai kongo Prajurit ene: Malan!, jadi io malan, ai epo erai kongo ulun nua: Ulet!, jadi io ulet, ktine lou epo batakku: Gawi ka endo!, jadi pasti gawi io." ⁹ Des sundok Yesus kringo pmensara ene, Io eran se io, ai ulak skuleng epo ulun deo yo nyarak Io, Iyo ngulek: "Aku ngulek epo ikam, imam yo kolai endo belo pini Aku ruku, tontan ko ekang ulun Israel!" ¹⁰ Ai sundok ulun-ulun yo snuyu ene mulik epo lou, itan io batak ene sundok slomai aut. ¹¹ Sundok ene Yesus malan epo erai kota yo nan karan se Nain. Murid-murid-Iyo malan sama-sama diang Io, ai deo lou ulun beloyun-loyun lumpat-Iyo. ¹² Sundok Io dmpet jawong penyumba kota, keo ulun mate yo nlembar epo baling, pea song pea tunggel ma io yo sundok balu, ai deo ulun ngket kota ene lumpat balu ene. ¹³ Ai des Tuhan kito balu ene timbul kosang lang kesong-Iyo ngke kasian, trus Io bunyal epo balu ene: "Nang nangis!" ¹⁴ Ulak ngompoh yo nlembar ene Io mulem, ai tukang pnglembar-pnglembar ene berhenti, Io ngulek: "O pea burok, Aku ngulek epo iko, nyuli iko!" ¹⁵ Jadi uwat se ulun ene ai tunge ai mulai bunyal, ai Yesus mie io epo ma io. ¹⁶ Eka-eka ulun mne takut ai ngmulia Allah, ulak bunyal: "Erai nabi olai sundok ulet mbo ekang taka," ai "Allah sundok nuntun umat-Iyo." ¹⁷ Jadi sundok tsebar kabar tentang Yesus la pupus Yudea ai la pupus kampong nai nine. ¹⁸ Des Yohanes kuli kabar soal eka-eka kjadian ene ngket murid-murid io, ¹⁹ ia momba duo kongo ulun ngket murid io ai nyemuyu dero ngunti epo Tuhan: "Iko beh yo anta ulet ene ena belo harus be kain minte ulun yo mak?" ²⁰ Des duo kongo ulun ene sampe epo Yesus, dero nguylek: "Yohanes Pembaptis nyemuyu kain ngunti epo-Iko: Iko be yo anta ulet ene ena belo harus be kain minte ulun yo mak?" ²¹ Des ene Yesus deo mmekale ulun ngket bmasam roton ai bmasam roton san ai ding ngket roh-roh triau, diang Io mie pngkito epo deo ulun-ulun posa. ²² Ai Yesus nuing dero: "Malan ka, ai ulekka epo Yohanes ise yo itan kam ai dingo kam: Ulun posa kito, ulun pokung malan, ulun kodong jadi ale, ulun simpong kringo, ulun mate pinosuli ai ulun kao bnie kabar buen. ²³ Ai regok ngayo ulun yo belo jadi noli ai nangkal Aku." ²⁴ Sudok yo suyu Yohanes ene malan, mulai dko Yesus bsara epo ulun deo ene nau umbang Yohanes: "Nte mbe ikam malan epo padang gurun? Epo meti nau bulu yo skukui tapi riut? ²⁵ Ena belo nte ise ikam malan? Meti ulu yo baju solo? Ulun yo baju buen ai yo bolum tatau, awa iyo mbo istana raja. ²⁶ Jadi nte isepo ikam malan? Meti nabi? Beta, ai Aku ngulek epo ikam, ene lengkat se nabi. ²⁷ Koe soal io keo tnulis: Eti ka, Aku nymuyu pngirak-Ku ono se Iko, io anta ngatur boyan-Ko la onon-Ko. ²⁸ Aku ngulek epo ikam: Mbo ekang dero yo kinomekus koe bangbawe ndok belo erai olai se Yohanes, tapi yo paling idik lang krajaan Allah aso olai se io." ²⁹ Eka ulun deo yo nmpaning pmesara-Iyo, ktine lou dero pnage bea nymbeta yo kono ngket Allah, koe dero sundok mie kompu tonga nte Yohanes baptis. ³⁰ Tapi ulun-ulun Farisi ai ahli-ahli torat nangkal ptua Allah epo kompu tonga dero, ngke dero belo kakan baptis Yohanes. ³¹ Ulek Yesus: "Diang ise si anta Aku mrawet ulun-ulun dero endo ai diang ise dero ene sama? ³² Dero ene kati nau bang pea yo tunge mbo pasar ai yo baku bomba: Kain nyiup suling nte ngkam tapi ikam belo dnuyo, kain nyanyi yo luai, tapi ikam belo di nangis. ³³ Koe Yohanes tukang baptis ene ulet, io belo kuman roti ai belo ngisop anggur, ai judi ulekkam: Io snumban ngke setan. ³⁴ Sundok ene oli Pea Ulun ulet, Io kuman diang nisop, jadi ulekkam: eti kam ta, io galak kuman ai tuju ngisop, tman pnage bea ai ulun yo bdosa. ³⁵ Tapi hikmat sinom beta koe eka ulun yo nrima io." ³⁶ Erai kongo ulun Farisi ngirak Yesus nte ulet kuman mbo lou io. Yesus ulet epo lou ulun Farisi ene, trus tunge kuman. ³⁷ Mbo kota ene keo erai kongo ulun bawe yo ulun tau ba se io ene ulun bedosa. Des bawe ene kringo, se Yesus ene desung kuman mbo lou ulun Farisi ene, io ulet moit erai jebul pualan yo atok lenga buen kewo. ³⁸ Ulak nangis io malan ngompoh akat dmpet Yesus, trus ngmbosa botis-Iyo diang olu io ai ngiso diang balo io, trus io ngarok botis-Iyo ai nglenga diang lenga buen kewo ene. ³⁹ Des ulun Farisi yo ngirak Yesus kito nau ene, io bunyal lang kesong io: "Ena Io endo nabi, pasti Io tau, ulun ise bawe yo mulem-Iyo ene; pasti Io tau, se bawe ene ulun bdosa." ⁴⁰ Trus Yesus ngulek epo io. "Simon, keo yo kakan ulek-Ku epo iko." Tuing Simon: "ulekka, Guru." ⁴¹ " Keo duo kongo ulun yo skutang epo ulun tukang mkinjam sen. Yo erai kongo skutang limo jatus dinar, yo mak limo pulu. ⁴² Koe dero belo kuli mayar, jadi io ngapus utang dero duo ene. Ise lelu dero yo paling kosang se io?" ⁴³ Tuing Simon: "Otus ku io yo paling deo yo napus utang io." Ulek Yesus epo io: "Beta ngko ene." ⁴⁴ Ai ulak skuleng epo tadah bawe ene, Io ngulek epo Simon: "Iko kito beh bawe endo? Aku sumba epo lou ko, tapi iko belo mie Aku danum nte mui botis-Ku, tapi io nmbosa botis-Ku diang olu mato ai ngmbrese diang balo io. ⁴⁵ Iko belo dingarok Aku, tapi ngket Aku sumba belo keo brenti io ngarok botis-Ku. ⁴⁶ Iko belo nglenga utok-Ku diang lenga buen kewo, tapi io nglenga botis-Ku diang lenga buen kewo. ⁴⁷ Koe ene Aku ngulek epo iko: Dosa yo deo ene sundok nampun, koe io sundok deo nampa gawi diang kosang. Tapi ulun yo idik nampun, idik lou yo nampa gawi diang kosang." ⁴⁸ Trus yo ngulek epo bawe ene: "Dosa ko sundok nampun." ⁴⁹ Ai dero yo tunge kuman sama-sama Io, ngnanam lang kesong dero: "Ise si Io endo, sampe Io kuli ngampun dosa?" ⁵⁰ Tapi Yesus ngulek epo bawe ene: "Imanko sundok nylamat iko, malan ka diang slamat!"