¹ Des jman ene Yesus akat mbo pantai gentung Genesaret, deo ulun nglekum Iyo kakan nempaning firman Allah. ² Io kito duo prau mbo isan pantai. Pnaket esa ene sundok diwa ai desung mrese jala dero. ³ Io dombo epo lang erai prau ene, yo doko prau Simon, laju nyemuyu io ngenjelu prau ene oro idik-idik se pantai. laju Io tunge ai nutui matuk ulun deo ngket ombon prau. ⁴ Des sundok bunyal, Io ngulek epo Simon: "Btokon epo awa yo lontop ai bewet jala ko nte nangop esa." ⁵ Simon nuing: "Guru, sundok erai malom putub kain bgawi bol psiken belo keo pengkuli ise-ise, tapi koe Iko nte nyemuyu, aku mewet jala nua." ⁶ Des dero sundok mewet jala ene, dero kuli esa mroa, sampe jala dero mulai renset. ⁷ Laju dero nguwai epo tman-tman epo prau yo mak apa dero ulet nte ngawat. dero ene ngompoh, trus dero sama-sama ngatok prau duo ene sampe ponu diang esa sampe duni karom. ⁸ Des Simon Petrus kito nau ene laju io nyongkop onon Yesus ai ngulek: "Tuhan, oro iko ngket aku, koe aku endo ulun deo dosa." ⁹ Koe io diang eka ulun yo sama-sama diang io bengong koe kdeo esa pengkuli dero ene; ¹⁰ Ktine lou Yakobus ai Yohanes Pea-pea Zebedeus io jadi teman Simon. Ulek YEsus epo Simon: "Nang takut, ngket tempo ndo iko nte ngenjala ulun." ¹¹ Sundok dero nyelor prau dero epo tana ombo, dero ngendikah prampu dero, laju lumpat Yesus. ¹² Des Yesus keo lang kota. Ela mne keo ulun roton kodong. Des io kito Yesus, io nyongkop ai tindu: "Tuan, ena Tuan kakan, Tuan kuli mkale aku." ¹³ Laju Yesus nyokoi kayang Io, ngop ulun ene, ai ngulek: "Aku kakan, iko jadi ale." Peles des ene low mapos roton kodong ene. ¹⁵ Tapi nau umbang Yesus tambah oro dningo ai ulet ulun deo bloyun-loyun epo Iyo nte nempaning Iyo ai nte mengkale roton nsan dero. ¹⁶ Tapi Io meto awa yo belo rame nte bdoa. ¹⁸ Laju ulet tenu-tenu kongo ulun moson ulun pokung diang awa pnurui iyo; dero bkomer moit iyo sumba laju pnayak ela ono Yesus. ¹⁹ Koe dero mba di kuli moit sumba koe jut ulun mbo mne, dero dombo epo ombon sapo lou, trus ngugah sapo ene, ai ngului ulun ene diang awa pnurui epo ekang ulun deo pas ela onon Yesus. ²⁰ Des Yesus kito iman dero ene, Iyo ngulek: "O erai buntung, dosa ko sundok nampun." ²¹ Tapi ahli-ahli Torat diang ulun-ulun Farisi ngnanam lang kesong dero: "Ise si ulun yo nguja Allah endo? Ise yo kuli ngampun dosa makse ko Allah bute?" ²² Tapi Yesus tau pngenanam dero, laju ngulek epo dero: "Ise yo kinonanam lang kesong kam? ²³ Ise lelu yo murah, ngulek: dosa ko sundok nampun, ena belo ngulek: uat ka, ai malan ka? ²⁴ Tapi apa ikam tau, se ela dnia endo Pea Ulun keo kuasa nte ngampun dosa"-Trus Io ngulek epo ulun pokung ene -: "Epo iko Aku ngulek, uat engkat awa pnurui ko uli epo lou ko!" ²⁵ Peles des ene low io uat, onon dero, trus ngengkat awa pnurui iyo ai uli epo lou iyo ulak muji Allah. ²⁶ Eka ulun mne ngrengao, trus muji Allah, ai dero takut beta, ulek dero: "Olo ndo kain sundok kito nau umbang yo nembengong beta." ²⁷ Sundok ene, des Yesus baling, Io kito ulun pnage bea, yo keo karan se Lewi, desung tunge mbo lou pnage bea. Yesus ngulek epo iyo: "Iko lumpat Aku!" ²⁸ Lewi laju akat ai ngendikah eka-eka ene, trus lumpat Iyo. ²⁹ Trus Lewi nampa pesta olai nte Iyo mbo low iyo se ai deo pnage bea diang ulun yo mak lumpat kuman diang Iyo. ³⁰ Ulun-ulun Farisi ai ahli-ahli Torat datsan epo murid-murid Yesus, ulek dero: "Ise moko ikam kuman ngisop sama-sama diang pnage bea ai ulun bdosa?" ³¹ Trus tuing Yesus epo dero, ulek Iyo: "Makse ulun slomai yo perlu pngawat roton, tapi ulun yo kroton; ³² Aku ulet belo di momba ulun yo belo keo sala, tapi ulun bdosa, apa dero btobat." ³³ Ulun-ulun Farisi ene ngulek lou epo Yesus: "Murid-murid Yohanes brebo puasa ai sembayang, ene lou murid-murid ulun Farisi, Tapi murid-murid Ko kuman ai ngisop." ³⁴ Tuing Yesus epo dero: "Kuli be tman pnganten song snuyu puasa, pdahal pnganten ene diang dero? ³⁵ Tapi anta sampe des yo, ena pnganten ene nalek ngket dero, des ene doko dero anta puasa." ³⁷ Ktine lou mba di keo ulun ngatok anggur bayu epo lang sut ngket upak yo usang, koe ena ktine, anggur yo bayu ene anta nglopong sut ngket upak ene ai anggur ene nrintin ai sut ngket upak ene pasti lopong. ³⁸ Tapi anggur yo bayu arus nona lang sut upak yo bayu lou. ³⁹ Ndok belo erai ulun yo sundok ngisop anggur yo usang ngeno ngisop anggur yo bayu, koe io pasti ngulek: Anggur yo usang ene yo buen."