¹ Yesus, yo ponuh diang Roh Kudus, uli ngket atang Yordan, laju oit koe Roh Kudus epo padang gurun. ² Mbo mne Io nongos opat pulu olo kola yo ai snoba koe Iblis. Kola mbo mne Io belo kuman ise-ise ai sundok ene Io siet lau. ³ Trus ulek iblis epo-Iyo:" Ena Iko Anak Allah, suyu Ko batu endo jadi roti." ⁴ Tuing Yesus epo iyo: "Keo tenulis: Ulun bolum belo di ngket roti tingen." ⁵ trus io moit Yesus epo awa yo ombo ai lang ekang mato skitop io mekelak epo-Iyo eka kerajaan dnia. ⁶ Ulek Iblis epo-Iyo:"Eka kuasa ene diang kemulian ene anta diye ku epo-Iko, koe eka ene sundok snerah epo aku ai aku miye iyo epo ise lelu iyo petua ku. ⁷ Jadi ena Iko nyembah aku, eka iyo ene anta jadi empun-Ko." ⁸ Tapi Yesus ngulek epo iyo: "Keo tnulis: Iko arus nyembah Tuhan, Allah ko, ai suma epo Iyo bute iko ibadah!" ⁹ Trus iyo moit Yesus epo Yerusalem ai mayak Io ban bungan Bait Allah, trus ngulek epo-Iyo: "Ena Iko Anak Allah, ptoyak kompu-Ko ngket ndo epo iwa, ¹⁰ koe keo tnulis: nau umbang Iko, Io anta nyemuyu malaikat-malaikat-Iyo nte ngenjaga Iko, ¹¹ ai dero anta nyambut Iko diang kayang iyo, apa botis-Ko nang mitek batu." ¹² Yesus nuingiyo, ulek-Iyo:"Keo Firman: Nang iko nyoba Tuhan, Allah ko!" ¹³ Sundok Iblis mekabis eka pencobaan ene, io mundur ngket-Iyo ai minte jeman yo buen. ¹⁴ Lang kuasa Roh mulik Yesus epo Galilea. Trus deo keringo soal Iyo mbo lekum dnie mne. ¹⁵ Des ene Iyo nutui matuk mbo blai-blai ibadat mbo mne eka ulun muji Iyo. ¹⁶ Io ulet epo Nazaret awa Io olai anjang, ai kati penepet-Iyo des olo Sabat Io sumba epo blai ibadat, trus akat kakan ngembaca Alkitab. ¹⁷ Epo Iyo dnie kitab nabi Yesaya ai sundok ingkang-Iyo, Io ruku tulisan, mbo mne keo tnulis: ¹⁸ "Roh Tuhan keo mbo-Aku, koe ene Io sundok ngurapi Aku, nte mesampe kabar buen epo ulun-ulun kao, ai Io sundok nyemuyu Aku ¹⁹ nte nyampe kabar bebas epo ulun-ulun tawanan, ai pengkito nte ulun-ulun posa, nte nglepas ulun-ulun yo tnindas, nte nyampe kabar taun rahmat Tuhan sundok ulet." ²⁰ Trus Io nokom kitab ene, miye yo nua epo petugas laju tunge; trus eka mato ulun lang lou ibadat ene betadah epo- Iyo. ²¹ Trus Io mulai nutui matuk dero, ulek-Iyo:"Des olo ndo sampe atok tulisan ene des ikam kringo iyo." ²² Ai eka ulun ene ngembeta Iyo ai dero eran kesah surah yo buen yo kenesah koe Iyo, trus ulek dero:"belo be Io endo pea Yusuf?" ²³ Trus Io ngulek epo dero: "Pasti ikam anta ngulek sempelo endo epo Aku: O' tabib, pkale Ko kompu tonga-Ko se. Gnawi mbo mndo lowu, mbo awa pengulet-Ko endo, eka yo dingo kain yo sundok terjadi mbo Kapernaum!" ²⁴ Trus ulek Iyo nua: "Aku ngulek epo ikam, sebeta yo belo keo nabi yo keo uman mbo awa pengulet iyo se. ²⁵ Trus Aku ngulek epo ikam, ai ulek-Ku endo beta: Des jman Elia keo deo bawe balu mbo Israel des langit btokom kola tolu taon onom bulan des musim lau yo deras kono pupus negeri. ²⁶ Tapi Elia senuyu makse epo nte erai kongo ulun ngket dero, tapi epo erai bawe balu mbo Sarfat, ela tana Sidon. ²⁷ Ai des jman nabi Elisa deo ulun kodong mbo Israel ai ndok belo erai kongo ngket dero yo pinokale, suma Naaman, ulun Siria ene." ²⁸ Kringo ene mara beta eka ulun yo mbo blai ibadat ene. ²⁹ Dero akat, trus ngusa Yesus epo baling kota ai moit Iyo epo kerbing tunden, awa kota ene keo, nte nurak Iyo ngket kerbing ene. ³⁰ Tapi Io malan lalo ngket ekang dero laju brangkat. ³¹ Sundok ene Yesus malan epo Kapernaum, kota mbo Galelia, trus nutui matuk mbo mne des olo-olo Sabat. ³² Dero eran kringo tutui batuk-Iyo, koe kesah surah Iyo roa kuasa. ³³ Mbo lang lowu ibadat ene keo erai kongo snumban ai iyo nyoyar diang oyon riyes: ³⁴ "O' Iko, Yesus ulun Nasaret, ise urusan-Ko diang kain? Iko ulet kakan ngebenasa kain? Aku tau ise Iko: Yo Kudus ngket Allah." ³⁵ Tapi Yesus ngusa diang ries, ulek-Iyo."Suni, baling ngket iyo!" ai timpa setan ene doko oli ulun ene epo ekang ulun deo, laju baling ngket iyo ai belo mesiyet iyo. ³⁶ Jadi eka ulun eran,trus bekesah dero sama dero, ulek dero:" bukan main kehebat pemesara yo ene! Koe diang roa wibawa ai kuasa Io mrenta epo roh-roh jahat ai dero baling oli. ³⁷ Ai sampe kabar soal Iyo epo mone-mone mbo daerah ene. ³⁸ Sundok ene Io ngendikah blai ibadat ene trus brangkat epo blai Simon, des ene ampu Simon yo bawe mekom payah trus dero tindu epo Yesus apa ngawat iyo. ³⁹ Jadi Io akat mbo isan bawe ene, trus ngusa mekom ene, trus roton ene ngendikah iyo. Bawe ene peles uwat ai ngelayan dero. ⁴⁰ Des mato olo tonop, eka ulun moit epo-Iyo ulun-ulun dero yo kroton, yo kono bemasam jenis roton, Io mayak kayang-Iyo ombon tongku dero ai mkale dero. ⁴¹ Ngket deo ulun baling low setan-setan ulak nyoyar: "Iko ene Pea Allah," trus Io diang bol ngusan dero ai belo miye dero bsara, koe dero tau se Iyo ene Mesias. ⁴² Des olo molo,Yesus brangkat trus malan epo awa yo lengoh. Tapi ulun deo meto Iyo, trus ruku-Iyo ai ngomer nangkeng Iyo apa nang ngendikah dero. ⁴³ Tapi Io ngulek epo dero: " mbo kota-kota yo mak lou Aku arus nyampe Injil Kerajaan Allah koe nte ene doko Aku senuyu." ⁴⁴ Ai Iyo nyampe Injil lang blai-blai ibadat mbo Yudea.