¹ Laju akat eka-eka ulun bgumpul ene ai Yesus noit ngadap Pilatus. ² Mbo mne dero mulai nundruh Io, ulek dero: "Sundok dapet kain, se ulun endo mktang bangsa kain, ai ngusan mayar pajak epo Kaisar, diang Io ngulek, se Io se ene Kristus, yo doko raja." ³ Pilatus ngunti epo-Iyo: "Iko be raja ulun Yahudi?" Tuing Yesus: "Iko se doko ngulek ene aut." ⁴ Ulek Pilatus epo imam-imam pngutok diang eka-eka ulun deo ene: "Aku ndok belo ise-ise keo kuli yo sala mbo Song endo." ⁵ Tapi dero tambah kois maksa ptua dero, ulek dero : "Io nampa belo tenang rayat ene diang tutui batuk-Iyo mbo pupus Yudea, Io mulai mbo Galilea ai sundok sampe mndo." ⁶ Des Pilatus kringo ene io ngunti, ulun Galilea be Song ene. ⁷ Jadi des io tau se Yesus ulun ngket awa yo sumba lang awa aturan ukum Herodes, io ngirim Yesus ngadap Herodes, yo des ene keo low mbo Yerusalem. ⁸ Des Herodes kito Yesus, io ego beta. Koe ola aut io kakan kito Yesus, koe io jono kringo soal Io, aso nua io klawo beta kito ktimbe nau Yesus nampa tanda ajaib. ⁹ Deo unti io epo Yesus, tapi Yesus ndok belo nuing ise-ise. ¹⁰ Des ene imam-imam pngutok diang ahli-ahli Taurat malan epo ono ai mkitek tundruh-tundruh yo boyat epo Io. ¹¹ Des ene mulai doko Herodes diang pasukan io nyruna ai ngreko Io, io nyua pakaian ulun keo pangkat epo Io trus nmpuli Io nua epo Pilatus. ¹² Des olo ene low Herodes diang Pilatus btman; onon se ene dero bako tulan. ¹³ Trus Pilatus ngumpul imam-imam pngutok diang pngntuo-pngntuo ai rayat, ¹⁴ ulak ngulek epo dero: "Ikam sundok moit Song endo epo aku sama kati ulun yo beta-beta ngayak rayat epo yo sala. Ikam se kito se aku sundok mresa-Iyo, ai ngket sala-sala yo tundruh kam epo-Iyo mba keo aku kuli mbo-Iyo. ¹⁵ Ai Herodes belo low, koe ene io nmpuli Io epo kain. Jadi beta-beta belo di keo gawi gata-Iyo yo sngkono diang ukuman pnate. ¹⁶ Koe ene aku anta ngrempuk Io, trus ngutis-Iyo. ¹⁷ [ Koe Pilatus belo kate belo ngutis erai kongo ulun nte dero des olo raya ene.] ¹⁸ Tapi dero sama-sama ngulek diang oyon ries : "Pate ka Io, utis ka Barabas nte kain!" ¹⁹ Barabas endo pinosumba lang pnjara koe keo soal nglawan pmrenta lang kota ai koe ngmpate. ²⁰ Sindai nua Pilatus bsara diang oyon ries epo dero koe io kakan ngutis Yesus. ²¹ Tapi dero males io diang oyo ries, ai ngulek: "Snalib ka Io, snalib ka Io!" ²² Endo mmtolu derang yo Pilatus ngulek epo dero: "Ise yo beta-beta dat sundok gawi gata ulun endo? Mba keo aku ruku yo sala mbo Io, yo sngkono diang ukuman pate. Koe ene aku anta ngrempuk Io, trus ngutis-Iyo." ²³ Tapi diang oyon ries dero maksa ai tindu belo kate belo, apa Io snalib, jadi pnyundok-iyo oli dero kuret diang oyon ries dero ene. ²⁴ Jadi Pilatus mie ukuman ngaya kati ptua dero ene. ²⁵ Trus io nmbaling ulun yo pinosumba lang pnjara koe nglawan pmrenta diang koe ngmpate ene kati yo ptua dero, tapi Yesus srah io epo dero nte gawi kati mbo ptua-ptua dero ka oli. ²⁶ Des dero moit Yesus, dero nahan erai kongo ulun yo keo karan se Simon ngket Kirene, yo bayu sumba kota, laju mayak salib ene ban pluko io, apa io moson salib ene ulak nyarak Yesus. ²⁷ Deo jut ulun nyarak Io; keo low mne deo bang bawe yo nangis nungul nte Io. ²⁸ Yesus skuleng epo dero ai ngulek: "O bawe-bawe Yerusalem, nang kam tangis Aku, tapi alo ikam nangis nte kompu tonga kam se diang pea-pea kam! ²⁹ Soba eti ka, anta sampe des-iyo ulun ngulek: "Buen beta san bawe yo aloi ai yo blai pea io belo pini mekus, diang tete-iyo yo belo pini nete. ³⁰ Des ene ulun anta mulai ngulek epo tunden-tunden: "Rurun ta nyngkinan kain! ai epo tngglung-tngglung: Taur ta kain! ³¹ Koe ena ulun ktine gawi epo kayu bolum, ise yo anta tkono diang kayu pate?" ³² Ai keo low noit duo kongo ulun yo mak, yo doko duo kongo yo tuju gawi triaw nte ukum pate sama-sama diang Io. ³³ Des dero sampe mbo awa yo nan karan se Tulang Utok Koreng, dero nyalib Yesus mbo mne ai low duo kongo ulun yo tuju gawi triaw ene, yo erai kongo mbo tadah sanan-Iyo diang yo mak mbo tadah sei-Iyo. ³⁴ Des ene Yesus ngulek: "Bapa, nampun ka dero ene, koe dero mba di tau ise yo gawi dero ene." Ai dero motak undi nte smbagi pakaian-Iyo. ³⁵ Ulun deo akat mbo mne ai kito ba eka-eka nau ene. Tapi pngutok-pngutok ngebek Io ai ngulek: "Ulun mak awat Io, koe ka tempo ndo Io ngawat kompu tonga Io se, ena beta Io ene Mesias, ulun yo pili Allah." ³⁶ Prajurit- prajurit ene ngreko-ngreko Io low; dero mie Io anggur mosom epo-Iyo, ³⁷ ulak ngulek : "Ena Iko endo raja ulun Yahudi, nawat kompu tonga-Ko se!" ³⁸ Keo low tulisan ombon utok-Iyo: "Endo doko raja ulun Yahudi". ³⁹ Erai kongo ngket ulun yo triaw gawi yo gneweng ene nyruna Io, ulek-iyo: "Mak be Iko endo Kristus? Awat ta kompu tonga-Ko se ai kain!" ⁴⁰ Tapi yo erai kongo ngae io, ai ngulek: "Belo be iko takut, belo low epo Allah, ulak iko kono ukuman yo sama? ⁴¹ Taka memang arus nukum, koe taka kono bales yo sngkono diang gawi taka, tapi ulun endo belo di keo nggawi yo sala." ⁴² Laju io ngulek: "Yesus, knop-knop se aku deh, ena Iko ulet jadi Raja." ⁴³ Ulek Yesus epo-iyo : "Aku ngulek epo iko, beta-beta yo se olo ndo peles iko jadi diang Aku mbo lang Firdaus." ⁴⁴ Des ene olo sundok kira-kira jam duo blas, laju jadi seom mupus dnia mne sampe jam tolu, ⁴⁵ koe mato olo belo keo pa. Ai dinding pngekang Bait Suci woka sindai. ⁴⁶ Trus Yesus bsara diang oyon ries: "O Bapa, epo lang kayang-Ko Aku nyrah kesong-Ku." Sunduk bsara ktine Io nyrah kesong-Iyo. ⁴⁷ Des pngutok pasukan ene kito ise nau umbang ene, io ngmulia Allah, ulek io: "Beta-beta, ulun endo ulun buen yo mba di keo sala." ⁴⁸ Ai sundok eka-eka ulun deo, yo ulet ngrpudu mne nte meti nau ene, kito ise nau umbang ene, uli ka dero oli ulak nopap-nopap kompu dero se. ⁴⁹ Eka ulun yo tau ngket dmpet se Yesus, ktine low bang bawe yo nyarak Io ngket Galilea, akat oro-oro ai kito eka-eka nau ene. ⁵⁰ Keo erai kongo ulun nan karan se Yusuf. Io anggota Majelis Besar, ai ulun yo buen ulak jujur. ⁵¹ Io belo di sngkono pngnanam diang putusan ai gawi Majelis ene. Io ngket Arimatea, kota Yahudi ai io minte-minte Krajaan Allah. ⁵² Io malan ngadap Pilatus diang tindu antu Yesus. ⁵³ Des sundok io mdiwa antu ene, io ngmbungkus antu ene diang diris lenan, laju mlumbi antu ene mbo lang kubur yo knali mbo lang tunden batu, yo langne belo pian pini pinolumbi antu. ⁵⁴ Olo ene olo nngkakas koe Sabat duni mulai. ⁵⁵ Ai bang bawe yo ulet sama-sama diang Yesus ngket Galilea, lumpat low ai dero kito kubur ene diang ktimbe nau antu Yesus pinolumbi. ⁵⁶ Des sundok uli dero nydia rmpa-rmpa diang lnga mur. Ai des olo Sabat dero smole kati aturan Taurat.