¹ Tapi ma ma beta olo Minggu tla ene dero malan epo kubur moit rempa-rempa yo sundok senedia dero. ² Dero ngeruku batu yo sundok selungkang ngket kubur ene, ³ Des sundok sumba dero belo di ruku antu Tuhan Yesus. ⁴ Desung dero akat rngngao koe nau ene, kolan-kolan keo duo ulun akat dmpet dero makai diris ngrensilau. ⁵ Dero takut beta ai nyeluot utok, tapi duo kongo ulun ene ngulek epo dero: " ise moko ikam meto Iyo yo bolum, mbo ekang ulun mate? ⁶ Io belo keo mbo mendo, Io sundok nyuli. knop ta ise yo ulek-Iyo epo ikam, des Io aso mbo Galilea, ⁷ yo ene se Pea Ulun arus senerah epo kayang ulun-ulun bedosa ai senalib, ai anta nyuli mbo olo yo ketolu." ⁸ Jadi knop doko dero oli se pemesara Yesus ene. ⁹ Ai sundok dero uli ngket kubur, dero ngesah eka soal ene epo sebelas murid ai epo eka erai buntung yo mak. ¹⁰ Bawe-bawe ene yo doko Maria ngket Magdala, ai Yohana, ai Maria ine Yakobus. Ai bawe-bawe yo mak lou yo sama-sama diang dero nyampe nau ene epo rasul-rasul. ¹¹ tapi mbo dero pengesah-pengesah ene kati nau pemesara opaw ai dero belo persaya epo bawe-bawe ene. ¹² Beta ko ktine Petrus uat, trus resi-resi malan epo kubur ene. Des io ngelenget epo dalom, io kito diris bura tingen. Trus io malan uli, ai io ngunti lang kesongiyo se ise moko tau ktine. ¹³ Des olo ene lou duo kongo ngket murid-murid Yesus malan epo kampong nan karan se Emaus, yo bangsa sebelas kilu korohiyo ngket Yerusalem, ¹⁴ ai dero bekesah-kesa eka nau umbang yo sundok terjadi ene. ¹⁵ Des dero desung bekesah-kesah ai berondeng, ulet doko Yesus se ngompoh dero, trus malan sama-sama diang dero. ¹⁶ Tapi keo nau yo nyelingu mato dero, moko dero belo kuli tau se Io. ¹⁷ Yesus ngulek epo dero: " ise kesah kam ulak malan ene?" Nongos ile doko dero diang wae nyoru. ¹⁸ Erai kongo ngket dero, karaniyo Kleopas, nuing-Iyo: " Iko bute be ulun penyumba mbo Yerusalem, yo belo tau ise yo terjadi la mne mbo olo bayu-bayu endo?" ¹⁹ Ulek-Iyo epo dero : "Ise ene?" Tuing dero: " Ise yo terjadi diang Yesus ulun Nazaret. Io ene nabi, yo keo kuasa lang gawi gata ai pemesara ela onon Allah ai ela onon eka bangsa kain. ²⁰ Tapi imam-imam pengutok ai pengentuo-pengentuo kain sundok miye Io nte ukum pate ai dero sundok nyalib-Iyo. ²² Tapi tenu-tenu bang bawe ngket kain sundok nekojet kain: manin ma beta dero sundok malan epo kubur, ²³ ai belo ruku antu-Iyo. Trus dero ulet diang pengesah, se sundok melak epo dero mlekat-mlekat, yo ngulek, se Io bolum. ²⁴ Ai tenu-tenu kongo teman kain sundok malan epo kubur ene ai ngeruku, se beta memang yo kesah bang bawe ene, tapi Io belo dero kito." ²⁵ Trus Io ngulek epo dero: "O ikam ulun bungang, moko poyoh beta kesong kam, moko ikam belo persaya nau eka ene, yo sundok nulek koe nabi-nabi. ²⁶ Belo be Mesias arus kiso kanam sesa, eka-eka ene nte sumba lang kemuliaan-Iyo?" ²⁷ Trus Io ngenjelas epo dero ise yo tenulis nau Io lang pupus Kitab Suci, mulai ngket kitab-kitab Musa ai eka kitab nabi-nabi. ²⁸ Dero duni ampe aut se kampong yo pengitek dero, trus Io ungka-ungka nau kakan nerus dalan-Iyo. ²⁹ Tapi dero maksa-Iyo beta, ulek dero: " nongos ka diang kain, koe olo sundok nayap ai mato olo duni tonop." Trus sumba ka Io nte nongos sama-sama diang dero. ³⁰ Des Io tunge kuman diang dero, Io ngalek roti, ngulek berkat, trus ngerinsi-rinsi ai miye epo dero. ³¹ Des ene lou wingkang mato dero ai dero oli tau se Io tapi Io mapos ngket ekang dero. ³² Ulek dero epo sama dero: "belo be kesong taka ngregudu, des Io bunyal diang taka ela tenga boyan ai des Io ngenjelas Kitab Suci epo taka?" ³³ Trus dero beraduh ai trus uli nua epo Yerusalem. La mne dero ngeruku sebelas murid ene. Dero desung bekumpul sama-sama diang teman-teman dero. ³⁴ Ulek dero ene : "Sebetaiyo Tuhan sundok nyuli ai sundok mekelak kompu Iyo se epo Simon." ³⁵ Trus keduo ulun ene lou ngesah ise yo terjadi mbo tenga boyan ai ktimbe dero tau se Io mbo des Io ngerinsi-rinsi roti. ³⁶ Ai desung dero bekesah surah nau umbang ene, Yesus kolan-kolan akat ela ekang dero ai ngulek epo dero: "Damai sejahtera nte ngkam!" ³⁷ Dero tekojet ai takut ai ngomoy se dero kito uwok. ³⁸ Tapi Io ngulek epo dero: "Ise moko ikam tekojet ai koe ise moko ulet kerong-kerong lang kesong kam? ³⁹ Eti ta kayang-Ku ai botis-Ku: Aku se endo; bulem ka Aku ai eti ka, koe uwok belo keo isi ai tulangiyo, kati yo itan kam keo mbo Aku. ⁴⁰ Ulak ngulek ktine, Io mekelak kayang ai botis-Iyo epo dero. ⁴¹ Ai des dero belo pian persaya koe kanam ego ai nokon eran, ngulek doko Io epo dero: " Keo be ela ikam nte okan singkap mbo mendo?" ⁴² Trus dero miye epo-Iyo erai totok sanga esa. ⁴³ Io ngalekiyo ai kumaniyo mbo onon wae dero. ⁴⁵ Trus Io ngingkang akal dero, apa dero tau Kitab Suci. ⁴⁶ Ulek-Iyo epo dero: "Keo tenulis ketindo: Mesias arus beta-beta sesa ai nyuli ngket ekang ulun mate mbo des olo ketolu, ⁴⁷ ai nua: lang karan-Iyo knabar nau tobat ai ampunan dosa arus snampe epo eka bangsa, mulai ngket Yerusalem. ⁴⁸ Ikam doko saksi nte nau eka-eka endo. ⁴⁹ Ai Aku anta ngirim epo ikam ise yo jenanji koe Bapa-Ku. Tapi ikam arus nongos mbo lang kota endo ampe ikam pinolengkap diang kuasa ngket ombo." ⁵⁰ Trus Yesus moit dero epo baling kota ampe dmpet Betania. Mbo mne Io nente kayang-Iyo epo ombo ai miye berkat epo dero. ⁵¹ Ai des Io desung miye berkat epo dero, Io bepisah ngket dero ai rengkat epo sorga. ⁵² Dero sujud nyembah epo-Iyo, trus dero uli epo Yerusalem diang ego beta. ⁵³ Dero dor keo ela mbo lang Bait Allah ai ngemulia Allah.