¹ Olo raya roti belo makai ragi yo nulek Paskah, sundok dmpet. ² Pngutok-pngutok imam diang ahli-ahli Torat meto boyan, ktimbe akal dero apa kuli ngempate Yesus, koe dero takut se ulun deo. ³ Iblis sumba epo lang kompu Yudas, yo karan se Iskariot, erai kongo ngket lang duo blas kongo murit ene. ⁴ Yudas ulet epo pngutok-pngutok imam diang pngutok pnjaga bait Allah ai brondeng diang dero, ktimbe io kate kuli nyerah Yesus ene epo dero. ⁵ Dero ego beta laju bsngkono nte mie tenu-tenu kroa sen epo io. ⁶ Ene sngkono mbo io, mulai ngket ene io meto jman yo buen nte nyrah Yesus epo dero, apa belo tnoan mbo ulun deo. ⁷ Sampe des olo raya Roti Belo Bragi, yo ene olo ulun arus nymble domba Paskah. ⁸ Yesus nyuyu Petrus diang Yohanes, ulek-Io "Daro ikam, gadoh kam prjamuan Paska nte taka apa taka kuman." ⁹ Ulek dero epo-Io: "mombe ptua Ko awa kain gadoh yo?" ¹⁰ Tuing-Io: "Ena ikam sumba epo lang kota, ikam nindo ruku diang ulun yo moson tpayan batok danum. sarak kam io epo lang lou yo pnyumba io, ¹¹ ai ulek kam epo yo mpun lou ene: Guru ngunti epo iko: mombe rndong nte awa-Ku diang murid-murid-Ku nindo kuman Paskah? ¹² nindo ulun ene nutuy epo ikam se keo awa ela loteng yo olai ai sundok lngkap, mne ikam arus gadoh yo." ¹³ Ngket ne dero brangkat, dero ruku eka yo kati ulek Yesus epo dero ene. bayu dero gadoh nte Paskah. ¹⁴ Des sampe jman yo, Yesus tunge kuman breok diang rasul-rasul-Io. ¹⁵ Ulek-Io epo dero: "Aku ngno beta kuman Paskah endo kerai diang ikam, onon se Aku mndrita. ¹⁶ Koe ene Aku ngulek epo ikam: Aku belo anta kuman iyo oli sampe yo kuli pnyundok iyo lang Krajaan Allah. ¹⁷ ngket ene Io ngalek ktowong anggur ngulek sukur, laju ngulek: "Alek endo laju bagi epo eka-eka ikam. ¹⁸ Koe ene aku mere epo ikam: mulai ngket tempo ndo Aku belo anta ngisop oli asil tonga anggur sampe Krajaan Allah sundok ulet." ¹⁹ Sundok ene Io ngalek roti, Ngulek sukur, ngrinsi-ngrinsi yo bayu mie epo dero, ukek-Io: "Endo doko kompu-Ku yo snrah nte ngkam; gawi kam kati endo nte mknop se Aku." ²⁰ Ktine low nau gawi-Io se ktowong anggur mbo sundok kuman, Io ngulek "ktowong anggur endo doko pmkat bayu koe daya-Ku, yo smalir nte ngkam. ²¹ Tapi, eti kam, tangan ulun yo nyrah Aku, keo kerai diang Aku mbo meja endo. ²² Koe Pea Ulun memang nte mate kati yo sundok rnsana Allah, tapi ssa beta yo ulun ene, yo koe yo Aku snrah!" ²³ Ngket ne oli dero mulai bsoal, ise lelu dero yo anta keo gawi ktine. ²⁴ Dero sampe ruok rame sama dero murid-murid Yesus, ise lelu yo paling noun ngket dero. ²⁵ Yesus ngulek epo dero: "Raja-raja bangsa-bangsa mimpin rayat dero ai ulun-ulun yo bkuasa epo dero nulek pelindung-pelindung. ²⁶ Tapi ikam belo di ktine, malah ka ube ise ikam yo paling kinonuon moko yo nte jadi yo paling burok ai pngutok nte playan. ²⁷ Koe ise yo paling nuon: yo tunge kuman be, yo nglayan be? Mak be ube yo tunge kuman? Tapi Aku keo mbo ekang ikam nte jadi playan. ²⁸ Ikam ene yo nokon nongos sama-sama diang Aku lang bjnis pngkono yo kono mitek Aku. ²⁹ Diang Aku nte nentu hak-hak Krajaan nte ngkam, sama kati Bapa-Ku nentu yo nte Oki. ³⁰ Se ikam ene anta kuman ai ngisop kerai meja diang Aku lang Krajaan-Ku diang ikam anta nte tunge la ombon tahta nte ngakim duo blas suku Israel. ³¹ Simon, Simon, eti ko! Iblis sundok tindu nte niau iko kati gandong, ³² tapi Aku sundok bdoa nte ngko, apa imanko nang rorop. diang iko, ena iko sundok tobat, pturon ko nau erai buntung-erai buntung ko." ³³ Tuing Petrus: "Tuhan, aku ronu nte lang pnjara ai mate sama-sama diang Iko!" ³⁴ Tapi Yesus Ngulek: "Aku ngulek epo iko, Petrus, olo ndo piak belo anta kluat, ena iko belo pian sampe tolu derang belo ngaku se iko kenal se Aku." ³⁵ Ngket ne Io ngulek epo dero: "Des Aku ngirim ikam ulak belo moit panan epok, nguyu ai trumpak, keo be ikam kiso kanam kurang kambit?" ³⁶ Tuing dero: " belo nempia." Ulek-Io epo dero: "Tapi tempo endo, ise yo keo epok, moko yo noit oli, ktine lou yo keo nguyu, ai ise yo belo nan ise-ise, diris laung yo jnual nte moli mndau. ³⁷ Koe Aku ngulek epo ikam, se tulisan lang Kitab Susi endo arus pinognap mbo Aku: Io ene nindo taro itung mbo ekang ulun paro nglawan. Koe ise yo sundok tnulis soal Aku ene desung pinognap." ³⁸ Ulek dero: "Tuhan, ndo duo mndau." Tuing-Io: "puli ka ene aut." ³⁹ Ngket ne Yesus bju epo baling se kota kati jati Io epo tadah Tunden Zaitun. Murit-murit-Io nyendikui Io low ⁴⁰ Des sampe mbo mne Io ngulek epo dero: "Bdoa ikam apa ikam belo toyak epo lang pngkono pngkna." ⁴¹ Ngket ene Io bseing se dero bangsa koro batu tnurak koro yo, bayu Io blutut ai bdoa, Ulek-Io: ⁴² "Ya Bapa-Ku, Ena Iko kakan, alek ka ktowong endo ngket Aku; tapi makse ptua-Ku, tapi Ptua-Ko se yo jadi." ⁴³ jadi erai kongo mlekat ngket langit mmkelak kompu epo-Io nte ngawat mronu pngnanam- Io. ⁴⁴ Io kiso kanam takut beta ai tambah bdoa beta-beta. Panas-Io jadi kati daya ngrjonjon epo tana. ⁴⁵ Ngket ene Io akat ngket bdoa laju mulik ngompoh murit-murit-Io, tapi Io ruku dero desung turui koe kanam nyoru. ⁴⁶ Ulek-Io epo dero: "Ise moko ikam turui? Ruko ai bdoa ikam, apa ikam nang toyak epo lang pngkono pngkna. ⁴⁷ Des Yesus desung bunyal, sulet ulun erai rombongan, murit -Iyo yo karan se Yudas, erai ngket lang duo blas kongo murit ene, malan ela onon dero. Yodas ngompoh Yesus nte ngarok-Iyo. ⁴⁸ Ulek Yesus epo iyo: " O Yudas, iko nyrah Pea Ulun diang arok olam? ⁴⁹ Des dero yo kerai diang Yesus kito nau ene, dero ngulek: "Tuhan, Ktimbe ena kain nglawan dero diang mndau?" ⁵⁰ Laju keo erai kongo ngket ekang dero naris anak bua Pengutok Imam ene sampe bekat tlingo sanan iyo. ⁵¹ Tapi Yesus ngulek: "Sdang ene." laju Io ngop tlingo ulun ene nte mkale iyo. ⁵² Yesus ngulek epo pngutok-pngutok imam diang pngutok-pngutok pnjaga Bait Allah ai bang tuo-tuo yo lumpat kakan nangop Io ene, Ulek-Iyo: "Otus kam Aku endo ulun akal triau be, moko ikam ulet diang panan mndau ai glgada? ⁵³ Moko tongku olo Aku keo mbo ekang ikam mbo lang Bait Allah, belo ikam di nangop Aku. Tapi endo memang des iyo ngkam, ai endo memang jman nte kuasa setan ene. ⁵⁴ Dero nangop Yesus laju moit-Iyo ngket mne. Io noit epo lou Pngutok Imam. Petrus nyendikui ngket oroh. ⁵⁵ Mbo tenga natar lou ene ulun ngimun api, tunge nglekum api ene. Petrus mne low tunge mbo ekang dero ⁵⁶ Keo ulun batak bawe kito se io tunge dmpet api; io nympti, laju ngulek: " Ulun endo jati lumpat diang Io low." ⁵⁷ Tapi Petrus belo di ngangkan, Ulek iyo: "Makse, aku belo tau se Io ene!" ⁵⁸ Tapi belo ola ngket ene ulun yo mak kito low se io laju ngulek: "Iko low ulun ngket dero ene!" Tapi Petrus Ngulek: "Mak, makse aku ene!" ⁵⁹ Bangsa erai jam ngket ene erai kongo ulun yo mak ngulek diang tgas: "beta io memang, ulun endo io kerai diang Io, koe io ene low ulun Galilea." ⁶⁰ Tapi Petrus ngulek: " Mak, aku belo tau ise yo kesah ko ene." Des desung io ngulek ktine, piak kluat. ⁶¹ Montuk diang ene Yesus skuleng meti Petrus. Bayu Petrus Knop se Tuhan sundok ngulek epo iyo: "Onon se piak kluat olo ndo, iko sundok tolu derang belo ngangkan tau se Aku." ⁶² Ngket ne io epo baling se natar, laju nangis diang kanam nyoru beta. ⁶³ Ulun-ulun yo nahan Yesus, ngeko Io ai mupuk ngatang-Iyo. ⁶⁴ Dero nokom wae-Iyo laju ngunti: "Soba ontus ko ise llu kain yo nyagur Iko?" ⁶⁵ Ai deo ka aso uja yo ulek dero epo-Iyo. ⁶⁶ Des olo molo tuo-tuo sidang bangsa Yahudi bkumpul diang pngutok-pngutok imam ai ahli-ahli torat, bayu dero mkadap Iyo epo Mahkamah Agama dero, ⁶⁷ Ulek iyo: "Ena Iko ene memang Mesias, ulek-Ko ka epo kain." Tuing Yesus: "Tontan di nulek koe-Ku, ikam belo anta di prsaya; ⁶⁸ ai tontan Aku ngunti ise-ise epo ikam, ikam belo anta di keo tuing. ⁶⁹ Ngket tempo ndo Pea Ulun sundok tunge ela tadah sanan Allah yo Paling Bkuasa." ⁷⁰ Ulek dero eka-eka: "Ena ktine, Iko endo Pea Allah?" Tuing Yesus: "Ikam se yo ngulek aut, se Aku ene Pea Allah." ⁷¹ Ulek ke dero nua: "Ise nte taka inte aso? Taka sundok kringo otang ene ngket lang bowa-Iyo se."