¹ Des Yesus uat wae-Iyo, Io meti ulun-ulun tatau ningkos sen dero epo lang awa persembahan. ² Ai Io meti low erai kongo balu kao ningkos duo peser epo lang awa persembahan ene. ³ Laju Io ngulek: "Beta-beta yo Aku ngulek epo ikam, se balu kao endo mie pawak roa se eka-eka ulun mne. ⁴ Koe eka-eka dero mie sen dero ngket pngkeo mroa ogot dero, tapi ulun balu endo mie ngket bolum belo ba, ndok ube sampe io mie eka-eka pngkeo-iyo." ⁵ Des tenu-tenu kongo ulun bsara nau Bait Allah ai gawal beta se lou ene yo tnako diang batu yo buen-buen ai diang deo jnis kakas persembahan, Yesus doko ngulek: ⁶ "Ise yo itan kam mne - anta sampe olo-iyo des nte ndok belo erai batu yo nokon bepayak ombon batu yo mak, tapi eka-eka ene anta pinororos." ⁷ Jadi murid-murid ngunti epo Yesus, ulek dero: "Guru, kola ene anta terjadi? Ai ise nau tanda iyo ena ene anta terjadi?" ⁸ Tuing-Iyo: "Jaga beta-beta memang, apa ikam nang bkoit epo yo sala. Koe deo anta ulun ulet diang makai karan-Ku ai ngulek: Aku doko Io, ai: Des-iyo duni aut. Nang beta ikam lumpat dero. ⁹ Jadi ena ikam kringo nau prang ai paronglawan, nang ka ikam tkojet. Koe eka-eka ene arus terjadi ile, tapi ene belo di pian pnyundok-iyo se duni aut." ¹⁰ Io ngulek epo dero: "Bangsa anta uat nglawan bangsa ai krajaan nglawan krajaan, ¹¹ ai anta keo klakui ries ai mbo mone-mone awa anta keo roton pripit ai suyung, ai anta keo low nau umbang yo nkojet-nkojet diang tanda-tanda yo ebat ngket langit. ¹² Tapi onon eka-eka ene ikam anta tnangop ai knurow; ikam anta snerah epo lou-lou awa sembayang ai sper-sper, ai anta ikam noit ngadap raja-raja ai pmerenta-pmerenta koe karan-Ku. ¹³ Koe ktine ene doko anta jadi des yo buen nte ngkam bsaksi. ¹⁴ Koe ene tnang ka lang kesong kam, apa nang ikam ngnanam ono nte ngkam tuing. ¹⁵ Koe Aku se anta mie epo ikam pmensara diang pentau, apa ikam belo di dapet lawan ai psala ulun yo ngebali ikam. ¹⁶ Ai ikam anta snerah low koe ulun tuo kam, eraibuntung-eraibuntung kam, ampi ompang kam ai tman-tman kam ai tenu-tenu kongo ikam ene anta pnate, ¹⁷ ai anta eka-eka ulun kekoi se ikam koe karan-Ku. ¹⁸ Tapi ndok belo erai buti balo utok kam anta mapos. ¹⁹ Ena ikam nokon tahan, ikam anta kuli bolum kam. ²⁰ Ena ikam kito se Yerusalem knepong koe tentara-tentara, apa ikam tau, se pngeroros-iyo duni aut. ²¹ Mbo des ene ulun-ulun yo keo mbo Yudea arus buyo epo tunden, ai ulun-ulun yo keo mbo lang kota arus baling, ulun-ulun yo ela baling se kota nang sumba nua epo lang kota, ²² koe ene doko des nte males mbo mone anta pas-pas kati eka-eka yo keo tnulis. ²³ Sesa beta doko bawe-bawe yo desung klandung ktine low yo desung nete taru montuk des ene! Koe anta ulet kbenasa bolum yo tlanjur kono mupus ja ai kmara roa mitek bangsa endo, ²⁴ ai dero anta maten kono taris ai tnangop noit epo pupus bangsa, ai Yerusalem anta knanja koe bangsa-bangsa yo mba di tau se Allah, sampe sukup doko jman nte bangsa-bangsa ene." ²⁵ "Ai anta keo tanda-tanda mbo mato olo ai bulan ai bintong-bintong, ai mbo dnia bangsa-bangsa anta takut ai bengong ngadap kserow ai ombak olay mbo tasik. ²⁶ Ulun anta mate koe kanam takut koe eka-eka ise yo nyengkinan dnia endo, koe kturon kuasa langit anta jadi skukui. ²⁷ Montuk des ene ulun jadi kito se Pea Ulun ulet lang jaun diang eka-eka kuasa ai kmulia-Iyo. ²⁸ Ena eka-eka ene mulai terjadi, uat aut ai tadah ka epo ombo wae-kam, koe ikam duni sinolamat aut. ²⁹ Laju Yesus ngulek pmerawet endo epo dero: "Eti kam tonga ara ktine low tonga ise ka. ³⁰ Ena itan kam tonga-tonga ene sundok naruk burok, ikam se jadi tau, se des langot duni aut. ³¹ Ktine low, ena ikam kito nau umbang ene terjadi, arus tau, se Krajaan Allah sundok dempet. ³² Aku ngulek epo ikam: Beta-beta yo pokan endo belo anta lalo, onon eka-eka ene terjadi. ³³ Langit ai dnia anta lalo, tapi pmensara-Ku belo anta di lalo." ³⁴ "Jaga diri nyawa kam se, apa kesong kam nang btengkoyat diang pesta kuman nyingkap mroa ogot ai mauk-mauk ai yo penting nte dnia endo tingen ai apa olo Tuhan nang ulet kolan-kolan epo ikam kati kono tongkop. ³⁵ Koe ene anta nakin eka-eka ulun yo nongos mbo dnia endo. ³⁶ Bjaga beta-beta trus ulak bdoa, apa ikam galak nte nglalo eka-eka yo anta terjadi ene, ai apa ikam tahan akat onon Pea Ulun." ³⁷ Mbo molo Yesus nutui matuk mbo Bait Allah ai mbo malom Io baling ai nsan mbo tunden yo nan karan se Bukit Zaitun. ³⁸ Des ma-ma eka-eka ulun deo ngompoh-Iyo mbo lang Bait Allah nte nempaning Io.