¹ Des olon Yesus tutui matuk ulun deo mbo bait Allah ai ngampe injil, ulet ka doko imam-imam pengutok ai ahli-ahli torat ai pengentuo-tuo epo mne, ² ai dero ngulek epo Yesus: "Ulek ta epo kain makai kuasa ise iko nglaku gawi ktine, ai ise yo mie kuasa ene epo Iko!" ³ Tuing Yesus epo dero:"Aku lou kakan ngunti epo ikam, ulek kamta po Aku: ⁴ Baptisan Yohanes ene, ket sorga be atau ngket ulun?" ⁵ Dero ngenanam ene mbo sama dero, ai ngulek: "Ena taka ngulek: Engket sorga, Io anta ngulek: ise moko ikam belo persaya epo iyo? ⁶ tapi ena taka ngulek: ngket ulun, eka-eka rayat anta nurak taka diang batu, koe dero persaya, se Yohanes ene nabi." ⁷ Trus dero nuing, se dero belo tau ket mone baptisan ene. Ke ene ⁸ jadi ulek Yesus epo dero: "Ena ketine, Aku lou belo ngulek epo ikam diang kuasa ise aku uku nglaku gawi ene." ⁹ Trus Yesus ngulek memprawet endo epo ulun deo:" keo erai kongo ulun muka kebon anggur; trus kebon yo ene snewa epo tukang-tukang kebon trus iyo bju epo ja iyo mak nte ju iyo ola bes. ¹⁰ Des sampe musim iyo. io nyuyu erai kongo batak io epo ngruku ulun tukang-tukang kebon ene, apa dero magi tenga asil kebon anggur ene epo iyo. Tapi tukang-tukang kebon ene ngatang batak ene ai nyuyu iyo uli diang kayang osau. ¹¹ Sundok ene yo nyuyu batak yo mak , tapi batak ene kono katang lou ai kinomai ke dero, laju snuyu uli diang kayang osau . ¹² Sundok ene yo nyuyu batak iyo ke tolu , tapi ulun ene kono pinojail dero, laju tnurak epo baling se kebon ene. ¹³ Jadi ulek mpu kebon anggur ene : Ise oki gnawi oli? Aku anta nyemuyu peaku yo snyang; pasti iyo gnaer ke dero. ¹⁴ Tapi des tukang-tukang kebon ene kito pea-io ene, dero brondeng, ulek dero: Io ene pewaris, alo taka ngempate iyo, apa warisan ene jadi mpun taka. ¹⁵ laju dero nurak iyo epo baling se kebon anggur ene ai ngempate iyo. jadi ise yo anta gawi mpu kebon anggur ene epo dero? ¹⁶ io anta ulet ai ngempate tukang-tukang kebon ene. ai mie kebon anggur ene epo ulun-ulun yo mak." Keringo ene dero ngulek: "Nang-nang beta !" ¹⁷ Tapi Yesus meti dero ai ngulek: "Ena ketine ise arti tulisan endo: Batu yo noding koe tukang-tukang bangunan ene sundok jadi batu pmeturon? ¹⁸ Ise-ise ulun iyo latu mitek batu ene, iyo anta tunnyas, ai ise-ise yo kono skinan batu ene, iyo anta rmek." ¹⁹ laju ahli-ahli torat diang imam-imam pengutok ngomer nangop Iyo des ene lou, koe dero tau, se dero ene yo antus Iyo diang pemerawet ene, tapi dero takut se ulun deo. ²⁰ ahli-ahli taorat ai imam-imam pengutok nyempeti-nyempeti Yesus. Dero nyemuyu epo Iyo pmungun-pmungun kati nau ungka-ungka ulun buen, apa dero kuli ngnjebak-Iyo diang pengunti ai nyerah Iyo epo yo keo kuasa mbo dnia mne. ²¹ Ulun-ulun ene ngunti epo Iyo: "Guru, kain tau, se eka-eka tutui batuk Ko beta, ai Iko belo di meto pinokolai, tapi diang beta-beta tutui matuk boyan Allah. ²² Kate be bebo be kain mayar pajak epo kaisar ?" ²³ Tapi Yesus belo diuro keno dero yo triau ene, trus ngulek epo dero: ²⁴ "Pekelak kam tah epo aku dinar; gambar ai tulisan ise keo la mne?" Tuing dero: "Gambar diang tulisan kaisar." ²⁵ Trus Yesus ngulek epo dero: " Ena ketine ko epo kaisar ise iyo arus die kam epo kaisar ai epo Allah ise yo arus die kam epo Allah!" ²⁶ Ai dero belo kuli ngenjebak- Iyo lang pemensara iyo la onon ulun deo. Dero bengong nau tuing Iyo ene, ai dero nyruni. ²⁷ Des ene ulet epo Yesus, tenu-tenu kongo ulun Saduki, yo belo di nyembeta se keo pngenyuli. Dero ngunti epo Iyo: ²⁸ "Guru, Musa nulis prenta endo nte taka: Ena erai kongo, yo keo erai buntung song, mate ulak bawe yo aso keo, tapi iyo belo di keo nape pea, erai buntung iyo harus kawen diang bawe iyo nte mekeo upus nte erai buntung iyo ene. ²⁹ Keo turu kongo dero erai buntung. Yo tuo tingen kawen diang ulun bawe trus mate diang belo nape pea. ³⁰ trus bawe ene knawen epo yo keduo, ³¹ ai yo ketolu ai ketine lou eka-eka sampe ereai buntung yo keturu ene, dero eka-eka mate diang belo di nape pea. ³² Pyundok iyo bawe ene mate lou. ³³ Ketimbe nau yo oli diang bawe ene, ise lelu dero yo jadi song iyo des olo pngenyuli? Koe eka dero turu ene sundok nembawe se io ." ³⁴ tuing Yesus epo dero : "Ulun-ulun denia endo kawen ai knawen, ³⁵ tapi dero yo nontus sengkono nte kuli bagian lang denia yo mak ene ai lang pngenyuli engket ekang ulun mate, belo kawen ai belo di knawen. ³⁶ Ke dero belo di tau mate oli, dero sama kati malaikat-malaikat ai dero ene pea-pea Allah, ke dero sundok pinosuli. ³⁷ Nau umbang pngenyuli ulun-ulun mate, Musa sundok memetau ene lang tulisan lang jaba dikut kdui, mbo mone Tuhan nulek Allah Abraham, Allah Ishak, ai Allah yakub. ³⁸ Iyo makse Allah ulun mate, tapi Iyo Allah ulun bolum, koe la onon Iyo eka-eka ulun bolum. ³⁹ Kringo ene tenu-tenu kongo ulun ahli torat ngulek: "Guru, tuing ko ene montuk beta." ⁴⁰ Koe dero belo dironu nua rekunti ise-ise epo Yesus. ⁴¹ Tapi Yesus ngulek epo dero: "Ketimbe ulun moko ngulek, se Mesias ene pea Daud? ⁴² Koe Daud se ngulek lang kitab Mazmur: Tuhan sundok nyampe firman epo tuanku; tunge ta la tadah sanan-Ku, ⁴³ sampe Aku nampa musuh-musuh-Ko jadi awa itek botis-Ko ⁴⁴ Jadi Daud momba Iyo se Tuan iyo, ketimbe moko Iyo, io pea iyo lou? ⁴⁵ Des eka ulun deo nempaning, Yesus ngulek epo murid-murid- Iyo ⁴⁶ "ati-ati epo ahli-ahli torat yo gawal malan-malan makai baju anjang ai gawal pinokolai ela pasar, yo gawal tunge paling ono mbo lou sembayang ai mbo awa kinonuon la ungan, ⁴⁷ yo nolon lou balu-balu ai yo ngakal mato ulun diang doa yo anjang-anjang. Dero ene pasti anta nerima hukuman yo paling boyat."