¹ Yesus sumba epo kota Yeriko ai malan trus nglalo kota ene. ² Mbo mne keo erai kongo ulun nan karan se Zakheus, pengutok penage bea, ai io ulun yo tataw. ³ Io bekomer nte meti ulun ise si Yesus ene, tapi io belo kuli koe ulun deo, koe kompu io baka. ⁴ Koe ene monsit io nyelempono ulun deo, laju mengket tonga ara nte meti Yesus, yo anta lalo mbo mne. ⁵ Des Yesus sampe epo awa ene, Io meti epo ombo ai ngulek: "Zakheus, resi aut diwa, koe olo ndo Aku arus nsan mbo blai ko," ⁶ Trus Zakheus peles diwa ai nrima Yesus diang ego. ⁷ Tapi eka ulun yo kito se ene ngamamai, ulek dero: "Io nsan mbo blai ulun dosa." ⁸ Tapi Zakheus akat ai ngulek epo Tuhan: "Tuhan,tenga ngket pengkeo ku anta diye ku epo ulun kao ai ena keo ulun mak yo pengkeoiyo terjo ku anta tempuli ku opat lipat." ⁹ Ulek Yesus epo iyo: "Olo ndo sundok terjadi selamat epo lowu endo, koe ulun endo pea Abraham lou. ¹⁰ Koe Pea Ulun ulet nte meto ai nyelamat yo mapos. ¹¹ Nte dero yo nempaning Iyo mbo mne, Yesus nyambung pemesara- Iyo diang pemerawet, koe Io sundok dmpet Yerusalem ai dero ngomoy, se Kerajaan Allah anta duni melak. ¹² Koe ene Io ngulek: "Keo ulun bangsawan bju epo negri yo oro nte nengkat jadi raja mbo mne ai sundok ene bayu uli. ¹³ Io momba sepulu kongo batak iyo ai miye sepulu mina epo dero, ulek iyo: Pakai ka endo nte bdagang sampe aku ulet nua. ¹⁴ Tapi ulun-ulun kerai bangsa diang iyo kekei se io, trus ngirim wakel nyendikui io nte ngulek: Kain belo kakan ulun endo jadi raja nte kain. ¹⁵ Trus terjadi doko, des io uli, sundok io nengkat nte jadi raja,io semuyu momba batak-batak iyo, yo sundok diye iyo sen ene, apa tau tenu asil dagang tongku dero. ¹⁶ Ulun yo tla ulet ai ngulek: Tuan, mina tuan yo erai ene sundok ngasil sepulu mina. ¹⁷ Ulek iyo epo ulun ene: Buen beta gawi gata ko ene, o'batak yo buen; iko sundok stia lang soal idi,koe ene trima ko kuasa mbo nte sepulu kota. ¹⁸ Ulet yo keduo ai ngulek: Tuan, mina tuan sundok ngasil limo mina. ¹⁹ Ulek iyo epo ulun ene: Ai iko, trima ko kuasa nte limo kota. ²⁰ Trus batak yo ketolu ulet ai ngulek: Tuan, endo doko mina tuan, aku sundok ngonaiyo lang sapu tangan. ²¹ Koe aku takut se tuan, koe tuan ene ulun yo pernges; tuan ngalek ise yo belo pini tuan mayak ai tuan ngutik ise yo belo tuan ngulo. ²² Ulek iyo epo ulun ene: O' batak yo triaw, aku anta mutus iko ngaya nau pemesara ko se. Iko sundok tau se aku ulun yo pernges, yo ngalek ise yo belo pini aku mayak ai ngutik ise yo belo di aku ngulo. ²³ Ena ktine, ise moko sen ku ene belo iko miye epo ulun tukang mutar sen? Apa des aku uli aku kuli ngalek iyo diang bungo iyo lou. ²⁴ Laju ulek iyo epo ulun-ulun yo akat mbo mne: Alek ka mina yo erai ene ngket iyo trus diye ka epo ulun yo keo sepulu mina ene. ²⁵ Ulek dero epo iyo: Tuan, io sundok keo sepulu mina. ²⁶ Tuing iyo: Aku ngulek epo ikam: Tongku ulun yo keo, epo yo anta dniye, tapi ise yo belo keo, ngket iyo anta nalek, nua ise-ise lou yo keo mbo iyo. ²⁷ Tapi anta eka musuh ku endo,yo belo gawal aku jadi raja dero,oit ka dero epo ndo trus pate ka dero mbo onon wae ku." ²⁸ Ai sundok ngulek eka yo ene Yesus nyelempono se dero ai nrus dalan-Iyo epo Yerusalem. ²⁹ Des Io sundok dmpet Betfage ai Betania,yo pas mbo tunden yo nan karan se Bukit Zaitun,Yesus smuyu duo kongo murid-Iyo, ³⁰ diang psan: "Malan aut epo kampong yo ela onon ikam ene: Des ikam sumba mbo mne, ikam anta ruku erai kukui keledai burok preket unot, yo belo pini tendung ulun, noke keledai ene ai oit epo ndo. ³¹ Trus ena keo ulun ngunti epo ikam : Ise moko ikam ngoke iyo? Tuing ka ketindo: Tuhan merlu iyo." ³² Laju brangkat dero yo snuyu ene, ai dero ruku eka-eka kati yo sundok ulek Yesus. ³³ Desung dero ngoke keledai ene,bsara doko ulun yo mpun keledai ene : " Ise moko ikam ngoke kledai ene?" ³⁴ Ulek dero: "Tuhan merlu iyo." ³⁵ Dero moit keledai ene epo Yesus, laju nglapis iyo diang pakaian dero ai ngawat Yesus dombo epo ombon iyo. ³⁶ Ai desung Yesus ban keledai ene dero nguwar pakaian dero mbo boyan. ³⁷ Des Io dmpet Yerusalem, ela awa boyan truntun ngket Bukit Zaitun,mulai doko eka murid yo nyarak Iyo ego ai memuji Allah diang oyon riyes koe eka mujisat yo sundok itan dero. ³⁸ Ulek dero: "Diberkatika Iyo yo ulet jadi Raja lang karan Tuhan, damai sjahtera mbo sorga ai kmuliaan mbo awa yo paling ombo!" ³⁹ Tenu-tenu kongo ulun Farisi yo lumpat diang ulun deo ene ngulek epo Yesus: "Guru, kae murid-murid Ko ene." ⁴⁰ Tuing- Iyo: "Aku ngulek epo ikam: Ena dero ene suni, batu endo anta nyoyar." ⁴¹ Trus des Yesus sundok dmpet ai kito kota ene Io nangis nte kota ene, ⁴² ulek Iyo: "Adoh, bukan main kekuen iyo ena olo ndo low ikam tau ise yo perlu nte damai sjahtera kam! Tapi tempo ndo nau ene melim mbo mato kam. ⁴³ Koe anta ulet olo iyo,se musuh kam anta nglekum ikam diang pmombong, laju ngepong ikam ai nken ikam ngket eka tadah, ⁴⁴ ai dero anta ngempate ikam sama-sama diang penduduk kam ai ela pmombong kam dero belo anta noro ndok erai batu aso toro ban batu yo mak, koe ikam belo tau jman, des mbe Allah ngasi ngado ikam." ⁴⁵ Trus Yesus sumba epo Bait Allah trus mulai Io ngusa eka ulun yo bjual mbo mne, ⁴⁶ ulek-Iyo epo dero: "Keo tnulis: Blai-Ku ene blai doa. Tapi ikam nampa iyo salai triaw akal." ⁴⁷ Tongku olo Io nutui matuk mbo lang Bait Allah. Imam-imam pengutok ai ahli-ahli Taurat diang ulun-ulun penting ngket bangsa Israel bkomer nte ngempate Iyo, ⁴⁸ tapi dero belo tau, ketimbe arus nggawi yo,koe eka rayat gawal se- Iyo ai kakan nempaning Iyo.