¹ Yesus ngulek sontoh epo dero apa paham, se dero ene arus smbayang trus-trusan belo di diang pngenanam ayu. ² Ulek-Iyo: "Lang erai kota keo akim yo belo takut se Allah ai belo di tau ormat diang ulun. ³ Mbo kota ene keo erai kongo balu yo tuju nyruku akim ene ai ngulek ktindo: Bnela hakku ngket musuhku. ⁴ Tenu derang akim ene nolak. Tapi epo ola io bunyal lang kesong iyo se: Tontan aku belo takut se Allah ai belo di ormat se ulun, ⁵ koe balu endo krepot aku, koe ka aku nyengkono nte iyo,apa nang jono nyeruku aku ai pnyundok yo nyrang aku." ⁹ Nte tenu kongo ulun yo ngontus se io ene bolum lonus ai nganggap ulun yo mak ene iwa se iyo, Yesus ngulek sontoh ktindo: ¹⁰ "Keo duo kongo ulun epo Bait Allah nte smbayang; erai kongo yo ulun Farisi ai yo mak ene tukang nentu bea. ¹¹ Ulun Farisi ene akat ai smbayang lang kesong, otang yo ktindo: O Allah, aku ngulek deo trima kasih epo-Iko, koe aku belo di kerai kati ulun yo mak, makse prampok, makse bngis, makse ulun yo paru bawe ai belo di kati nau ulun tukang tentu bea ene; ¹² aku puasa duo derang erai minggu, aku mie sperspuluh ket eka-eka pengkuliku. ¹³ Tapi tukang nntu bea ene akat ela oro, io ndok belo ronu donga ngadap langit, io malah mupuk kompu tonga iyo se ai ngulek: O Allah, tngkosang aku yo roa dosa endo. ¹⁴ Aku ngulek diang ikam: ulun endo uli epo lou iyo sbgai ulun yo sundok sngkono mbo Allah, ena ulun yo mak ene belo. Koe ise yo mngkombo diri, io pasti nrendah ai ise ngrendah, io pasti pinokombo ¹⁵ Ulet ulun-ulun moit bang pea dero yo aso alus nyruku Yesus, apa Io mulem dero. Kito ene mara murid-murid-Iyo epo ulun-ulun ene. ¹⁶ Tapi Yesus momba dero ai ngulek: "Koe ka bang pea ene nyruku Aku, nang ikam ngusan dero, koe ulun-ulun kati ktine yo mpun Krajaan Allah. ¹⁷ Aku ngulek diang ikam: Sbenar yo ise yo belo nyambut Krajaan Allah kati pea alus, io belo anta sumba. ¹⁸ Keo erai kongo pngutok ngunti epo Yesus,ulek iyo: "Guru yo buen, ise nte oki gawi nampa kuli bolum kkal?" ¹⁹ Tuing Yesus: "Ise moko iko ngulek Aku buen? Ndok belo erai ulun keo yo buen makse Allah se. ²⁰ Iko pasti tau soal printah Allah: Nang bjinah, nang ngempate, nang ngako, nang nampa eta, ormat diang ine uma ko." ²¹ Ulek ulun ene: "eka ene aut sundok laku ku mulai ket aku aso burok bujang." ²² Kringo ene Yesus ngulek diang iyo: "Aso erai yo pian nlaku ke ko: jual eka pngkeo ko bayu asil yo bnagi epo ulun-ulun miskin, diang ktine bayu iko kuli arta ela sorga, sundok ene ulet epo mndo peles lumpat diang Aku." ²³ Des ulun ene kringo pnyurah ene, iyo jadi nyoru, koe iyo ene ulun tataw. ²⁴ Bayu Yesus meti iyo ai ngulek: "Poyo memang ulun roa sen sumba lang Krajaan Allah. ²⁵ Koe paling gampang onta sumba luang pilos se ulun tataw sumba Krajaan Allah." ²⁶ Dero yo kringo ene, ngulek: "Ena ktine, ise yo kuli sinolamat?" ²⁷ Ulek Yesus: "Ise yo belo dapet ke ulun dapet koe Allah." ²⁸ Petrus ngulek: "Kain endo sundok ngendikah eka pengkeo kain ai lumpat Iko." ²⁹ Ulek Yesus epo dero: "Aku ngulek diang ikam, sebeta yo tongku ulun koe Krajaan Allah ngendikah lou blai iyo, bawe pan erai buntung iyo, ulun tuo diang pea iyo, ³⁰ kuli ganti blipat ganda des tempo ndo low, ai anta yo kuli bolum yo kkal." ³¹ Yesus momba duo blas murid Iyo, bayu ngulek diang dero: "Tempo ndo taka malan epo Yerusalem ai yo sundok tnulis koe para nabi soal Anak Ulun ene pasti knelop. ³² Koe Io kakan snerah epo bangsa-bangsa yo belo knal se Allah, nte reko, nina ai tnepus, ³³ ai dero ngesa diang ngempate Iyo, ai olo ktolu Io nyuli." ³⁵ Des Yesus duni ulet ela Yerikho, keo ulun posa tunge ela isan boyan ai ngmis. ³⁶ Des ulun ene kringo ulun deo lalo, io ngunti: "Ise ene?" ³⁷ Ulek ulun diang iyo: "Yesus ulun Nazaret lalo." ³⁸ Bayu io nyoyar: "Yesus, Pea Daud, tengkosang aku!" ³⁹ Dero yo malan ela ono, negur iyo apa suni. Tapi tambah ries io nyoyar: "Pea Daud, tengkosang aku!" ⁴⁰ Yesus singgah peles nyuyu moit ulun ene ngadap Iyo.Des io dmpet diang Yesus. Yesus ngunti diang iyo: ⁴¹ "Ise ptua ko Oki gawi nte ngko?" Tuing ulun ene: "Tuhan, apa aku kate kito!" ⁴² Bayu ulek Yesus diang iyo: "Kito iko, iman ko sundok nylamat iko!" ⁴³ Peles des ene lou io kito, trus lumpat Io diang memuliakan Allah. Eka rauyat kito ai muji-muji Allah