¹ Ai Yesus ngulek epo murid-murid-Iyo: "Keo erai kongo ulun tataw yo keo erai kongo ulun pngona sen. Epo io tnundruh, se pngona sen ene ngesa pngkeo-iyo. ² Trus io momba pngona sen ene ai ngulek epo-iyo: Ise dingo ku nau otang ko? Iko arus tanggung jawab nau gawi ko ene, koe iko belo kate oli bgawi jadi pngona sen. ³ Kno lang kesong pngona sen ene: Ise oki gawi oli? Tuanku nmbaling aku ngket gawi ku jadi pngona sen.Nyangkul aku belo klian, ngndoja aku mai. ⁴ Aku tau ise yo anta oki gawi, apa ena aku tinombaling ngket gawi ku jadi pngona sen ene, keo ulun yo anta nentu aku mbo lou dero. ⁵ Trus io momba tongku kongo ulun yo keo utang epo tuan-iyo ene. Ulek-iyo epo yo tla: Tenu utang ko epo tuan ku? ⁶ Tuwing ulun ene: Jatus tpayan lnga. Laju io ngulek epo ulun ene: Nndo doko surat utang ko, tunge ai tampa surat utang yo mak tempo ndo low: Limo pulu tpayan. ⁷ Sundok ene io ngulek epo yo ke duo: Ai tenu utang ko? Tuwing ulun ene: Jatus oson gandong. Ulek io epo ulun ene: Ndo doko surat utang ko, tampa aut surat utang yo mak: Walu pulu oson. ⁸ Trus tuan ene nengkuen pngona sen yo belo jujur ene, koe ksrdik akal-iyo. Koe pea-pea dnia endo pawak serdik epo sama dero se pea-pea trang. ⁹ Ai aku ngulek epo ikam: Btman ka buen-buen makai Mamon yo belo jujur, apa ena Mamon ene belo kuli ngawat oli, ikam tinorima mbo lang lou kden." ¹⁰ Ise-ise ulun yo stia lang soal-soal yo idi, io stia low lang soal-soal yo olai. Ai ise-ise ulun yo sala lang soal-soal yo idi, io sala low lang soal-soal yo olai. ¹¹ Jadi, ena ikam belo stia lang soal Mamon yo belo jujur, ise yo anta nape epo ikam kakas yo beta-beta-iyo? ¹² Ai ena ikam belo stia lang pngkeo ulun mak, ise si yo anta nyrah pngkeo kam se epo ikam? ¹³ Erai kongo batak ulun belo kuli bgawi nte duo tuan. Koe ena ktine io anta kekei se yo erai kongo ai kosang se yo mak, ena belo io anta stia epo yo erai kongo ai belo nyanda yo mak. Ikam belo kuli msenang Allah ai msenang Mamon". ¹⁴ Eka-eka ene dingo ulun-ulun Farisi, yo batak-batak sen ene, ai dero nguja Io. ¹⁵ Trus Io ngulek epo dero: "Ikam nengkuen ikam se mbo onon ulun, tapi Allah tau kesong kam. Koe ise io pinokolai koe ulun, Allah kekei. ¹⁶ Aturan Taurat ai kitab nabi-nabi pnakai sampe jaman Yohanes; ai ngket des ene Krajaan Allah tnuren ai tongku kongo ulun ungka ungke selengayo sumba-iyo. ¹⁷ Ono langit ai tana mapos se erai titik aturan Taurat pinokore. ¹⁸ Tongku kongo ulun yo stuwar ngket bawe-iyo, laju kawen diang bawe yo mak, io nglaku pokeng koreng; ai ise-ise ulun yo kawen diang bawe yo stuwar ngket song-iyo, io nglaku pokeng koreng." ¹⁹ "Keo erai kongo ulun tatau yo trus makai jubah ungu ai diris buen, ai tongku olo io bsnang-snang lang bolum keo ba. ²⁰ Ai keo erai kongo ulun pendoja nan karan se Lazarus, kompu tonga io ponu diang ktikang boto, lumbi isan jawong lou ulun tatau ene, ²¹ ai kakan mkale slau-iyo diang ise yo toyak ngket meja ulun kaya ene. Mokin koko-koko ulet ai ngndelap ktikang boto-iyo ene. ²² Sundok ene mate doko pngendoja ene, laju noit koe mlekat- mlekat epo ado ban po Abraham. ²³ Ulun tatau ene mate low, laju nlowong. Ai desung io ssa bnasa lang dnia ulun mate, io nyonda epo ombo, ai ngket oro io kito Abraham, ai Lazarus tunge ban po iyo. ²⁴ Trus io nyoyar, ulek-iyo: Bapa Abraham, tngkosang ko aku. Suyu ko tah Lazarus apa io nyoso lai grigi io epo lang danum nte mmrongin dola ku, koe aku desung siet lang dolan api endo. ²⁵ Tetapi Abraham ngulek: Pea, knop ko iko, se iko kiso kanam bolum buen kola bolum ko, tapi Lazarus eka kbenasa. Tempo ndo io kuli pnyempae ai iko bol ksesa. ²⁶ Aso makse ene mbo ekang kain diang iko bbenteng kowang yo belo dapet kentas, apa dero yo kakan brangkat ngket mndo epo ikam ketine low dero yo kakan ulet ngket lane epo kain belo kuli kentas. ²⁷ Ulek ulun ene: Ena ketine, aku tindu epo iko, bapa, apa iko nyuyu io epo lou uma-ku, ²⁸ koe aso keo limo kongo eraibuntung-ku, apa io beta-beta mkingat dero, apa dero nang sumba low lang awa ssa endo. ²⁹ Tapi ulek Abraham: Keo mbo dero pnyampe Musa ai nabi-nabi; buen doko dero se nempaning pnyampe ene. ³⁰ Tuwing ulun ene: Belo, Bapa Abraham, tapi ena keo ulun yo sundok mate ulet epo dero, dero anta btobat. ³¹ Ulex Abraham epo io: Ena dero belo kakan nmpaning- pnyampe Musa ai nabi-nabi, dero belo low anta kakan persaya, tontan ulun nyuli ngket ekang ulun mate."