¹ Jut pnage bea ai ulun-ulun dosa biasa yo ulet epo Yesus nte nmpaning Io. ² Laju memetau ulun-ulun Farisi ai tukang-tukang taurat ulek dero: "Io nrima ulun -ulun dosa ai kuman sama-sama diang dero." ³ Laju Io ngulek pemerawet ene epo dero: ⁴ Ise llu ikam yo keo jatus kukui domba, ena io mapos erai kukui ngket dero, belo be io nape yo sie pulu sie kukui ene mo padang gurun ai malan meto yo tang ene sampe io ruku se yo? ⁵ Ena io ruku se yo, io mayak yo ban pluko io diang ego, ⁶ Des sampe la lou' io momba tman-tman ai ulun-ulun likup lou io, ai ngulek epo dero: snang-snang diang aku, koe domba ku yo mapos ene nruku. ⁷ Aku ngulek epo ikam: ktine lou anta keo snang mo sorga koe erai kongo ulun dosa yo btobat, lengkat se kanam snang koe siepulu sie kongo ulun buen yo belo koyoh btobat. ⁸ Ktina lou bawe mone yo keo spulu Dirham, ai ena io mapos erai buti, belo neket plita ai nyapu lou' diang meto yo beta-beta sampe ruku se yo? ⁹ Ai ena io sundok ngruku yo, io momba tman-tman ai ulun-ulun likup lou io diang ngulek: senang-senang sama-sama taka diang aku, koe dirham ku yo mapos ene sundok ruku ku. ¹⁰ Aku ngulek epo ikam: Ktine lou anta keo senang mo mlekat-mlekat Allah koe erai kongo ulun dosa yo btobat." ¹¹ Yesus ngulek nua: keo erai kongo ulun ngmpun duo pea song. ¹² Ulek io burok epo uma io: bapa,die epo aku tenga pngkeo yo mpun taka, yo nte oki memang. laju uma io magi-magi pngkeo pngkenan ene epo dero. ¹³ Tenu-tenu olo oli pea yo burok ene ngenjual eka mpun io ene trus malan epo dnia yo oroh. la lane io nungka pengkeo io diang bolum nte ngaya ptua blis lang kompu io. ¹⁴ des solo bah pngkeo io, ulet lau mo lang dnia mne ai io lou mulai bnasa. ¹⁵ Trus io malan ai bgawi mo ulun mo dnia mne. Ulun ene nymuyu io epo awa penyekamu nte ngnjaga bawi io. ¹⁶ laju io kakan ngatok buntung io, diang mpas yo nte pakan bawi ene tapi nok belo erai kongo ulun yo kakan mie epo io. ¹⁷ Laju io knop nau umbang yo ulek io: bukan main kdeo ulun upa bapa ku yo ruak ruwau okan singkap, tapi aku mndo kakan maten sla'u. ¹⁸ Aku kakan uat ai malan ngruku uma ku ai ngulek epo iyo: Bapa, aku sundok dosa epo sorga ai epo bapa, ¹⁹ aku belo sngkono oli nulek pea bapa; tnampa ka aku kati ulun yo nupa koe bapa. ²⁰ Jadi io uat ai malan epo ngruku bapa io. des io aso oro, uma io sundok kito se io laju keo pngnanam lang kesong iyo koe kanam kosang. uma io ene monsit nyrapet iyo laju ngokop ai ngarok iyo. ²¹ Ulek pea ene epo iyo: Bapa, aku sundok dosa epo sorga ai epo bapa, aku belo sngkono oli nulek pea bapa. ²² Tapi uma io ngulek epo batak-batak iyo: resi oit epo dido jubah yo paling buen, snua ene epo io ai tnempel cincin po grigi io diang trumpak po botis io. ²³ Ai alek kam anak lmbu yo bokol ene, laju sinomble ai mendo taka kuman ai snang-snang. ²⁴ Koe pea ku endo sundok mate ai jadi bolum nua, io sundok mapos ai nruku nua. jadi mulai dero bsnang-snang. ²⁵ Tapi pea yo tuo aso la umo ai des io uli, dmpet se lou, io kringo oyon suling ai slegu nuyo-nuyo. ²⁶ Laju io momba erai kongo batak ai ngunti epo io ise nte dero ene. ²⁷ Tuing batak ene: okong ko ulet ai uma ko sundok nymble anak lmbu yo bokol, koe okong ko sundok nua ai uma ko kuli pea yo diang slamat. ²⁸ Jadi mara beta pea yo tuo ene, ai io belo kakan sumba. laju uma io epo baling bunyal diang io. ²⁹ Tapi io nuing uma iyo ulek io: sundok btaun-taun aku ngawat bapa ai belo pini aku nglagar ptua bapa, tapi epo aku belo pini bapa mie erai kukui anak bembe nte snang-snang diang tman-tman ku. ³⁰ Tapi bayu ka ulet pea bapa yo sundok gsa pengkeo pngkinan bapa sama-sama diang lonte-lonte, ise moko bapa nymble anak lmbu bokol ene nte io. ³¹ Ulek uma io epo iyo: pea ku, iko ene trus sama-sama diang aku, ai eka pngkeo ku ene pengkeo ko lou. ³² Taka pantas snang-snang ai ego koe okong ko sundok mate ai jadi bolum nua, io sundok mapos nruku nua."