¹ Des jman olo Sabat Yesus ulet epo lou erai kongo ngket pngutok ulun-ulun Farisi nte kuman mbo mne. Eka yo keo mne nyempti Io ndok tuyu. ² Kolan-kolan ulet ulun yo kroton lamput danum akat mbo onon-Iyo. ³ Laju Yesus ngulek epo ahli-ahli Taurat ai ulun-ulun Farisi ene, ulek-Iyo: "Kate be, belo be mkale ulun des olo Sabat?" ⁴ Eka dero mne suni. Trus Io ngop tangan ulun kroton ene ai mkale-iyo ai nyuyu-iyo malan. ⁵ Sundok ene Io ngulek epo dero: "Ise lelu ikam yo belo bangat ngndurut nmbaling pea-iyo ktine low ena lmbu-iyo latu epo lang tinan, tontan ko des olo Sabat?" ⁶ Dero belo kuli nglawan nte Io ene. ⁷ Koe Yesus kito, se peri-peri bkomer tunge mbo awa paling kinonuon, Io ngulek pmrawet endo epo dero: ⁸ "Ena ulun ngirak iko epo ungan kawen, nang tunge mbo awa paling kinonuon, koe bahe ulun ene sundok ngirak ulun yo aso kinonuon se iko, ⁹ apa ulun ene, nang ngompoh ai ngulek epo iko: Die awa endo epo ulun enduh. Trus iko diang mai arus malan nte tunge mbo awa yo paling sori. ¹⁰ Tapi, ena iko nirak, alo tunge mbo awa yo paling sori. Bahe mpu lou anta ulet ai ngulek epo iko: Tman, tunge la ono ka. Jadi diang ktine iko anta akinonuon onon wae mato eka-eka peri yo mak. ¹¹ Koe ise-ise ulun yo mkombo-iyo se, io anta pinokiwa ai ise-ise ulun yo iwa-iwa ka nau, io anta pinokombo." ¹³ Tapi ena iko nampa acara kuman, nirak ulun-ulun yo belo keo ise-ise, ulun-ulun pokung dekal ai ulun-ulun posa. ¹⁴ Jadi iko anta ego beta, koe dero belo keo ise-ise nte males-iyo epo iko. Koe iko anta kuli bales-iyo des olo pngnyuli ulun-ulun yo kono. ¹⁵ Kringo ene bsara erai kongo ngket peri-peri ene epo Yesus: "Ego beta ulun yo anta dnie kuman lang Krajaan Allah." ¹⁶ Tapi Yesus ngulek epo-iyo: "Keo erai kongo ulun nampa acara olai nte kuman nyinkap ai io ngirak ulun deo. ¹⁷ Duni aut acara kuman ene mulai, io nyuyu batak-iyo ngulek epo dero yo sundok nirak ene: Epo mndo aut, koe eka sundok sinodia ba aut. ¹⁸ Tapi dero sama-sama tindu maap. Yo tla ngulek epo-iyo: Aku sundok moli umo jadi aku arus malan meti-iyo; aku tindu maap. ¹⁹ Yo mak ngulek: Aku sundok moli limo pasang lmbu kbiri ai aku arus malan nyoba-iyo; aku tindu maap. ²⁰ Yo mak nua ngulek: Aku bayu kawen jadi aku belo kuli ulet. ²¹ Jadi uli ka doko batak ene ai nyampe eka ene epo tuan-iyo. Laju roa doko mara mpu lou ene ai ngulek epo batak-iyo: Malan resi-resi epo mupus boyan ai gang-gang lang kota ai oit epo dido ulun-ulun yo belo keo ise-ise ai ulun-ulun yo pokung ai ulun-ulun posa. ²² Sundok ene batak ene ngulek: Tuan, ise yo suyu tuan ene sundok nlaku, tapi betako ktine aso keo awa. ²³ Trus ulek tuan ene epo batak-iyo: Malan nua epo eka boyan ai pngentas ai paksa ulun-ulun yo keo mne apa sumba, koe lou ku arus ponu. ²⁴ Koe Aku ngulek epo ikam: Ndok belo keo erai kongo ulun-ulun yo sundok nirak ene anta kiso kanam okan singkap-Ku ene. ²⁵ Keo sindai deo ulun bloyun-bloyun nyarak Yesus malan. Ulak skuleng epo sori Yesus ngulek epo dero: ²⁶ "Ena ulun ulet epo Aku ai io belo di kate tenggang ngket uma-iyo, ine-iyo, bawe iyo, pea-pea-iyo, eraibuntung-eraibuntung-iyo yo song be bawe, sampe kesong-iyo se, io belo kuli jadi murid-Ku. ²⁷ Ise-ise ulun yo belo moson salib-iyo ai lumpat Aku, io belo kuli jadi murid-Ku. ²⁸ Koe ise lelu ikam po yo ena kakan nngkuat mnara belo tunge ile ngitung ongkos-iyo, puli be sen-iyo nte nyundok gawi ene? ²⁹ Apa ena io sundok mayak tondal-iyo trus belo kuli nyundok-iyo, nang-nang eka ulun yo meti-iyo, nguja io, ³⁰ ulak ngulek: Ulun endo mulai nngkuat, tapi io belo klian nyundok-iyo. ³¹ Ktine low, raja mone si yo ena kakan brangkat epo prang nglawan raja yo mak belo tunge ile nte ngnanam, klian be io diang spulu ribu kongo nte ngadap lawan yo ngompoh-iyo diang duo pulu ribu kongo ulun? ³² Ena belo, io anta nyuyu wakel yo nyndipot bali ene aso oro nte ngunti ktimbe ena damai. ³³ Ktine low doko tongku-tongku kongo ikam, yo belo ngloas kompu tonga-iyo ngket eka pngkeo-iyo, belo kuli jadi murid-Ku. ³⁴ Garam ene betako buen, tapi ena garam ene jadi tawai, diang ise io kinomasin? ³⁵ Belo keo jodo-iyo oli nte umo be nte pupuk, jadi io oding ulun tingen. Ise yo keo tlingo nte nempaning buen yo io ngringo!"