¹ Des jman ene ulet ka epo Yesus tenu-tenu kongo ulun moit kabar nau umbang ulun-ulun Galilea, yo daya dero sampur Pilatus diang daya korban yo die dero nte persembahan. ² Yesus nuing dero: "Omoy kam ulun-ulun Galilea endo pawak olay dosa-iyo se eka ulun Galilea yo mak, koe dero kono jodo nte ktine? ³ Belo! ulek Ku epo ikam. Tapi ena ikam belo btobat, eka ikam anta tomo diang sara ktine. ⁴ Ena be omoy kam yo walu blas kongo, yo mate sengkinan mnara dmpet Siloam, pawak olay pensala-iyo se pnsala eka ulun yo mak yo nongos mbo Yerusalem? ⁵ Belo! ulek Ku epo ikam. Tapi ena ikam belo btobat, eka ikam anta tomo diang sara ktine." ⁶ Trus Yesus ngulek pmerawet endo: "Keo ulun mpun tonga ara yo bolum mbo kbon anggur-iyo, ai io ulet nte meto bua mbo tonga ara ene, tapi io belo di ruku. ⁷ Laju io ngulek epo yo ngurus kbon anggur ene: Sundok tolu taun aku meto bua mbo tonga ara endo ai aku belo pini ruku bua-iyo. Totow ka tonga kayu endo! Nte ise yo bolum mbo tana mndo diang persuma! ⁸ Tuing ulun ene: Tuan, koe ka yo bolum taun endo aso, aku nyangkul tana lekum-iyo ai mie pupuk epo-iyo, ⁹ bahe taun sori io mua; ena belo, totow ka!" ¹⁰ Keo des jman Yesus desung nutui matuk lang lou ibadat des olo sabat. ¹¹ Ela mne keo erai kongo ulun bawe yo sundok walu blas taun snumban koe roh yo koe ene io kroton sampe dukuh klutuk-iyo ai io belo kuli akat diang lonus oli. ¹² Des Yesus kito ulun bawe ene, Io momba io ai ngulek epo-iyo: "Mena, roton ko sundok ale." ¹³ Trus Io mayak kayang-Iyo ombon bawe ene, ai des ene low akat bawe ene, ai ngemulia Allah. ¹⁴ Tapi pngutok low ibadat ene mara beta koe Yesus mkale ulun des olo Sabat, trus io ngulek epo ulun deo: "Keo onom olo nte bgawi. Koe ene ulet doko des olo ene nte pkale jadi nang montuk olo Sabat." ¹⁵ Tapi Tuhan nuing io, ulek-Iyo: "Ulun-ulun mnapik, belo be tongku ikam nmbaling lembu ai kledai-iyo montuk olo Sabat ngket lang rban-iyo ai moit-iyo epo awa ngisop? ¹⁶ Belo be bawe endo, yo sundok walu blas taun bolit iblis, arus nosu ngket bolit iyo ene, koe io ene upus Abraham?" ¹⁷ Des Io ngulek ktine, eka dero yo nglawan-Iyo kiso kanam mai ai eka ulun deo ego koe eka gawi gata mulia, yo sundok nlaku koe-Iyo. ¹⁸ Jadi ulek Yesus: "Duni nau diang ise Krajaan Allah ene ai diang ise Aku anta mrawet-iyo? ¹⁹ Io sama kati bigi jabung, yo nalek ai bnewet koe ulun mbo kbon-iyo; bigi ene moti trus jadi ktonga ai mpulu-mpulu ngensalai mbo paka-paka-iyo." ²⁰ Ai Iyo ngulek nua: "Diang ise Aku anta mrawet Krajaan Allah? ²¹ Io sama kati ragi yo nalek koe ulun bawe ai gnaru snampur lang jlpong trigu tolu takar sampe eka kembong." ²² Trus Yesus malan mupus ngket kota epo kota ai ngket desa epo desa ulak nutui matuk ai Iyo malan trus epo Yerusalem. ²³ Ai keo ulun yo ngulek epo-Iyo: "Tuhan, mba di deo be ulun yo sinolamat?" ²⁴ Tuing Yesus epo ulun-ulun mne: "Bkomer ko nte sumba lalo jawong yo sidet ene! Koe Aku ngulek epo ikam: Deo ulun anta bkomer nte sumba, tapi belo anta kuli. ²⁵ Ena mpu low sundok uat ai sundok nokom jawong, ikam anta akat ela baling ai ngetok-ngetok jawong ulak ngulek: Tuan, ingkang jawong nte kain! Ai Io anta nuing ai ngulek epo ikam: Aku belo di tau ngket mone ikam ulet. ²⁶ Jadi ikam anta ngulek: Kain sundok kuman ai ngisop onon Iko ai Iko sundok nutui matuk mbo boyan-boyan mbo kota kain. ²⁷ Tapi Io anta ngulek epo ikam: Aku belo di tau ngket mone ikam ulet, buyo ngket onon-Ku, ikam eka-eka yo triaw gawi! ²⁸ Ela lane doko keo tangis tungul ai kukut walo ngriot, ena ikam anta kito Abraham diang Ishak ai Yakub ai eka-eka nabi mbo lang Krajaan Allah, tapi ikam se tnimpa epo baling. ²⁹ Ai ulun anta ulet ngket Timur ai Barat ai ngket Utara ai Slatan ai dero anta tunge kuman mbo lang Krajaan Allah. ³⁰ Ai sbeta yo keo ulun yo sori tingen yo anta jadi ulun yo ono tingen ai keo ulun yo ono tingen anta jadi ulun yo sori tingen." ³¹ Des jman ene ulet tenu-tenu kongo ulun Farisi ai ngulek epo Yesus: "Malan aut, dikah aut awa mndo, koe Herodes kakan ngempate Iko." ³² Tuing Yesus epo dero: "Malan aut ai ulek aut epo sengkalau ene: Aku ngusa setan ai mekale ulun, olo ndo ai manin, ai montuk olo yo ktolu Aku anta sundok. ³³ Tapi olo ndo ai manin ai kruan Aku arus nrus dalan Ku, koe belo sngkono nabi pnate ena belo ela Yerusalem. ³⁴ Yerusalem, Yerusalem, iko yo ngempate nabi-nabi ai nurak diang batu ulun-ulun yo snuyu epo iko! Jono Aku ngeno kakan ngumpul pea-peako, sama kati tino piak ngumpul anak-anak iyo iwat olar iyo, tapi iko belo kakan. ³⁵ Sebeta yo low ko endo anta dnikah ai jadi lngoh. Tapi Aku ngulek epo iko: Iko belo anta kito Aku oli sampe des iko ngulek: Diberkati Io yo ulet lang karanTuhan.