² belo keo anta yo betokom yo belo anta ningkang ai belo keo yo melim yo belo anta melak. ³ Koe ene ise yo ikam ngulek kam lang seom anta dedingo lang pa, ai ise yo konis kam po telingo lang duang anta pinosampe engket ombon sapo lowu. ⁴ Aku ngulek epo ikam, teman-teman-Ku, nang ikam takut epo dero yo kuli nempate kompu tonga ai belo kuli ise-ise oli. ⁵ Aku kakan nutuy po ikam ise yo arus takut kam, takut ka po Iyo, yo ena sundok ngempate, keo kuasa nte ngoding ulun po lang neraka. sebetaiyo Aku ngulek epo ikam, takut ka po Iyo!. ⁶ mba be mpit yo jenual limo kukuy duo sen? beta ko ktine ndok belo erai kukuy yo knewot koe Allah. ⁷ Sampe balo la utok ko lou sundok eka nitung. Koe ene nang takut, koe ikam lengkat se uman mpit deo. ⁸ Aku ngulek epo ikam: Tongku ulun yo ngangkan se Aku la ono ulun, Pea Ulun lou anta ngangkan iyo la onon mlekat-mlekat Allah. ⁹ Tapi ise-ise ulun yo nangkal Aku la onon ulun, io anta tnangkal la onon mlekat-mlekat Allah. ¹⁰ Tongku ulun yo ngulek ise-ise nte ngelawan Pea Ulun, io anta nampun; tapi ise-ise ulun yo menguja Roh Kudus, io belo anta nampun. ¹¹ Ena Ulun mekadap ikam epo majelis-majelis, epo pemerenta-pemerenta ai penguasa-penguasa, nang ikam gaer ktimbe ai ise yo arus ulek kam nte ngembela diri kam. ¹² Koe des ene lou Roh Kudus anta nutuy matuk ikam ise yo arus ulek kam." ¹³ Erai kongo ulun engket deo ulun ene ngulek epo Yesus:" Guru, ulek ko tah epo erai buntungku apa io ngembagi warisan diang aku. ¹⁴ Tapi Yesus ngulek epoiyo: erai buntung, ise po yo nengkat Aku jadi pemutus ai pengekang ikam ?". ¹⁵ Ulek-Iyo nua epo dero: " Awas ai Ati-ati epo yo ugoh koe tontan ulun ruak ruaw pengkeoiyo, bolumiyo belo segeweng engket pengkeoiyo ene. ¹⁶ Sundok ene Io ngulek epo dero pakai pemerawet, ulek-Iyo: "Keo erai kongo ulun tataw, tanaiyo ruak ruaw asiliyo. ¹⁷ Io rekunti lang kesong iyo se: ise po yo arus oki gawi, koe aku belo keo awa la mone aku ngona asil tana-ku. ¹⁸ Trus ulekiyo: endo yo anta gawiku, aku anta mekolai longkong-longkongku ai aku anta nengkuat yo aso olai ai aku anta ngona la mne eka gandong ai kakas-kakasku. ¹⁹ Sundok ene aku anta ngulek epo kesongku: kesongku, keo la iko deo kakas,betembun nte betaun-taun kolaiyo; slokoi ka, kuman ka, ngisop ka, ai ego-ego ka! ²⁰ Tapi firman Allah epoiyo: O iko ulun bungang, malom ndo peles kesongko nalek ngket iko, ai ise yo sundok senedia ko, nte ise ene oli? ²¹ ktine doko jadiiyo diang ulun yo ngumpul pengkeo nte iyo se, ena io belo tataw la onon Allah. ²² Yesus ngulek epo murid-murid-Iyo:" Koe ene Aku ngulek epo ikam: nang gaer diang bolum kam, ise yo kakan okan kam, ai nang gaer lou diang kompu kam, ise yo kakan ngkam pakai. ²³ Koe bolum ene aso penting se okan singkap, ai kompu tonga ene aso penting se diris laung. ²⁴ Eti ko tah okak-okak yo belo sekulo, belo nembot asil, ai belo keo longkong, tapi penakan koe Allah. nau umbang ikam ene pawak lengkat se mpulu-mpulu ene!. ²⁵ Ise lelu ikam yo koe gaer iyo kuli nambah tundok siku mbo boyan bolumiyo. ²⁶ Jadi, ena ikam belo kelian nampa kakas yo paling idik, ise moko ikam gaer diang soal-soal yo mak? ²⁷ Eti ko tah bungo bakung, yo belo ngendalin ai belo ngendaro, tapi Aku ngulek epo ikam: Salomo lang eka kehebat iyo ene belo pini sepakai kebuen kati bungo ene. ²⁸ Jadi, ena dikut la umo, yo olo ndo keo ai manin yo noding lang api, ene ka raji Allah, aso da ikam, o ulun yo kurang persaya! ²⁹ Jadi, nang ka ikam nyoal ise yo anta ngkam okan ai ise yo anta nte ngkam isop ai nang ka nyoru kesong kam. ³⁰ Eka-eka ene neto koe bangsa-bangsa la denia yo belo tau Allah. Tapi Umako tau, se ikam merlu beta eka-eka ene. ³¹ Tapi eto ka kerajaan-Iyo, jadi eka-eka ene tenambah lou epo ikam. ³² Nang ka takut, O ikam klompok idik! Koe Uma kam sundok sengkono kesong miye ngkam Kerajaan ene. ³³ Jual ka eka pengkeo kam ai biye ka nte ulun yo belo keo ise-ise! Alo nampa epok yo belo tau usang. yoene pengkeo mbo sorga yo belo tau eka, yo belo dapet kompoh pengako ai yo belo dapet krusak gegat. ³⁴ Koe la mone pengkeo ko keo, la mne lou kesong ko keo. ³⁵ "Searusiyo towing ko nokon seniret ai pelita ko nokon dolan. ³⁶ Ai searusiyo iko sama kati ulun-ulun yo minte-minte tuaniyo uli ngket tama kawen, apa ena io ulet ai ngtok jawong, laju ningkang jawong nteiyo. ³⁷ ego beta batak-batak yo tinonoan kek tuaniyo aso bejaga des io ulet. Aku ngulek epo iko : sebetaiyo io anta nyiret towingiyo ai metawar dero tunge nte kuman, ai io ulet ngelayan dero. ³⁸ Ai ena iyo ulet tenga malom, ena belo manin ma ai krapet dero ngawi ktine, jadi dero ego beta. ³⁹ Apa ikam tau endo: ena mpu lowu tau jman pengako anta ulet, io belo anta ngizin lowu iyo kono bongkar. ⁴⁰ Searusiyo iko lou siap ba, koe Pea Ulun ulet des iko belo ditau jman." ⁴¹ Ulek Petrus: "Tuhan, kain be yo ontus Ko ene diang pemerawet ene belo be eka ulun lou?" ⁴² Tuing Tuhan: "Jadi ise po pengurus lowu yo setia ai tukang yo anta nangkat koe tuaniyo nte jadi pengutok eka-eka batakiyo nte miye okan epo dero des jman nte kuman? ⁴³ Ego beta batak, yo tinonoan tuaniyo ngawi tugasiyo ene. des tuaniyo ene ulet. ⁴⁴ Aku ngulek epo ikam: sebetaiyo tuaniyo ene anta ngengkat io jadi tukang jaga eka mpuniyo. ⁴⁵ Tapi, ena batak ene triaw ai ngulek lang kesongiyo: tuanku endo belo ulet-ulet, trus mulai mupuk batak-batak song ai batak-batak bawe ai kuman ngisop ai mauk, ⁴⁶ jadi tuan batak ene ulet des olo yo belo tinonoaniyo ai des jman io belo di tau, ai anta ngempate io ai nampa iyo kerai pengkono kati ulun-ulun yo belo setia. ⁴⁷ Keo lou batak yo tau pengkakan tuaniyo, tapi yo belo keo nyedia ise-ise, ai belo nggawi ise yo petua tuaniyo, io anta kono deo pupuk katang. ⁴⁸ Tapi ise-ise ulun belo tau pengkakan tuaniyo ai nggawi ise yo arus gnawi yo tau nte kono pupuk katang, iyo anta idik kono pupuk katang. Tongku ulun epo iyo deo denie, engket iyo anta deo tnindu , ai epo ise yo deo tenape, engket iyo anta aso roa nua tnindu. ⁴⁹ "Aku ulet nte nurak api epo denia, Aku ngarap beta, api ene sundok dolan! ⁵⁰ Aku arus nrima baptis ai nyoru beta kesongKu, ena ene belo pian gnawi. ⁵¹ Otus kam, se Aku ulet nte moit damai mbo denia ? belo, ulek-Ku epo ikam, makse damai, tapi belo besengkono. ⁵² Koe mulai engket tmpo ndo anta keo belo besengkono ngket limo kongo ulun lang erai lowu, tolu ngelawan duo ai duo ngelawan tolu. ⁵³ Dero anta bako belo besengkono, uma ngelawan peaiyo song ai pea song ngelawan umaiyo, ine ngelawan peaiyo bawe, ai pea bawe ngelawan ineiyo, ampuiyo bawe ngelawan nantuiyo bawe ai nantu bawe ngelawan ampuiyo bawe" ⁵⁴ Yesus ngulek nua epo ulun deo: "ena iko kito jaun dombo ngket tadah barat, peles iko ngulek: anta ulet uran, ai nau ene jadi beta. ⁵⁵ Ai ena iko kito riut besiup ngket tadah selatan, iko ngulek: olo anta langot takey, ai nau ene jadi beta. ⁵⁶ O ulun pura-pura buen, nau denia ai langit ikam tau ngembedaiyo, ise moko ikam belo tau ngembeda zaman endo? ⁵⁷ Ai ise moko ikam belo tau mutus mbo ikam se ise yo kono? ⁵⁸ Koe ena iko diang baliko malan ngadap pemerenta, bekomer doko bedamai diang iyo kola-kola nyarak boyan, apa nang iko patakiyo epo hakim ai hakim nyerah iko epo pelisi ai pelisi ene ningkos iko po lang sper. ⁵⁹ Aku ngulek epo iko: Iko belo anta baling ngket lane, ena iko belo pian mayar eka utangko."