¹ Keo sindai mbo awa Yesus desung bdoa. Des Io brnti bdoa, erai kongo ngket murid-murid-Iyo ngulek epo Io: "Tuhan, batuk Ko ta kain bdoa, sama kati yo batuk Yohanes epo murid-murid-iyo." ² Tuing Yesus epo dero: "Ena ikam bdoa, ktindo : Bapa, pinokudus ka karan-Ko, ulet ka Krajaan-Ko, ³ Die ka kain tongku olo puli okan singkap, ⁴ diang ampun ka kain diang dosa kain, koe kain low ngampun tongku kongo ulun yo sala epo kain; ai nang moit kain epo lang pngkono pngkna". ⁵ Trus ulek-Iyo epo dero: "Ena keo erai kongo ikam des tenga malom malan epo lou tman-iyo ulak ngulek epo-iyo: Eraibuntung, pkinjam ko ta oki tolu roti, ⁶ koe erai kongo tman ku yo desung malan epo bju singah mbo lou ku ai aku belo keo ise-ise nte die epo-iyo; ⁷ mungkin be tman-iyo ngket lang lou ene nuing : Nang nganggu aku, jawong sundok btokom ai aku diang pea-pea ku sundok turui; aku belo di kuli uat ai mie ene epo eraibuntung. ⁸ Aku ngulek epo ikam: Beta ko io belo di kakan uat ai mie roti ene epo io koe ulun ene tman io, tapi koe nau ruyuk io ene, tman-iyo ene jadi uat low ai mie ise yo pinorlu nte io. ⁹ Koe ene doko Aku ngulek epo ikam: Tindu ka, apa iko anta dnie; eto ka, apa iko anta kuli; ktok ka, apa anta ngko ningkang jawong. ¹⁰ Koe tongku ulun yo tindu, nrima ai tongku ulun yo meto, kuli ai tongku ulun yo ngtok, jawong ningkang nte io. ¹¹ Uma mone ngket ikam, ena pea-iyo tindu esa ngket-iyo, anta mie nipo epo pea-iyo ene nte nganti esa? ¹² Ktine low, ena io tindu toli, anta dnie epo-iyo krmau? ¹³ Jadi ena ikam yo triaw tau mie pndie yo buen epo pea-pea kam, nyaitda Bapa kam yo mbo sorga! Io anta mie Roh Kudus epo dero yo tindu epo-Iyo." ¹⁴ Keo sindai Yesus ngusa ngket lang erai kongo ulun jnis setan yo nampa ulun jadi pepe. Des setan ene baling, ulun ene tau bsara. Ulun deo mne jadi eran. ¹⁵ Tapi keo dero mne yo ngulek : "Io ngusa setan diang kuasa Beelzebul, pngntuo setan". ¹⁶ Keo low yo tindu tanda ngket sorga epo-Iyo nte nyoba Io. ¹⁷ Tapi Yesus tau kno dero laju ngulek : "Tongku krajaan yo sangko lawan diang sama dero se, pasti ancur, sama low kati ulun ngmpanan yo belo tau bsngkono diang sama dero se, pasti rusak. ¹⁸ Ena Iblis ene low belo bkerai ai bako lawan diang sama dero se, ktimbe nau kuasa dero kuli btahan? Koe ulek kam Aku ngusa setan diang kuasa Beelzebul. ¹⁹ Jadi ena Aku ngusa setan diang kuasa Beelzebul, diang kuasa ise, murid-murid kam ngusa setan? Jadi koe ka dero nte tau sala kono-iyo ngkam. ²⁰ Tapi ena Aku ngusa setan diang kuasa Allah, beta-beta-iyo Kerajaan Allah sundok ulet epo ikam. ²¹ Ena erai kongo ulun galak diang keo ba snjata-iyo ngnjaga lou-iyo se, pasti aman pngkeo-iyo. ²² Tapi ena keo erai kongo ulun yo aso galak se io nglawan ai mkalah-iyo, jadi ulun ene ngrampas eka snjata arapan io, ai magi-magi pngkuli-iyo ene. ²³ Ise ulun yo belo sama-sama diang Aku, io nglawan Aku ai ise ulun yo belo moit ulun nte diang Aku , io nampa bulangtuar. ²⁴ Ena roh triaw baling ngket lang ulun, roh ene jadi nyabu belo tadah epo awa deing ai korengba layongba trus meto awa nongos, ai koe io belo keo kuli, roh ene ngulek: Alo aku mulik nua epo lou yo sundok dikah ku prne. ²⁵ Jadi io brangkat ai kito se lou ene brse snapu diang natur buen. ²⁶ Trus io baling ai moit turu roh yo mak yo triaw-triaw aso se-iyo ai dero sumba diang nongos mbo mne. Ene doko pnyundok yo nau ulun ene tambah gramas se nau-iyo ngket ono. ²⁷ Des Yesus aso bsara, ulet erai kongo bawe ngket ekang ulun deo ai ngulek epo-Iyo diang oyon ries: "Ego beta ine yo sundok nglandung Iko diang tete yo nete Iko." ²⁸ Tapi Io ngulek: "Yo ego beta yo doko dero yo nmpaning firman Allah diang nglaku-iyo." ²⁹ Des ulun deo ene ngrpudu nglekum-Iyo, Yesus ngulek: "Ulun dero endo doko pokan ulun triaw. Dero tindu tanda ajaib, tapi epo dero belo anta dnie tanda yo mak se se tanda nabi Yunus. ³⁰ Koe sama kati Yunus jadi tanda nte ulun-ulun Niniwe, ktine low doko Pea Ulun anta jadi tanda nte ulun pokan dero endo. ³¹ Des olo kiamat, raja bawe ngket Selatan ene anta nyuli sama-sama diang ulun pokan dero endo ai io anta ngukum dero. Koe raja bawe ene ulet ngket tompak dnia nte nmpaning khebat pntau Salomo, aso da yo keo mndo endo lngkat se Salomo. ³² Des olo kiamat ulun-ulun Niniwe anta nyuli sama-sama diang ulun pokan dero endo ai anta ngukum dero. Koe ulun-ulun Niniwe ene tobat des dero nmpaning pnuren Yunus, aso da yo keo mndo endo lngkat se Yunus!" ³³ "Ndok belo erai kongo ulun yo neket plita trus mayak yo iwat lou ena belo iwat kepit, tapi ban blai plita, apa eka ulun yo sumba kuli kito pa-iyo. ³⁴ Mato ko ene plita kompu tonga ko. Ena mato ko buen, trang ba pupus kompu tonga ko, tapi ena mato ko triaw, jadi seom kompu tonga ko. ³⁵ Koe ene jnaga buen-buen, apa trang yo keo mbo iko nang jadi nyeom. ³⁶ Ena pupus kompu tonga ko trang ai belo keo yo seom, jadi pupus kompu tonga ko trang ba, sama kati ena plita mtrang iko diang pa-iyo." ³⁷ Des Yesus sundok nutui matuk, erai kongo ulun Farisi tindu epo Io nte kuman mbo lou-iyo. Jadi sumba doko Io epo lang lou ene, trus tunge kuman. ³⁸ Des ulun Farisi ene kito nau ene ai io eran, koe Yesus belo mui kayang-Iyo onon kuman. ³⁹ Tapi Tuhan ngulek epo-iyo : "Ikam ulun-ulun Farisi, ikam mui ngket baling tingen piring ktowong, tapi ela dalom kam ponu ugoh ai gawi triaw. ⁴⁰ O ulun-ulun bungang, belo be Io yo nampa la baling ene, Io low yo nampa la dalom? ⁴¹ Tapi, dnie ta atok yo nte ulun yo belo keo ise-ise apa beta-beta yo eka ene anta jadi brse nte ngkam. ⁴² Tapi slaka beta ikam, o ulun-ulun Farisi, koe ikam mayar perpuluhan ngket slase, ingu ai eka jnis deli, tapi ikam belo di nyanda yo adil diang kasih Allah. Yo erai arus nlaku, yo mak nang dnikah. ⁴³ Slaka beta ikam, o ulun-ulun Farisi, koe ikam gawal tunge mbo awa paling ono lang lou awa smbayang ai gawal nrima hormat mbo pasar. ⁴⁴ Slaka beta ikam, koe ikam sama kati kubur yo belo keo tanda; ulun-ulun yo malan ban mne mba di tau se mne kubur." ⁴⁵ Erai kongo ulun ngket ekang ahli-ahli Taurat ene nuing ai ngulek epo-Iyo : "Guru, diang ngulek ktine, Iko nyruna kain low." ⁴⁶ Tapi Io nuing: "Slaka beta ikam low, o ahli-ahli Taurat, koe ikam mayak pnykoit boyat yo belo di dapet oson ulun, tapi ikam se ndok belo mmpik pnykoit boyat ene budah diang erai grigi. ⁴⁷ Slaka beta ikam, koe ikam nngkuen kubur nabi-nabi, tapi itak kakah kam sundok ngmpate dero. ⁴⁸ Diang ktine ikam ngaku, se ikam nymbeta gawi itak kakah kam, koe dero sundok ngmpate nabi-nabi ene ai ikam nngkuen kubur dero. ⁴⁹ Koe ene hikmat Allah ngulek: Aku anta nyuyu epo dero nabi-nabi diang rasul-rasul ai tenga ngket kdeo nabi-nabi diang rasul-rasul ene anta pate dero ai kurow dero, ⁵⁰ apa ngket pokan dero endo tnuntut eka daya nabi-nabi yo sundok rudak mulai ngket dnia tnampa, ⁵¹ mulai ngket daya Habel sampe daya Zakharia yo sundok pnate ekang mezbah diang Lou Allah. Aso, Aku ngulek epo ikam : Eka-eka yo ene anta tnuntut ngket pokan dero endo. ⁵² Slaka beta ikam, o ahli-ahli Taurat, koe ikam sundok ngalek kunsi pntau; ikam se belo di sumba epo dalom ai ulun yo bkomer nte sumba epo dalom bombong-bombong kam." ⁵³ Trus des sundok Yesus brangkat ngket mne, ahli-ahli Taurat diang ulun-ulun Farisi belo tau brnti mungun ai nyrang Io diang bjnis soal. ⁵⁴ Nte ene dero bkomer ngati Io, apa dero kuli nangop Io ngket pmnsara Io se.