¹ Koe ene, ena iko pinosuli sama-sama diang Kristus, neto plikara yo ela ombo, ela mone Kristus keo, tunge ela bika sanan Allah. ² Pnikir plikara yo ela ombo, makse yo mbo dnia. ³ Koe iko sundok mate ai bolum ko kinomelim sama-sama diang Kristus mbo lang Allah. ⁴ Ena Kristus,yo doko bolum taka, mkelak kompu anta, iko low anta memekelak kompu sama-sama diang Io lang kmulia. ⁵ Koe ene pnate lang kompu tonga kam ise masam yo belo buen, yo ene pokeng, lonsa, pengkakan triau, pengkakan yo dat ai low ugoh, yo sama diang kati soyong simong epo korik kotok, ⁶ eka yo ene memekulet mara roa Allah (mitek ulun-ulun tuju nglawan). ⁷ Des ono ikam low nggawi nau umbang ene des ikam bolum mbo lang iyo. ⁸ Tapi tempondo, noding eka-eka yo endo, yo ene mara, rusi, briek, ptenah ai kesah-kesah rmis yo baling ngket bowa kam. ⁹ Nang oli ikam bako nampa eta, koe ikam sundok ngendikah bolum yo ono diang gawi gataiyo, ¹⁰ ai sundok makai bolum bayu yo dor tinombayu nte kuli pentau yo beta ngaya gambar Allah; ¹¹ lang soal endo belo keo oli ulun Yunani ena belo ulun Yahudi, ulun knatep ena belo ulun belo di knatep, ulun Barbar ena belo ulun Skit, batak ena belo ulun bebas, tapi Kristus doko eka-eka mbo lang ise-ise yo ene. ¹² Koe ene,jadi ulun-ulun pnili koe Allah yo knudus ai tengkosang koe-Iyo, pnakai kanam kosang, ksawai, mba di ngombo-ngombo, lami lamai ai doloh. ¹³ Doloh ka epo sama-sama ikam se, ai bako maaf epo sama-sama ikam se ena keo erai kongo mentulan epo erai-erai, sama kati Tuhan sundok ngemaap ikam, gawi kam ka ketine low. ¹⁴ Ai ombon eka-eka ene:pnakai kosang, nte molit memekerai ai nte ngulohiyo. ¹⁵ Moko yo damai sejahtera Kristus mrenta lang kesong kam, koe nte ene ka doko ikam sundok benomba jadi erai kompu. Ai bsukur ka. ¹⁶ Moko yo pemensara Kristus nongos diang eka-eka pengkeo iyo mbo ikam, sampe ikam diang eka-eka hikmat nutui matuk ai ngae epo sama-sama ikam se ai diang slegu mazmur,ai puji-pujian ai lagu rohani, ikam ngulek syukur epo Allah mbo lang kesong kam. ¹⁷ Ai eka-eka yo ene yo tnampa ke kam diang kesah surah ena belo gawi gata, gnawi ka eka-eka yo ene lang karan Tuhan Yesus, ulak ngulek syukur koe Io epo Allah, Bapa taka. ¹⁸ O bang bawe, patoh epo song kam, ketine moko lang Tuhan. ¹⁹ O bang song, knosang bawe kam nang nglaku prenges epo io. ²⁰ O bang pea patoh epo ulun tuo kam lang eka-eka ise masam, koe ene dokomyo buen mbo lang Tuhan. ²¹ O bapa-bapa, nang mesiet kesong pea kam, apa nang tawai kesong iyo. ²² O'batak-batak, patoh ta epo tuan kam lang dnia endo lang eka-eka ise masam, nang pulun mbo onon dero bute nte mekego dero, tapi diang rela kesong koe takut epo Tuhan. ²³ Ise ka lelu gawi kam, gawi ka diang bol kesong kam kati nte Tuhan ai makse nte ulun. ²⁴ Ikam tau, se ngket Tuhan ikam anta kuli bagian yo tnetap nte kam jadi upa. Kristus ene tuan ai ikam batak-Iyo. ²⁵ Ise-ise yo nampa salah, io anta nanggung pensala yo ene, koe Tuhan belo mili ulun.