² Butal ka bdoa ai lang ne low bjaga-jaga ka ulak ngulek syukur. ³ Bdoa low ka nte kain, apa Allah ngingkang jawong nte kain nyampe Injil, apa kain kuli brsara nau umbang kemelim Kristus, koeiyo ene aku nukum. ⁴ Diang ktine aku kuli mekelak, se ktine memang nau umbangiyo. ⁵ Bolum ka diang roa hikmat epo ulun-ulun belo persaya, pnakai beta-beta jman yo keo. ⁶ Mokoiyo kesah surah kam dor keo kasih, nang tawai, jadi ikam tau, ktimbe ikam arus nuing pengunti-pengunti tongku ulun. ⁷ Eka-eka nau umbangku anta pinotau epo ikam koe Tikhikus, erai buntung taka yo knosang, pelayan yo stia ai teman pelayan lang Tuhan. ⁸ Io suyuku epo ikam diang petua, apa ikam tau nau umbang kain ai apa io nyempae kesong kam. ⁹ Io yo suyuku sama-sama diang Onesimus, erai buntung taka yo stia ai yo knosang, yo erai kongo ngket ikam. Dero anta mmetau epo ikam ise masam yo tekono mbo mendo. ¹⁰ Salam epo ikam ngket Aristarkus, temanku kerai sper ai ngket Markus, pengakon Barnabas - nau umbang io ikam sundok nrima kabar; trima ka io, ena io ulet epo ikam - ¹¹ ai ngket Yesus, yo tinompapa Yustus. Pulun tolu kongo endo ngket dero yo bekatep yo jadi temanku kerai gawi nte Kerajaan Allah; dero ene sundok jadi pnyempae nte oki. ¹² Salam ngket Epafras epo ikam; io ene erai kongo ngket ikam, pelayan Kristus Yesus, yo dor bkomer beta-beta lang doaiyo nte ngkam, apa ikam akat turon, kati ulun-ulun yo sundok tuo ai bol persaya diang eka ise masam nau umbang yo pengkakan Allah. ¹³ Koe aku kuli nyampe pengesah nau umbang io, se io bol poruk pgel koe nte ngkam ai nte dero yo mbo Laodikia ai Hierapolis. ¹⁴ Salam epo ikam ngket pengawat Lukas yo knosang ai ngket Demas. ¹⁵ Senampe salam kain epo erai buntung - era buntung mbo Laodikia; ktine low epo Nimfa ai jmaat yo keo mbo louiyo. ¹⁶ Ai ena surat endo sundok benaca epo ikam, knomer low ta apa benaca low mbo jmaat Laodikia ai apa surat yo nte Laodikia bnaca low epo ikam. ¹⁷ Ai snampe ta epo Arkhipus: eti ta buen-buen, apa pelayanan yo trima kam lang Tuhan gawi kam diang beta-beta.