¹ Koe aku kakan, apa ikam tau, msiken bgawi nte ngawat ikam, ai nte dero yo mbo Laodikia ai nte eka-eka dero, yo belo pian tau se aku, ² apa kesong dero bsampae ai dero kerai sama-sama lang kasih, sampe dero kuli eka ktataw ai kpersaya diang ngerti, ai tau se yo melim mbo Allah, yo ene Kristus, ³ koe mbo lang Io doko bkona eka pengkeo hikmat ai pentau. ⁴ Nau umbang endo ulek ku, apa nang keo yo ngakal ikam diang pmensara-pmensara yo buen otang. ⁵ Koe beta ko aku se belo di keo mbo ekang ikam, tapi lang roh aku sama-sama diang ikam ai aku kito diang ego kteratur bolum kam ai kturon iman kam lang Kristus. ⁶ Ikam sundok nrima Kristus Yesus, Tuhan taka. Koe ene mokoiyo bolum kam dor lang Io. ⁷ Moko iyo ikam kwakat mbo lang Io ai tinongkuat mbo ombon Io, mokoiyo ikam tambah turon lang iman yo sundok bnatuk epo ikam, ai mokoiyo kesong kam mroa ogot ding sukur ⁸ Knop-knop beta, apa nang keo yo moit ikam diang tadah akal yo osaw ai plesu kati tutuy batuk tape koyang ngket bang tuo ai roh-roh dnia, tapi belo di ngaya nte Kristus. ⁹ Koe lang Io doko nongos diang sara kompu dnia eka kponu Allah ene, ¹⁰ ai ikam sundok tinomponu mbo lang Io. Io doko pngutok eka pmerenta ai yo keo kuasa. ¹¹ Lang io ikam sundok knatep, mba di diang katep yo gnawi koe ulun, tapi diang katep Kristus, yo diang sara ngloas kompuiyo yo bdosa, ¹² koe diang Io ikam nlowong lang baptisan, ai mbo lang Io ikam lumpat pinosuli low koe kpersaya kam epo gawi kuasa Allah, yo sundok msuli Io ngket ulun mate. ^{14 13} Ikam low, tontan ko bune mate koe pensala kam ai koe belo di knatep diang sara dnia, sundok tinombolum koe Allah sama-sama diang Io, sundok Io ngampun eka pensala taka, ¹⁴ diang mkore surat utang, aturan-aturan nundruh ai ngontam taka. Ai ene tembelo-Iyo diang netep maku ene mbo kayu salib: ¹⁵ Io sundok mrebit ngket pmerenta-pmerenta ai yo keo kuasa ai nampa dero nte ulun eti lang kekuret-Iyo se dero. ¹⁶ Koe ene nang ka ikam belo nyanda ena ulun ngukum ikam nau umbang okan singkap ai umbang olo raya, bulan bayu ktine low olo Sabat; ¹⁷ eka endo amba yo tingen ngket yo arus ulet, pdahal nau yo beta yo doko Kristus. ¹⁸ Nang ka ikam belo nyanda pengkuret kam pinokore koe ulun yo ungka-ungka kno buen ai sembayang epo mlekat, btondek diang pengkito ai mba di keo alasan nte mkolai yo se koe pngenanam yo aso sara dnia, ¹⁹ pdahal io mba di turon skongkon epo Utok, ngket mone mupus kompu tonga, yo btokon ai bebolit jadi erai koe uyat-uyat ai bruku-bruku tulang, nrima pentuan sifat Allahiyo. ²⁰ Ena des ikam mate sama-sama diang Kristus ai lopos ngket roh-roh dnia, ise moko ikam noko ngaya epo bmasam aturan, ungka-ungka ikam aso bolum mbo dnia: ²¹ nang mulem endo, nang snoba endo, nang tnengkil endo; ²² eka-eka ene pulun nau kakas yo tau rusak nte pakai ai pulun kati ptua-ptua ai tutuy batuk ulun tingen. ²³ Aturan-aturan endo, beta ko nau yo roa diang hikmat diang bsembayang tampa yo se, kati ungka kesong buen, ngurow kompu tonga, mba di keo jodo iyo makse nte nempuas bolum dnia endo.