¹ Erai buntung-erai buntung ku yo knosang, nang beta persaya epo tongku roh, tapi ntes ka roh-roh ene, beta be dero ulet ngket Allah; koe deo nabi-nabi plsu yo sundok nyoret ai- malan epo pupus dnia. ² Ktine low taka tau se Roh Allah: tongku roh yo ngangkan, se Yesus Kristus sundok ulet jadi ulun, ulet ngket Allah, ³ ai tongku roh, yo belo di ngangkan Yesus, belo di ulet ngket Allah. Roh ene doko roh anti kristus ai umbang nau io ikam sundok kringo, se io anta ulet ai tempondo io sudok keo mbo lang dnia. ⁴ Ikam ulet ngket Allah, pea-pea ku, ai ikam sundok mkalah nabi-nabi plesu ene; koe Roh yo keo mbo lang ikam pawak olai se Roh yo keo mbo lang dnia. ⁵ Dero ulet ngket dnia; koe ene doko dero bkesah umbang mbo dnia ai dnia nempaning otang nte dero. ⁶ Kain ulet ngket Allah: ise-ise io tau se Allah, io nmpaning kain; ise io belo ulet ngket Allah, io belo di nempaning nte kain. Ene doko tanda Roh yo beta ai roh nte mketang. ⁷ Erai buntung-erai buntug ku yo knosang, alo taka mangko kosang, koe kosang ene pngulet yo ngket Allah; ai tongku ulun yo keo- kosang, kinomekus ngket Allah ai tau se Allah. ⁸ Ise-ise yo belo keo kosang, io belo tau se Allah, koe Allah ene doko pngosang. ⁹ Lang umbang endo doko kosang Allah pinokelak mbo ekang taka, yo doko se Allah nyuyu Pea-Iyo yo tunggel epo lang dnia, apa taka bolum koe-Iyo. ¹⁰ Endo doko kosang ene: Belo di taka yo sundok nengkosang Allah, tapi Allah yo sundok ngekosang taka ai yo sundok nyemuyu Pea-Iyo jadi ngendamai nte dosa-dosa taka. ¹¹ Erai buntung-erai buntungku yo knosang, ena Allah ktine nau nengkosang taka, jadi taka arus low bako tengkosang. ¹² Ndok belo erai kongo ulun pini kito Allah. Ena taka bako tengkosang, Allah dor lang taka, ai kosang-Iyo sempurna mbo lang taka. ¹³ Ketine doko taka tau, se taka nokon keo mbo lang Allah ai Io mbo lang taka: Io sundok miye taka kuli bagian lang Roh-Iyo. ¹⁴ Ai kain sudok kito ai bkesah, se Bapa sundok nyemuyu Pea-Iyo nte Tukang nylamat dnia. ¹⁵ Ise-ise yo ngangkan, se Yesus ene doko Pea Allah, Allah dor keo mbo lang io ai io mbo lang Allah. ¹⁶ Taka sundok tau ai sundok persaya se Allah kosang epo taka. Allah ene doko kosang, ai ise-ise yo nokon keo mbo lang kosang, io dor keo mbo lang Allah ai Allah mbo lang io. ¹⁷ Lang umbang endo doko kosang Alah sempurna mbo lang taka, yo ene ena tka keo pngeronu persaya des olo snidang, koe sama kati Io, taka low keo mbo lang dnia endo. ¹⁸ Mbo lang kosang belo keo takut: kosang yo sempurna ngmapos takut; koe takut batok ukuman ai ise-ise yo takut, io belo sempurna mbo lang kosang. ¹⁹ Taka mangko kosang, koe Allah ono se ene nengkosang taka. ²⁰ Ena keo ulun ngulek: "Aku ngosang Allah, "ai io kekey se erai buntung iyo, jadi io ene tukang nampa eta, koe ise-ise yo belo kosang se erai buntung iyo yo itaniyo, belo anta io kosang se Allah, yo belo di itaniyo. ²¹ Ai prenta endo trima taka ngket Io: Ise-ise nengkosang Allah, io arus low nengkosang erai buntungiyo.