¹ Eti ta, bukan main kolai tngkosang yo die Bapa epo taka, sampe taka nulek pea-pea Allah, ai beta taka doko pea-pea Allah. Koe ene dnia belo tau se taka, koe dnia belo tau se Io. ² Erai buntung-erai buntungku yo knosang, tmpondo doko taka pea-pea Allah, tapi belo pian melak ise nau umbang taka anta; tapi taka tau, ena des Kristus mmekelak diri nyawa-Iyo, taka anta jadi sama kati Io, koe taka anta kito Io lang nau umbang-Iyo yo se beta iyo. ³ Tongku kongo ulun yo mayak pengundong ene epo-Iyo, mlio mlius diri nyawa sama kati Io yo ene doko berse lio. ⁴ Tongku ulun yo ngnjoun dosa, nglanggar lou aturan Allah, koe dosa ene blanggar diang aturan Allah. ⁵ Ai ikam tau, se Io sundok mkelak kompu tonga-Iyo, apa Io ngloli eka-eka dosa, ai mbo lang Io belo keo dosa. ⁶ Koe ene tongku ulun yo dor keo mbo lang Io, belo ngnjoun dosa oli; tongku ulun yo nokon ngnjoun dosa, belo kito ai belo tau se Io. ⁷ Pea-peaku, nang beta mie ndok erai kongo ulun yo mketang ikam. Ise-ise yo ngnjoun yo kono ene doko yo kono, sama kati Kristus ene doko yo kono ; ⁸ ise-ise yo nokon ngnjoun dosa, ene ulet ngket iblis, koe iblis nggawi dosa ngket tela. Nte ene doko Pea Allah mmekelak kompu tonga-Iyo, io ene apa Io mtumar gawi gata-gawi gata iblis ene. ⁹ Tongku ulun yo kinomekus ngket Allah, belo ngnjoun dosa oli ; koe bini Allah dor ngawa mbo lang io ai io belo kuli ngnjoun dosa, koe io kinomekus ngket Allah. ¹⁰ Endo doko pleta iyo pea-pea Allah ai pea-pea iblis : tongku ulun yo belo ngnjoun yo kono, pngulet io belo ngket Allah, ktine lou ise-ise yo belo di nengkosang erai buntung iyo. ¹¹ Koe endo doko kabar yo sundok dingo kam ngket tela, yo ene doko taka arus baku kosang ; ¹² makse kati Kain, yo ulet ngket yo triaw ai yo ngmpate okong iyo. Ise tukun io ngmpate okong iyo ? Koe eka gawi gata iyo dat ai gawi gata okong iyo kono. ¹³ Nang ka ikam eran, erai buntung-erai buntung, ena dnia kekei se ikam. ¹⁴ Taka tau, se taka sundok wensut ngket maot epo lang bolum, yo ene koe taka nengkosang erai buntung taka. Ise-ise belo nengkosang, io nokon mbo lang maot. ¹⁵ Tongku ulun yo kekei erai buntung iyo, ene doko ulun pngempate ulun. Ai ikam tau, se belo keo ulun pngempate yo nokon keo bolum yo kden mbo lang kompu iyo. ¹⁶ Ktine ka doko taka tau se kosang Kristus, yo ene se Io sundok mie bolum-Iyo nte taka ; jadi taka lou arus mie bolum taka nte erai buntung-erai buntung taka. ¹⁷ Ise-ise yo keo pnyengkeo dnia endo ai kito se erai buntung iyo bolum bnasa tapi belo nyanda nau erai buntung iyo ene, ktimbe ka kosang Allah kuli nokon mbo lang kompu iyo? ¹⁸ Pea-peaku, alo taka nengkosang mba di diang pngesah tingen, tapi diang gawi gata ai lang yo kono. ¹⁹ Ktine ka doko taka tau, se taka ulet ngket yo kono. Ktine lou taka kate nympapoh kesong taka mbo onon Allah, ²⁰ koe ena taka tundruh iyo, Allah ene doko pawak olai se kesong taka diang tau eka ise masam. ²¹ Erai buntung-erai buntung yo tngkosang ku, ena kesong taka belo nundruh taka, jadi taka keo pngronu persaya nte ngompoh epo dmpet Allah, ²² ia ise ka tindu taka, taka kuli ngket Iyo, koe taka ngaya eka-eka suyu-Iyo ai nggawi ise yo sngkono epo-Iyo. ²³ Ai endo doko suyu-Iyo ene : apa taka persaya karan Yesus Kristus, Pea-Iyo, ai apa taka baku tkosang sngkono diang suyu yo bie Kristus epo taka. ²⁴ Ise-ise ngaya eka suyu-Iyo, io mbo lang Allah ai Allah mbo lang io. Ai ktine ka taka tau, se Allah keo mbo lang taka, yo ene Roh yo sundok die Io epo taka.