¹ Pea-peaku, nau umbang endo tulisku nte ngkam,apa ikam nang nampa dosa, tapi ena keo ulun nampa dosa, taka keo ulun nte pngekang diang Bapa, yo ene Yesus Kristus, yo adil. ² Ai Io ene doko nte mendamai eka dosa taka, ai mba di nte dosa taka tingen, tapi nte dosa mupus dnia low. ³ Ai endo doko tanda iyo, se taka tau se Allah, yo ene ena taka ngaya ptua-ptua-Iyo. ⁴ Ise -ise yo ngulek: Aku tau se Io, tapi io belo ngaya ptua-Iyo, io ene ulun pnampa eta ai lang iyo belo keo yo beta. ⁵ Tapi ise-ise yo ngaya firman-Iyo, lang ulun ene bol ksempurna kasih Allah; diang ene doko taka tau, se taka keo lang Io. ⁶ Ise-ise yo ngulek, se io keo lang Io, io arus bolum sama kati Kristus yo bolum. ⁷ Erai buntung-erai buntung yo knosang, makse ptua yo bayu yo tulis ku epo ikam, makse ko ptua yo sundok ola yo sundok keo mbo ikam ngket tla. Ptua ono ene doko firman yo sundok dingo kam. ⁸ Tapi ptua bayu low yo tulisku epo ikam, sundok nyata beta mbo lang Io ai mbo lang ikam; koe seom sundok mapos ai pa yo beta sundok keo pa. ⁹ Ise-ise yo ngulek, se io keo lang pa,tapi io kekey se erai buntung iyo, io ngawa lang seom sampe tempo ndo. ¹⁰ Ise-ise yo nengkosang erai buntung iyo, io nokon ngawa lang pa, ai lang io belo keo nte mketang. ¹¹ Tapi ise-ise yo kekey erai buntung iyo, io ngawa lang seom ai bolum lang seom. Io belo tau epo mbe io malan, koe seom ene sundok nampa mato io belo kito ise-ise. ¹² Aku nulis epo ikam, o pea-pea, koe dosa kam sundok nampun koe karan-Iyo. ¹³ Aku nulis epo ikam, o bapa-bapa, koe ikam sundok tau se Io, yo keo ngket tla iyo. Aku nulis epo ikam, o ulun-ulun burok, koe ikam sundok mkalah yo dat. ¹⁴ Aku nulis epo ikam, o pea-pea, koe ikam tau se Bapa. Aku nulis epo ikam, o bapa-bapa, koe ikam tau se Io, yo keo ngket tla iyo. Aku nulis epo ikam, o ulun-ulun burok, koe ikam galak ai firman Allah nongos lang ikam ai ikam sundok mkalah yo dat. ¹⁵ Nang ka ikam neggawal dnia ai ise yo keo lang ne. Ena ulun nenggawal dnia, jadi penggawal epo Bapa belo keo mbo ulun ene. ¹⁶ Koe eka yo keo lang dnia, yo ene pengkakan iwoy ruang ai penggawal mato diang bolum ksombong, belo di ulet ngket Bapa, tapi ngket dnia. ¹⁷ Ai dnia endo desung kakan tumar eka diang pengkakan iwoy ruang ulun, tapi ulun yo nglaku ptua Allah nokon bolum turai-turai. ¹⁸ Pea-peaku, des endo doko des iyo pngabis, ai kati yo sundok dingo kam, ulun antikristus anta ulet, tempo ndo sundok nyoret deo antikristus. Ene ka doko pleta iyo, se des endo beta-beta doko des yo pngabis. ¹⁹ Memang dero nyoret ngket ekang taka, tapi dero belo di beta-beta sumba diang taka; koe ena dero beta-beta sumba diang taka, pasti dero nokon sama-sama diang taka. Tapi nau umbang ene jadi ktine, apa jadi melak, se belo di eka dero beta-beta sumba diang taka. ²⁰ Tapi ikam sundok kuli pngurapan ngket Yo Kudus, ai diang ktine ikam eka tau. ²¹ Aku nulis epo ikam, mba di koe ikam belo di tau yo kono, tapi ube koe ikam tau ene ai koe ikam low tau, se belo keo eta yo nyoret ngket yo beta. ²² Ise tukang nampa eta ene? Belo be io yo belo di ngangkan se Yesus ene doko Kristus? Io ene doko antikristus, yo ene io mba di ngangkan Bapa ktine low Pea. ²³ Koe ise-ise ulun yo belo di ngangkan Pea, io low belo dingempun Bapa. Ise-ise ulun yo ngangkan Pea, io low ngempun Bapa. ²⁴ Ai ikam, ise yo sundok dingo kam ngket tla, ene arus nokon ngawa mbo ikam. Ena ise yo sundok dingo kam ngket tla ene nokon ngawa lang ikam, jadi ikam nokon ngawa mbo lang Pea ai mbo lang Bapa. ²⁵ Ai endo doko janji yo sundok janji-Iyo se epo taka, yo doko bolum yo kden. ²⁶ Eka ene tulisku epo ikam, yo doko nau umbang ulun-ulun yo bkomer mketang ikam. ^{28 27} Koe lang ikam se dor keo pngurapan yo sundok trima kam ngket-Iyo. Koe ene ikam belo dikotoh batuk ulun mak. Tapi kati umbang pngurapan-Iyo nutui matuk ikam nau umbang eka ise masam-ai tutuy batuk-Iyo ene beta , belo di eta- ai kati umbang Io bay bareh sundok nutuy matuk ikam, ktine ka doko mokoiyo ikam dor ngawa mbo lang Io. ²⁸ Jadi tempo ndo, pea-peaku, ngawa ka mbo lang Kristus, apa ena Io mkelak kompu tonga-Iyo, taka kuli pngeronu persaya ai belo di koyoh mai epo Io des olo pngulet-Iyo. ²⁹ Ena ka ikam tau, se Io ene beta, ikam arus tau low, se tongku ulun, yo nggawi yo kono, kinomekus ngket-Iyo.