¹ Tongku ulun yo persaya, se Yesus ene Kristus, kinomekus ngket Allah; ai tongku ulun yo nengkosang Io yo ngmekus, nengkosang low se Io yo kinomekus ngket Allah. ² Endo doko tandaiyo, se taka nengkosang pea-pea Allah, yo ene ena des taka nengkosang Allah diang nglaku prenta-prenta-Iyo. ³ Koe endo doko kosang epo Allah, yo ene, se taka ngaya prenta-prenta-Iyo. Prenta-prenta-Iyo ene belo di poyo, ⁴ Koe eka yo kinomekus ngket Allah, mkalah dnia. Ai endo doko pengkuret yo mkalah dnia: Iman taka. ⁵ Ise yo mkalah dnia, makse se io yo persaya, se Yesus ene doko Pea Allah? ^{7 6} Endo doko yo sundok ulet diang danum ai daya, yo ene Yesus Kristus, mba di diang danum tingen, tapi diang danum ai diang daya. Ai Roh doko yo mie pmensara, koe Roh ene doko yo kono. ⁷ Koe keo tolu yo mie pmensara( mbo lang sorga: Bapa, Firman ai Roh Kudus; ai yo tolu ene eray. ⁸ Ai keo tolu yo mie pmensara mbo dnia endo): Roh ai danum ai daya ai yo tolu ene eray. ⁹ Taka nrima pmensara ulun, tapi pmensara Allah turon se ene. Koe ktine doko pmensara yi die Allah nau umbang Pea-Iyo. ¹⁰ Ise-ise yo persaya epo Pea Allah, io ngempun pmensara ene lang kompu tongaiyo; ise-ise yo belo persaya epo Allah, io nampa Io jadi pnampa eta, koe io belo di persaya epo pmensara yo die Allah nau umbang Pea-Iyo. ¹¹ Ai endo doko pmensara ene: Allah sundok mie bolum yo kden epo taka ai bolum ene keo mbo lang Pea-Iyo. ¹² Ise-ise yo ngempun Pea, io ngempun bolum; ise-ise yo belo ngempun Pea, io belo di ngempun bolum. ¹³ Eka-eka ene tulis ku nte ngkam, apa ikam yo persaya epo karan Pea Allah, tau, se ikam ngempun bolum yo kden. ¹⁴ Ai endo doko pngeronu persaya taka epo-Iyo, yo ene se Io mie yo doa taka, ena taka tindu ise-ise epo-Iyo ngaya ptua-Iyo. ¹⁵ Ai ena taka tau, se Io mie ise ka yo pnindu taka, jadi taka tau low, se taka sundok kuli ise masam yo sundok tindu taka epo-Iyo. ¹⁶ Ena keo ulun kito erai buntung iyo keo gawi dosa, yo ene dosa yo belo di nte moit mate, mokoiyo io bdoa epo Allah ai Io anta mie bolum epoiyo, yo ene dero, yo ngenjoun dosa yo belo di nte moit mate. Keo dosa yo nte moit mate: nau umbang ene aku belo di ngulek, se io arus bdoa. ¹⁷ Eka-eka gawi triaw ene dosa, tapi keo dosa belo di nte ngelian. ¹⁸ Taka tau, se kompu ulun yo kinomekus ngket Allah, belo di nampa dosa; tapi Io yo kinomekus ngket Allah nguguiyo, ai yo dat belo di kuli mulemiyo. ¹⁹ Taka tau, se taka ulet ngket Allah ai mupus dnia keo ela iwat kuasa yo triaw. ²⁰ Tapi taka tau, se Pea Allah sundok ulet ai sundok mie akal epo taka, apa taka tau Yo Beta; ai taka keo mbo lang Yo Beta, mbo lang Pea-Iyo Yesus Kristus. Io ene doko Allah yo kono ai bolum yo kden. ²¹ Pea-peaku, ati-ati epo bmasam berala.