( Umat PIlehon Allah) ¹ Ake mengehatoko kebonoron delom Kristus, ake hopi pelato, ngan suaro hatike mehilu besaksi besamo-samo ngan Roh Kodos, ² behwa dukacitake sangat godong ngan teros-meneros besedeh delom hatike. ³ Sabab, ake beharop empok dirike tekotok, tepisah deri Kristus demi dolor-dokorke, kaum sebengsoke secaro jasmani. ⁴ yaitu urang-urang Israel; pemelek hak untok deangket menjedi anak-anak Allah, nerimo kemuliaon, perjanjion-perjanjion, nerimo pemborion Hokom Taurat, ibadah, sereta jenji-jenji. ⁵ Mikelah ketoronon bepak-bepak lelohor, ngan deri antaro mikelah Kristus delaherko menorot degeng, Nye nyo adolah Tuhan atas segelo sesuatu ngan nyo tepuji selamo-lamonye, Amin! ⁶ Cuma hambok, Firman Allah, hopi gagal. Sabab, hopi segelo urang nyo beasal Israel adolah urang Israel, ⁷ ngan hopi segelo ketoronon Abraham adolah anak-anaknye, hambok "nyo desobot ketorononme adolah nyo beasal deri Ishak." ⁸ Hal nie bearti bahwa bukon anak-anak secaro degeng nyo tehitong sebagai anak-anak Allah, meloenko anak-anak perjenjion saja nyo tehitong sebagai ketoronon. ⁹ Sabab, nielah pemboekon jenji iye: "Pado waktu nielah Ake nak njongok, ngan Sara nak mempunyoi seurang anak jenton." ¹⁰ Bukon anyo nie bae, hambok tekalo Ribka jugo mengandong anak-anak deri sikok urang, yaitu Ishak, nenek poyang kite. ¹¹ Sabab, sebolom anak-anak iye delaherko ngan bolom melakuko sesuatu nya beik apo nyo jahat, empoknyo tujuon Allah mengenai pilehan-Nye detogohko bukon ulenyo perbuaton hambok ulenyo Nye nyo mantou, ¹² dekehatokolah kepado Ribka, " Anak nyo sulung nak melayani adeknye." ¹³ Upa ado tetules,"Ake mengasehi Yakub, Hambok Ake luat Esau." ¹⁴ Jedi, ape nyo hendak kite gerako? Apekah Allah hopi adel? sekali-kali hopi! ¹⁵ Sabab Nye boek kepado Musa, "Ake bebelos kaseh kepado siape Ake mau bebelos kaseh, ngan ake bemurah hati kepado siape Ake mau bemurah hati." ¹⁶ Jedi, hal iye hopi begentong pado kehendak apo kerjo karas mendesio, hambok pado Allah nyo menonjokko kemurahon-Nye. ¹⁷ Sabab, Kitab Suci boek kepado Firaun: "Ulenyo untok alason nielah Ake mengangketme empok Ake menonjokko kuaso-Ke de delomme, ngan empok namo-Ke deberitako de segelo bumi." ¹⁸ Jedi, Allah bebelos kaseh kepado siape pon nyo dehendaki-Nye, ngan mengarasko hati siapepon nyo dekehendaki-Nye. ¹⁹ Jedi, kowe nak boek kepadoke: "Mengkah Nye maseh menyalahko? Sabab, siapekah nyo depot menentang kehendak-Nye?" ²⁰ Sebeleknye, siapekah kowe, hai mendesio, sehingga kowe membantah kepado Allah? Apekah sesuatu nyo dibentok boek kepado Allah nyo membentoknye, "Mengkah kowe membentok ake upa nie?" ²¹ Apekah tukang tembikar hopi berhak atas tanoh liat: untok membuat deri gumpalon tanoh nyo samo suatu bejana nyo degunako untok hal nyo mulia, ngan bejana loen nyo degunako untok hal nyo hina? ²² Upamone munye Allah, meskipon menghendaki untok menonjokko murka-Nye ngan menyatoko kuaso-Nye, lah menanggong kesabaron nyo godong terhadop bejana-bejana kemurkaon-Nye nyo lah depersiapko untok kebenasoon? ²³ Nye melakukonye untok menyatoko kekayaon kemualiaon-Nye atas bejana-bejana belos kasihan-Nye, nyo lah depersiapko-Nye untok kemuliaon, ²⁴ yaitu kite, nyo depantou-Nye, bukon anyo deri antaro urang Yahudi, hambok jugo deri antaro bengso-bengso loen. ²⁵ Upa nyo jugo defirmanko-Nye delom kitab Hosea: "Mike nyo bukon umat-Ku, nak Kesobot umat-Ke. Ngan nyo hopi Kekasehi, nak Kesobot 'nyo kekaseh'." ²⁶ Ngan, "detempat Allah mengehatoko de maso lalu: 'Kowe bukon umat-Ke,' de tempat iye mike nak desobot 'anak-anak Allah nyo hidop." ²⁷ Ngan Yesaya meratopi Israel: "Walaupon jumlah anak Israel upa bungen de lout, hambok hanyo siso-siso mika bae nyo nak deselamatko, ²⁸ Sabab, Tuhan nak melakuko firman-Nye de pocok bumi, sempurna ngan segera." ²⁹ Samo upa nyo denubuatko uleh Yesaya: "Jika Tuhan semesta Alam hopi meninggalko pado kite ketoronon, kite sodah menjedi samo upa Sodom ngan menyerupai Gomora." ³⁰ Jedi, ape nyo nak kite gerako? Bahwa bengso-bengso bukon Yahudi nyo hopi mengikoti kebonoron, lah memperuleh kebonoron, yaitu kebonoron nyo beasal deri iman; ³¹ Cuma hambok, bengso Israel nyo beusaha menaati kebonoron Hokom Taurat justru hopi sampoi kepado hokom iye? ³² Mengkah? ulenyo mike hopi mengejarnye dengan iman, hambok ngan perbuaton. Mike tepuntok pado betu sandungon. ³³ Upa ado tetules: "Kolehlah, Ake meletakko de Sion sebuah betu sandungon ngan sebuah betu karang, ngan barangsiape nyo pecayo kepado-Nye hopi nak depermaluko."