¹ Dolor-dolor, kendok hatike ngan doake kepado Allah untok mike adolah upa mike deselamatko. ² Sabab, ake pacok besaksi tentang mike bahwa mike memeleki semangot untok Allah, hambok hopi bedasarko pado pengetahuon nyo bonor. ³ Sabab, mike hopi tahuko kebonoron Allah ngan beusaha menogokko kebonoron mika dewek, mike hopi tondok kepado kebonoron Allah. ⁴ Sabab, Kristus adolah kegenapon Hokom Taurat nyo menjedi kebonoron bage setiap urang nyo pecayo. ⁵ Musa menoles tentang kebonoron nyo beasal deri Hokom Taurat, bahwa seseurang nyo melakuko kebonoron bedasarko hokom nak hidop ulehnye. ⁶ Cuma hambok, kebonoron nyo beasal deri iman boek demikian, "Jengon boek delom hatime, 'Siapekah nyo nak noek ke surga?' Artinye, untok ngunda Kristus toron. ⁷ Atau 'Siape nyo nak toron ke jurang mout? Artinye, untok ngunda Kristus noek deri antaro urang mati. ⁸ Cuma hambok, ape nyo dekehatokonye? " Firman berado dekat padome, yaitu de delom molotme ngan de delom hatime." Iyelah perkataon iman nyo kami beritako. ⁹ Munye dengan molotme kowe mengaku bahwa Yesus adolah Tuhan, ngan pecayo de delom hatime bahwa Allah membangketko Nye deri antaro urang mati, kowe nak deselamatko. ¹⁰ Ulenyo ngan hati, urang menjedi pecayo sehingga beuleh kebonoron; ngan dengan molot, urang mengaku sehingga beuleh keselamaton. ¹¹ Ulenyo Kitab Suci boek, "Siapepon nyo pecayo kepado-Nye hopi nak pernah depermaluko." ¹² Sabab, hopi ado perbedaon antaro urang-urang Yahudi ngan urang-urang Yunani; Tuhan nyo sikok adolah Tuhan pocok segelo, nyo belimpah kekayaon bage segelo urang nyo beseru kepado-Nye. ¹³ Sabab, "Segelo urang nyo beseru delom namo Tuhan nak deselamatko." ¹⁴ Cuma hambok, upamone mika nak beseru kepado Nye nyo bolom pecayoi? Ngan, upamone mika depot pecayo kepado Nye nyo bolom pernah miko dongor? Ngan, upamone mike depot dongor, munye hopi ado nyo memberitako-Nye? ¹⁵ Ngan, upamone mike depot memberitako-Nye, munye mike hopi deotos? Upa ado tetules: "Alangkah belagaknye kaki-kaki mike nyo detong ngunda Kabar Beik!" ¹⁶ Hambok, hopi segelo urang menaati Kabar Beik iye sabab Nabi Yesaya boek, " Tuhan, siapekah nyo lah pecayo terahdop berita nyo lah dedongornye deri kami?" ¹⁷ Jedi, iman timbol deri pendongoron, ngan pendongoron uleh Firman Kristus. ¹⁸ Hambok, ake betanyo, "Apekah urang-urang iye hopi mendongor?" tentu mik dongornye sabab, "Suaro mike sampoi ke seluruh denia, ngan pemboekkon mike sampoi ke hojong-hojong bumi." ¹⁹ Hambok, ake boek, "Apekah bengeso Israel hopi memahaminye?" Pertamo, Musa boek, Ake nak membangketko cemburume terhadop mike nyo bukon suatu bengeso, ngan membangketko amarahme terhadop bengeso nyo lali. ²⁰ Ngan dengan berani Yesaya boek : "Ake detomuko uleh mika nyo hopi ndelok Ake; Ake menampakko diri kepado mika nyo hopi menanyoko tentang Nye, ²¹ Cuma hambok, tentang bengso Israel Nye boek. "Sepanjong ari Ake lah mengolorko tangon-Ke kepado bengeso nyo hopi taat ngan membentoh."