(Hidop Ulenyo Roh Allah) ¹ Uleh ulenyo iye, kinie hopi ado lagi penghokomon bage urang nyo ado delom Yesus Kristus. ² Sabab, hokom Roh kehidopon de delom Yesus Kristus lah memenangko kowe jak hokom doso ngan maot. ³ Sabab, ape nyo hopi depot delakuko uleh Hokom Taurat ulenyo delamahko uleh degeng, Lah Allah lakuko dengan caro mengotos Anak-Nye dewek empok menjedi serupa dengan mendesio nyo bedoso ngan bekoeton dengan doso, nye menghokom doso dedelom degeng, ⁴ empoknyo tuntuton Hokom Taurat degenapi, delom kite nyo hopi hidop menorot degeng, hambok menorot Roh. ⁵ Sabab mike nyo hidop menorot degeng, memekerko hal-hal nyo bersifat degeng hambok mika nyo hidop menorot Roh, memekerko hal-hal nyo bersifat Roh. ⁶ Sabab pekeron nyo daerahko kepado degeng, adolah maot, hambok pekeron nyo dearahko kepado Roh adolah hidop ngan damai sejahtera. ⁷ Ulenyo pekeron nyo dearahko kepado degeng menentang Allah; sabab nye hopi tondok kepado Hokom Allah, bahkan hopi depot melakukonye. ⁸ Ngan, mike nyo hidop de delom degeng hopi depot menyenangko Allah. ⁹ Cuma demikian, kowe hopi hidop delom degeng, hambok delom Roh munye Roh Allah memang tinggal de delom kowe. Sabab, munye seseurang hopi memeleki Roh Kristus, nye bukonlah melek-Nye. ¹⁰ Cuma hambok , munye Kristus ado de delom kowe, walaupon badanme mati karna doso, hambok roh hidop uleh ulenyo kebonoron. ¹¹ Hambok, munye Roh Nye nyo membangketko Yesus Kristus deri kemation tinggal de delomme, Nye nyo membangkitko Yesus Kristus deri kematian jugo nak memberiko hidop kepado badanme nyo fana melalui Roh-Nye nyo tinggal de delom kowe. ¹² Jedi, dolor-dolorku, kite adolah urang-urang nyo berontong, cuma bukon kepado degeng, empoknyo hidop menorot degeng. ¹³ Sabab, munye kowe hidop menorot degeng, kowe akan mati, hambok munye karna Roh kowe mematiko perbuaton-perbuaton badanme, kowe akan hidop. ¹⁴ Sabab, segelo urang nyo depempen uleh Roh Allah adolah anak-anak Allah. ¹⁵ Sabab, kowe hopi menerimo Roh perbudakon lagi nyo menyebabko ketakoton, cuma kowe lah menerimo Roh nyo lah mengangket kowe menjedi anak-anak Allah, nyo melalui Roh iye kite beseru, "Abba, Bapa!" ¹⁶ Roh iye dewek bersaksi besamo roh kite bahwa kite adolah anak-anak Allah, ¹⁷ ngan munye kite adolah anak, kite jugo adolah pewares, pewares Allah, ngan sesamo pewares dengan Kristus; munye kite bonor-bonor torot menderita besamo-samo dengan Nye, kite jugo akan demuliako besamo-samo ngan Nye. ¹⁸ Sabab, ake menganggop bahwa penderitaon-penderitaon pado saat kinie nie hopi depot debandengko dengan kemuliaon nyo akan denyatoko kepedo kite. ¹⁹ Sabab, segelo ciptaon sangat menanti-nantiko dengan rindu saat anak-anak Allah denyatoko. ²⁰ Sabab, segelo ciptaon lah detondokko kepado kesio-sioon, bukon norot ke hendoknye dewek, hambok norot kendok Nye nyo lah menaklukkonye, atas dasar pengharopon, ²¹ empoknyo segelo ciptaon iye dewek jugo nak demerdekako deri perbudakon kebenasoon menuju kemenangon anak-anak Allah nyo ponoh kemuliaon. ²² Sabab kite tahuko bahwa segelo ciptaon samo-samo mengerang ngan menderita saket besalen sampoi kinie. ²³ Ngan bukon hanyo nie, hambok kite dewek pon nyo nerimo buah sulung Roh jugo mengerang delom diri kite dewek, sambel menantiko pengangketon sebagoi anak, yaitu penoboson badan kite. ²⁴ Sabab, kite deselamatko de delom pengharapon. Cuma hambok, pengharapon nyo tekole bukon lagi pengharopon, sabab siapekah nyo berharop, atas sesuatu nyo lah dekolehnye ? ²⁵ Cuma hambok, munye kite mengharopko sesuatu nyo hopi kite koleh, kite nunggunye dengan tekon. ²⁶ Demikian jugo, Roh menolong kite delom kelemahon kite; sabab kite hopi tahuko upa mone seharusnye kite bedoa, hambok Roh dewek nyo besyafaat demi kite dengan erangan-erangan nyo hopi teungkapko uleh kato-kato. ²⁷ Ngan, Nye lah menyeledeki hati ape maksod Roh iye, ulenyo Nye besyafaat bage urang-urang kodos sesuoi ngan kehendak Allah. ²⁸ Ngan, kite tahuko bahwa segelo sesuatu bekerjo besamo-samo demi kebaikon urang-urang nyo mengasehi Allah yaitu mika nyo depantau sesuoi ngan rencana Allah. ²⁹ Sabab, mike nyo lah dekenal-Nye sejak semula, jugo lah detentukonye sejak semula untuk menjedi serupa dengan gambaron Anak-Nye, empok Nye menjedi nyo sulung de antaro lobot dolor. ³⁰ Mike nyo lah detentuko-Nye sejak semula, jugo depantau-Nye; ngan mike nyo depantou-Nye, jugo debonorko-Nye; ngan mike nyo debonorko-Nye, jugo demuliako-Nye. ³¹ Jedi, ape nyo nak kite gerako tentang segelo nie ? Munye Allah depihak kite, siapekah nyo melawon kite ? ³² Nye nyo hopi menyayongi Anak-Nye dewek, hambok menyerahko-Nye bage kite segelo, upa mone mongken Nye besamo-samo dengan Nye hopi mengaruniako segelo sesuatu bage kite ? ³³ Siapekah nyo nak mendakwa urang-urang pilehon Allah ? Allah nyo membonorko mike. ³⁴ Siapekah nyo nak membori hokoman? Yesus Kristus nyo lah mati, bahkan nyo lah dibangketko deri kemation, dodok desebelah kanon Allah untok besyafaat bage kite. ³⁵ Siapekah nyo akan memisahko kite deri kaseh Kristus? Apekah penindason, apo kesuleton, apo penganiayaon, apo kelaporon, apo ketelanjongon, apo bahayo apo pedang? ³⁶ Upa ado tetules, "Demi Engkau, kowe berado delom bahayo maot sepanjong waktu; kami deanggop sebagoi domba-domba sembelehon." ³⁷ Cuma hambok, delom segelonye nie, kite lobeh deri pado para pemenang uleh Nye nyo mengasehi kite. ³⁸ Sabab, ake deyakenko bahwa bukon kemation maopon kehidopon, bukon jugo malaekat-malaekat maopon pemerentah-pemerentah, bukon jugo hal-hal nyo kinie maopon nyo nak detong, kekuasoon, ³⁹ bukon pulo nyo depucuk maopon nyo udo de bewoh, ataupon suatu ciptaon loennye, mampu memisahko kite deri kaseh Allah, nyo ado dedelom Yesus Kristus Tuhan kite.