¹ Apekah kowe hopi tahuko, hai dolor-dolorke (sabab ake boek kepado mike nyo mengetahui Hpkom Torat), bahwa Hokom Torat bekuaso pucok diri seseurang selamo urang iye hidop? ² Ulenyo iyelah, seurang betina nyo kawen tekobot secaro hokom kepado lakinye selamo enye hidop; hambok munye lakinye teelek, enye nak de bebasko jak hokom perkawenonnye. ³ Jedi, munye betina iye menjedi bini jenton loen selagi lakinye lagi hidop, enye nak de sobot pezina, hambok munye lakinye teelek, nye bebas deri hokom sehinggo enye desobot pezina munye kawen ngan jenton loen. ⁴ Ulenyo iye, dolor-dolorke, kowe jugo lah teelek bage Hokom Torat melewati badan Kristus empoknyo kowe menjedi melek nyo loen, yoiye Enye nyo lah debangketko deri kemation sehinggo kite depot menghaselko buah bage Allah. ⁵ Sabab, ketiko kite lagi hidop delom kedegengon, hawo nafsu doso nyo derangsang oleh Hokom Torat begawe delom anggota-anggota badan kite untok menghaselko buah bage maot. ⁶ Cuma hambok, kinie kite lah debebasko deri Hokom Torat, lah teelek tehadop ape nyo tekalo membelenggu kite sehinggo kite kinie melayani delom keadaon beheru menorot Roh, bukon menorot hukom lamo nyo tetoles. ⁷ Munye upanio, apekah nyo nak kito gerako? Apekah Hokom Torat iye doso? Sekali-kali hopi! Sebeleknye, ake hopi nak mengenal doso kecuali melalui Hokom Torat, ulenyo ake hopi nak mengerti arti deri ngendokko melek urang loen munye Hokom Torat hopi gerako, "Jengon mengendokko." ⁸ Cuma hambok, doso mengambek kesempaton melewati perintah iye untok menghaselko berbagai macam kendok delom dirike; sabab tanpa Hokom Torat doso nak mati. ⁹ Tekalo ake hidop tanpa Hokom Torat, hambok ketiko hokom iye jongok, doso menjedi hidop ngan ake mati; ¹⁰ ngan perentah nie, nyo seharosnye ngundah kepado hidop, justro memempenke kepado maot. ¹¹ Sabab, doso mengambek kesempaton melewati hokom iye untok menipu ngan membunohke. ¹² Jedi Hokom Torat iye adolah kudus, ngan hokom iye kudus, bonor ngan beik. ¹³ Munye demikion, apekah nyo beik iye jongokko kemation untokke? Sekali-kali hopi! Dosolah nyo menghaselko maot dedelomke melewati ape nyo beik empoknyo nyato bahwa doso adolah doso, ngan melewati hokom iye doso semaken tekelek keberdosoonnye. ( Pertentangon de Delom Diri Kite) ¹⁴ Sabab kite tahuko bahwa Hokom Torat besifat rohani, cuma ake besifat jasmani, tejual de bewoh doso. ¹⁵ Sabab, ake hopi mengrti apenyo kulakuko ulenyo ake hopi melakuko hal nyo kuendoko, meloenko ake melakuko hal nyo kuluat. ¹⁶ Cuma hambok, muye ake melakuko suatu hal nyo hopi endok ku lakuko, ake menyetujui bahwa Hokom Torat iye beik. ¹⁷ Jedi kinie, bukon lagi aku nyo melakukonye, cuma doso nyo hidop de delomke. ¹⁸ sabab, ake tahuko bahwa hopi ado hal beik nyo hidop de delomke, nyoiye de delom kedegengonke, ulenyo kehndak iye ado de delom dirike, cuma untok melakuko nyo beik iye hopi. ¹⁹ Sabab, ake hopi melakuko prbuaton beik nyo kukendoko, hambok ake melakuko hal nyo jahat, nyo hopi kukendokko! ²⁰ Jedi, muye ake melakuko hal nyo hopi kukukendokko, iye bukon lagi ake nyo melakukonye, cuma doso nyo hidop dedelom ake. ²¹ Jedi, ake menomuko hokom nie, nyoiye: Ketiko ake endok melakuko hal nyo beik, kejahaton jugo ado besamoke. ²² Sabab, ake agom nak hokom Allah de delom batenke, ²³ Cuma ake ngelek hokom loen delom anggota-anggota badan ke nyo bejuang melawon hokom akal budike ngan menawanke ke delom hokom doso nyo ado delom anggota-anggota badanke. ²⁴ Ake mendesio celako! Siapekah nyo nak meyelamatko ake deri badan maot nie? ²⁵ Syukor kepado Allah melewati Tuhan kite, Kristus Yesus! ²⁶ Jedi, ngan akal budike, ake melayani hokom Allah cuma ngan badan jasmanike ake melayani hokom doso.